លោក សុខ លូ បញ្ជាក់បន្ថែមថា នៅស្ទឹងសង្កែ ត្រង់ចំណុចស្រុករតនមណ្ឌល ពិតជាមានបង្ហូរទឹកខ្មៅកខ្វក់មែន។ ករណីនេះ លោក បានបញ្ជារឱ្យមន្រ្តីជំនាញនៃមន្ទីរបរិស្ថាន និងមន្ទីរឧស្សាហកម្មខេត្តបាត់ដំបង ចុះស្រាវជ្រាវ ប៉ុន្តែ មិនបានឃើញត្រីងាប់ដូចការផ្សាយរបស់ពលរដ្ឋ និងអ្នកសារព័ត៌មានឡើយ។ 
 

អភិបាលខេត្តបាត់ដំបងរូបនេះ ចាត់ទុកព័ត៌មាននេះ ជារឿងមិនពិត ដែលនាំឱ្យមានការបំពុលសង្គម និងធ្វើឱ្យពលរដ្ឋព្រួយបារម្ភ។ មកទល់ពេលនេះ ទឹកស្ទឹងសង្កែ បានវិលមកស្ថានធម្មតាវិញហើយ ខណៈមន្រ្តីជំនាញកំពុងរកប្រភពនៃការលេចធ្លាយ និងរងចាំលទ្ធផលតេស្តជាតិពុលនៃទឹកខ្មៅកខ្វក់នេះ។ 
 

លោក សុខ លូ បញ្ជាក់ប្រាប់សារព័ត៌មានថ្មីៗយ៉ាងដូច្នេះថា៖«រឿងទឹកខ្មៅហូរចូលស្ទឹងសង្កែនេះ ពួកយើងកំពុងស្រាវជ្រាវ។ ខ្ញុំបានឱ្យក្រុមការងារចុះទៅពីរថ្ងៃហើយ ប៉ុន្តែ មិនទាន់ឃើញស្ថានភាពត្រីងាប់ ដូចការចុះផ្សាយទេ។ ដូចមើលហើយ រូបភាពមួយចំនួន មិនដឹងកាត់តមកពីណានោះទេ ដូច្នេះ ទាំងអស់នេះ គឺជាការបំពុលសង្គមធ្ងន់ធ្ងរ។ រូបភាពទាំងអស់នោះ មិនមែនជារូបភាពពិតក្នុងស្ទឹងសង្កែទេ»។
 

ចំណែក លោក កត បូរ៉ាន ប្រធានមន្ទីរបរិស្ថានខេត្តបាត់ដំបង បានលើកឡើងថា មកទល់ពេលនេះ លោក និងក្រុមការងារជិត៣០នាក់ទៀត រកមិនទាន់ឃើញទឹកខ្មៅកខ្វក់នោះ លេចធ្លាយចេញពីណានៅឡើយទេ។ ករណីនេះ លោក សង្ស័យថា បណ្ដាលមកពីការលេចធ្លាយកាក​សំណល់​ធ្យូងថ្ម​ ដែល​ក្រុម​ហ៊ុន​ប្រើ​ប្រាស់​សម្រាប់ឧស្សាហកម្មរបស់ពួកគេ នៅអំឡុងពេលភ្លៀងធ្លាក់ខ្លាំង កាលពីប៉ុន្មានថ្ងៃមុន។ 
 

ដូចគ្នានឹង លោក សុខ លូ ដែរ ប្រធានមន្ទីរបរិស្ថានរូបនេះ ថា​លោក មិនទាន់រកឃើញត្រីងាប់ដោយសារទឹកខ្មៅកខ្វក់នៅឡើយ ខណៈក្រុមការងាររបស់លោក បន្តតាមដាន និងធ្វើតេស្តទឹកកខ្វក់នេះ រកកម្រិតជាតិពុល ដើម្បីបកស្រាយជូនពលរដ្ឋ កុំឱ្យមានការព្រួយបារម្ភ។  
 

លោក កត់ បូរ៉ាន ប្រាប់ដូច្នេះថា៖«ឥឡូវនេះ ពួកយើងកំពុងតែរក និងកំណត់មុខសញ្ញា ហើយយើង​ក៏កំពុងរងចាំលទ្ធផលតេស្តមើលថា កម្រិតពុលវាប៉ុន្មាន វាបែបណា ដើម្បីបកស្រាយជូនប្រជាពលរដ្ឋ កុំឱ្យលោកព្រួយបារម្ភ»។  
 

កន្លងទៅ ធ្លាប់មានរោងចក្រផលិតថ្នាំពេទ្យរបស់ចិនមួយឈ្មោះថា«អឺកាង» បានបង្ហូរកាក់សំណល់គីមី ចូលទៅក្នុងស្ទឹងសង្កែ ហើយធ្វើឱ្យត្រីងាប់។ ទោះជាបែបនេះក្ដី លោក បូរ៉ាន មិនអាចចោទប្រកាន់រោងចក្រនេះបានទេ ដោយសាររកមិនទាន់ឃើញភស្តុតាង ឬកន្លែលេចធ្លាយ ខណៈមន្រ្តីជំនាញ ក៏កំពុងត្រួតពិនិត្យរោងចក្រ ឬក្រុមហ៊ុនផ្សេងទៀតដែរ។  
 

ជុំវិញបញ្ហានេះ លោក អះអាងថា មន្ទីរបរិស្ថាននឹងមិនបណ្ដែតបណ្ដោយឱ្យរោងចក្រទាំងនោះធ្វើអ្វីដោយមិនគិតពីសុខុមាលភាពពលរដ្ឋនោះទេ។ ប្រសិនបើ រកឃើញថា រោងចក្រមួយណាបង្ហូរទឹកខ្មៅកខ្វក់ចូលស្ទឹងសង្កែ រោងចក្រនឹងរងការពិន័យតាមផ្លូវច្បាប់៕