កីឡាជាតិ
ជាតិ
លោក វ៉ាត់ ចំរើន ក្លាយជារដ្ឋលេខាធិការក្រសួងអប់រំ យុវជន និងកីឡា
× លោក វ៉ាត់ ចំរើន អគ្គលេខាធិការគណៈកម្មាធិការជាតិអូឡាំពិកកម្ពុជា (NOCC) ត្រូវបានព្រះមហាក្សត្រត្រាស់បង្គាប់តែងតាំងជារដ្ឋលេខាធិការក្រសួងអប់រំ យុវជន និងកីឡា ក្នុងអាណត្តិទី៧។ នេះបើតាមព្រះរាជក្រឹត្យចុះព្រះហស្តលេខាដោយសម្ដេចព្រះបរមនាថ នរោត្តម សីហមុនី នៅថ្ងៃទី២២ សីហា។
លោកវ៉ាត់ ចំរើន អគ្គលេខាធិការគណៈកម្មាធិការជាតិរៀបចំការប្រកួតកីឡាស៊ីហ្គេម-អាស៊ានប៉ារ៉ាហ្គេមឆ្នាំ២០២៣ ត្រូវបានផ្ទេរចេញពីតំណែងរដ្ឋលេខាធិការក្រសួងទេសចរណ៍ ទៅកាន់តំណែងរដ្ឋលេខាធិការក្រសួងអប់រំ យុវជន និងកីឡា វិញ សម្រាប់អាណត្តិទី៧ ក្រោមការដឹកនាំរបស់រដ្ឋាភិបាលថ្មីលោក ហ៊ុន ម៉ាណែត។
អគ្គលេខាធិការ NOCC រូបនេះ បានបង្ហាញស្នាដៃជាច្រើនក្នុងការដឹកនាំវិស័យកីឡាកម្ពុជារយៈពេលច្រើនឆ្នាំមកហើយ ជាពិសេសការដឹកនាំព្រឹត្តិការណ៍កីឡាអាស៊ីអាគ្នេយ៍លើកទី៣២ ជាប្រវត្តិសាស្ត្រលើកដំបូងរបស់ខ្មែរ។
បើតាមព្រះរាជក្រឹត្យរបស់ព្រះមហាក្សត្រ ក្នុងអាណត្តិទី៧នេះ លោក វ៉ាត់ ចំរើន ស្ថិតក្នុងចំណោមរដ្ឋលេខាធិការចំនួន១៤រូបរបស់ក្រសួងអប់រំ យុវជន និងកីឡា និងអនុរដ្ឋលេខាធិការ២០រូបផ្សេងទៀត ក្រោមការដឹកនាំរបស់លោក ហង់ជួន ណារ៉ុន ដែលត្រូវបានតែងតាំងជារដ្ឋមន្ត្រីក្រសួងអប់រំដដែល ក្នុងអាណត្តិទី៧នេះ៕
Tag:
លោក វ៉ាត់ ចំរើន
NOCC
© រក្សាសិទ្ធិដោយ thmeythmey.com