លោក សួង ណយ ប្រធានសហគមន៍កសិកម្មដូងក្រអូបកម្ពុជា និងជាអគ្គលេខាធិការរងគណៈកម្មការជាតិ ជំរុញចលនាភូមិមួយផលិតផលមួយ បានប្រាប់សារព័ត៌មានថ្មីៗនៅថ្ងៃទី១០ ខែសីហានេះថា ការពង្រីកទីផ្សារដូងទៅកាន់ចិន គឺជារឿងល្អ។ យ៉ាងណា លោក មើលឃើញថា បច្ចុប្បន្ន កម្ពុជាមិនទាន់មានដូងគ្រប់គ្រាន់សម្រាប់ការនាំចេញនោះទេ ព្រោះតែកម្ពុជាកំពុងនាំចូលពីថៃ និងវៀតណាម ដើម្បីបង្គ្រប់តម្រូវការនៅឡើយ។  
 

ក្នុងមួយថ្ងៃៗ កម្ពុជាបាននាំចូលដូងទុំ និងខ្ចីយ៉ាងតិច៥ម៉ឺនផ្លែ ពីថៃ និងវៀតណាម។ កម្ពុជាត្រូវការពេល ៣ទៅ៥ឆ្នាំទៀត ដើម្បីកសាងអ្នកដាំ ធ្វើយ៉ាងណាឱ្យបាន២លានដើម ទើបអាចបំពេញតម្រូវការក្នុងស្រុកបាន​។ បច្ចុប្បន្ន កម្ពុជាមានដូងក្រអូបប្រហែល១លានដើមប៉ុណ្ណោះ។ 
 

លោក សួង ណយ ប្រាប់ដូច្នេះថា៖«ការនាំទៅចិននេះ ខ្ញុំគិតថា អត់គ្រប់ទេ ព្រោះឥឡូវ អត់គ្រប់សម្រាប់ទីផ្សារក្នុងស្រុកយើងផង។ សព្វថ្ងៃនេះ យើងនៅនាំចូលពីថៃ ពីវៀតណាម នៅឡើយទេ ទាំងដូងទុំ និងខ្ចី»។    
 

ដូងក្រអូប កំពុងមានទីផ្សារល្អ ឯតម្លៃក៏ប្រសើរដែរ។ ដូងក្រអូបដែលលក់តាមចម្ការមួយផ្លែ មានតម្លៃចន្លោះពី១៥០០ ទៅ២៣០០ រៀល។  
 

សូមជម្រាបថា ដូងស្រស់កម្ពុជា​បានឈានដល់វាយតម្លៃហានិភ័យសមាសភាពចង្រៃសម្រាប់នាំចេញទៅចិនហើយ កាលពីថ្ងៃទី៧ ខែសីហា។ ការវាយតម្លៃនេះ ធ្វើឡើងតាមរយៈប្រព័ន្ធវីដេអូពីចម្ងាយ ដោយក្រុមការងារជំនាញនៃអគ្គរដ្ឋបាលគយចិន ក្រុមការងារជំនាញនៃអគ្គនាយកដ្ឋានកសិកម្ម និងនិងតំណាងស្ថានទូតចិនប្រចាំប្រទេសកម្ពុជា៕