«អ្វីដែលអ្នកនឹងឃើញនៅថ្ងៃ១៨ ខែសីហា គឺជាគំនិតផ្តួចផ្តើមដ៏មានមហិច្ឆិតាមួយដែលពង្រឹងការចូលរួមត្រីភាគីទាំងបច្ចុប្បន្នភាព និងនាពេលអនាគត»។ លោក Kurt Campbell និយាយបែបនេះ។ 

 

លោក Campbell បានបន្ថែមថា ភាគីទាំងបីនឹងស្វែងយល់ពីរបៀបពង្រីកកិច្ចសហប្រតិបត្តិការសន្តិសុខដែលត្រូវអនុវត្តដោយសេចក្ដីពិចារណា ប្រុងប្រយ័ត្ន និងការទទួលខុសត្រូវ។ លោក Campbell ដែលជាអ្នកសម្របសម្រួលគោលនយោបាយឥណ្ឌូ-ប៉ាស៊ីហ្វិកផងនោះ បានសរសើរពីភាពក្លាហានរបស់លោកប្រធានាធិបតីកូរ៉េខាងត្បូង យូន សុកយ៉ល និងនាយករដ្ឋមន្រ្តីជប៉ុនលោក គីស៊ីដា ហ្វូមីអូ ក្នុងការពង្រឹងទំនាក់ទំនងរវាងប្រទេសទាំងពីរដោយលោកចាត់ទុកជាប្រភេទការទូតដ៏អស្ចារ្យ។  

 

គួរបញ្ជាក់ថា កិច្ចប្រជុំកំពូលខាងមុខនេះនឹងដាក់ចេញគំនិតផ្តួចផ្តើមរួមគ្នាស្តីពីបច្ចេកវិទ្យា និងការការពារជាតិ ចំពេលដែលរដ្ឋទាំងបីមានការព្រួយបារម្ភរួមគ្នាអំពីចិន និងកូរ៉េខាងជើង។

 

ស្របជាមួយគ្នានេះ លោក ចូ បៃឌិនក៏សង្ឃឹមថាកិច្ចប្រជុំកំពូលនៅ Camp David នាពេលខាងមុខនេះនឹងពង្រឹងទំនាក់ទំនងរវាងប្រទេសទាំងបី ដ្បិតជប៉ុន និងកូរ៉េខាងត្បូងកំពុងតែព្យាយាមផ្សះផ្សាទំនាក់ទំនងការទូតរវាងប្រទេសទាំងពីរដែលបានដាច់រហែក នៅពេលប្រឈមមុខនឹងការគំរាមកំហែងក្នុងតំបន់កើនឡើង។

 

បច្ចុប្បន្ន ក្រុងវ៉ាស៊ីនតោនមានសន្ធិសញ្ញាការពារជាតិសមូហភាពដោយឡែកជាមួយក្រុងតូក្យូ និងក្រុងសេអ៊ូល។ ប៉ុន្តែក្រុងវ៉ាស៊ីនតោនចង់ឱ្យក្រុងតូក្យូ និងសេអ៊ូលធ្វើការកាន់តែជិតស្និទ្ធជាមួយគ្នា ដោយសារមានការព្រួយបារម្ភកាន់តែខ្លាំងឡើងអំពីអំណាច និងចេតនារបស់ចិន ក៏ដូចជាបញ្ហាកូរ៉េខាងដែរនោះ៕