«បាទ!សម្រាប់ខ្ញុំផ្ទាល់ពិសេសការសិក្សាគឺអត់ចោលទេ ខ្ញុំនឹងបន្តការសិក្សារហូតដល់ចប់ថ្នាក់បរិញ្ញាបត្រ»។ កីឡាករគុនខ្មែរ លី វិបុលសេនា និយាយក្នុងបទសម្ភាសមួយជាមួយសារព័ត៌មានឌីជីថលថ្មីៗ ពីទឹកដីអង្គរ។ ជាមួយនឹងការសិក្សាផង ហ្វឹកហាត់ប្រដាល់ផង វិបុលសេនា បញ្ជាក់ច្បាស់ៗថារូបគេបានបែងចែងពេលវេលារៀនសូត្រ និងហ្វឹកហាត់បានច្បាស់លាស់។

 

កីឡាករមានវ័យ ១៩ឆ្នាំរូបនេះនិយាយថា៖«ការសិក្សា និងការហ្វឹកហាត់អត់លាយឡំគ្នាទេ។ ខ្ញុំហ្វឹកហាត់ពេលព្រឹក និងពេលថ្ងៃ អ៊ីចឹង!ខ្ញុំរៀនវេនយប់»។ ជាមួយនឹងអាជីពជាអ្នកប្រដាល់កីឡាករមានដើមកំណើតមកពីខេត្តស្វាយរៀង រូបនេះបញ្ជាក់ថារូបគេក៏បានជួយសម្រាលដល់បន្ទុកគ្រួសារផងដែរដោយទទួលបានប្រាក់ពីការប្រកួតយកទៅបង់ថ្លៃសាលាដោយខ្លួនឯង។

 

«ខ្ញុំគិតថាសមត្ថភាពខ្ញុំ នឹងកើនឡើង! យើងអាចរកចំណូលបានពីការប្រកួតដើម្បីផ្គត់ផ្គង់ការសិក្សាយើងដែរ»។ កីឡាករគុនខ្មែរសិស្សគុនក្លិបប្រដាល់ MR.LY គុនខ្មែរ និយាយដូច្នេះ។ យ៉ាងណាចំពោះភាពជោគជ័យរបស់កីឡាករគុនខ្មែរ លី វិបុលសេនា គឺកើតចេញពីការតស៊ូ និងជំនះរាល់ឧបសគ្គរបស់ខ្លួនគេផ្ទាល់ ហើយក៏មានអ្នកមានគុណទាំងពីរដែលបានជំរុញ និងលើកទឹកចិត្តរហូតគេមានថ្ងៃនេះផងដែរ។

 

កីឡាករចំណាកស្រុកមកកាន់ទឹកដីសៀមរាប រៀបរាប់ថា៖«ឪពុកម្តាយខ្ញុំគឺគាត់បានជំរុញខ្ញុំ ទាំងការលើកទឹកចិត្ត។ គាត់សប្បាយចិត្តពេលដែលឃើញខ្ញុំខិតខំប្រឹងប្រែងហ្វឹកហាត់»។ កីឡាករគុនខ្មែរ លី វិបុលសេនា បន្ថែមដូច្នេះ។

 

គួបញ្ជាក់ថា កីឡាករគុនខ្មែរ លី វិបុលសេនា វ័យ១៩ឆ្នាំជាសិស្សរៀនឆ្នាំទី២ នៃសាកលវិទ្យាល័យបៀលប្រាយ ខេត្តសៀមរាប។ បច្ចុប្បន្ន សេនា ហ្វឹកហាត់ប្រដាល់គុនខ្មែរនៅក្លិបប្រដាល់ MR.LY គុនខ្មែរ ស្ថិតនៅក្នុងសង្កាត់សាលាកំរើក ក្រុងសៀមរាប ខេត្តសៀមរាប៕