កីឡាជាតិ
ជាតិ
កម្ពុជា បញ្ជូនអត្តពលិកគុនល្បុក្កតោ ៥រូប ទៅប្រកួតកីឡាយុទ្ធគុនអន្ដរជាតិ នៅកូរ៉េខាងត្បូង ប្រតិភូកីឡាគុនល្បុក្កតោ ចេញទៅប្រកួត Internationa Martial Art Contest រូបពី សហព័ន្ធគុនល្បុក្កតោកម្ពុជា
× លោក អ៊ូ តារា អគ្គលេខាធិការរងសហព័ន្ធកីឡាគុនល្បុក្កតោកម្ពុជា បានបញ្ជាក់ថា កម្ពុជា ក្នុងនាមជាសមាជិករបស់ World Martial Art Union តែងបញ្ជូនប្រតិភូកីឡា ចូលរួមកិច្ចប្រជុំប្រចាំឆ្នាំ របស់ស្ថាប័នយុទ្ធគុនអន្ដរជាតិនេះ។ អគ្គលេខាធិការរូបនេះ បន្ថែមទៀតថា ក្រៅអំពីកិច្ចប្រជុំប្រចាំឆ្នាំ សហព័ន្ធ ក៏ចូលរួមប្រកួតកីឡាយុទ្ធគុនអន្ដរជាតិ (International Martial Art Contest) ផងដែរ។ សម្រាប់ឆ្នាំ២០២៣ កម្ពុជា បញ្ជូន កីឡាករ-កីឡាការិនី ៥រូប ទៅប្រកួត ដើម្បីបង្ហាញពីក្បាច់គុន តំណាងអត្ដសញ្ញាណជាតិកម្ពុជា លើឆាកអន្ដរជាតិ។
កាលពីយប់ថ្ងៃ១៥ ខែសីហា ឆ្នាំ២០២៣ ប្រតីភូកីឡាគុនល្បុក្កតោកម្ពុជា បានចេញដំណើរទៅ ទីក្រុង ឃ្យុងយូរ ប្រទេសកូរ៉េខាងត្បូង ដើម្បីចូលរួមកិច្ចប្រជុំប្រចាំឆ្នាំរបស់ស្ថាប័នក្បាច់គុនអន្ដរជាតិ និងចូលរួមការប្រកួត International Martial Art Contest។ ការប្រកួត នឹងត្រូវចាប់ផ្ដើមពីថ្ងៃទី១៧-១៨ ខែសីហា ឆ្នាំ២០២៣។
លោក អ៊ូ តារា មានជំនឿចិត្តថា កីឡាករ-កីឡាការិនីកម្ពុជា អាចដណ្ដើមបានមេដាយណាមួយជូនប្រទេសជាតិ ព្រោះការចូលរួមកន្លងមកចាប់តាំងពីឆ្នាំ២០១៣ មក អត្ដពលិកកម្ពុជា ធ្វើបានល្អ។ «គុនល្បុក្កតោ ជាកីឡាតំណាងតំណាងអត្ដសញ្ញាណជាតិកម្ពុជា បានចូលជាសមាជិក World Martial Art Union តាំងពីឆ្នាំ២០២១៣។ ជារៀងរាល់ឆ្នាំ កីឡាករ-កីឡាការិនីកម្ពុជា តែងប្រកួតបានលទ្ធផលល្អ។ សហព័ន្ធ ក៏រំពឹងខ្ពស់ ព្រោះកីឡាករ-កីឡាការិនី មានសមត្ថភាពអាចដណ្ដើមបានមេដាយ ជូនជាតិបាន។»។ អគ្គលេខាធិការរងរូបនេះ បាននិយាយដូច្នេះ។
គួរបញ្ជាក់ផងដែរថា World Martial Art Union បច្ចុប្បន្ន មានសមាជិក ៧០ប្រទេស ដោយរាប់បញ្ចូលទាំងកម្ពុជា ផងដែរ៕
Tag:
គុនល្បុក្កតោ
អ៊ូ តារា
© រក្សាសិទ្ធិដោយ thmeythmey.com