លោក ឡុង កុសល អគ្គនាយករង អាជ្ញាធរជាតិអប្សរា បានថ្លែងថា ក្រោយក្រុមការងារជួសជុល បានបញ្ចប់គម្រោងជួសជុលស្ពានហាលជាស្ថាពរ អាជ្ញាធរជាតិអប្សរា នឹងបើកឱ្យទេសចរដើរតាមស្ពានហាលអង្គរឡើងវិញ។ ជាមួយគ្នានេះ ស្ពានបណ្ដែតទឹកបណ្ដោះអាសន្ន ក៏ត្រូវរក្សាទុកដដែល។ 

 

ស្ពានហាលអង្គរ មិនមានបង្កាន់ដៃសម្រាប់ការពារសុវត្ថិភាពនោះទេ។ បញ្ហានេះ អាជ្ញាធរជាតិអប្សរា នឹងដោះស្រាយ ដោយធ្វើយ៉ាងណាមិនឱ្យប៉ះពាល់ដល់សម្រស់ និងមានហានិភ័យដល់ស្ពានបុរាណនោះទេ។ អាជ្ញាធរជាតិអប្សរា នឹងធ្វើអ្វីមួយ ដើម្បីការពារសុវត្ថិភាពដល់ទេសចរ ជាពិសេសកុមារតូចៗ។ 

 

«ពេលខ្លះទេសចរ អណ្ដែតអារម្មណ៍ជាមួយប្រាង្គប្រាសាទ ដែលអាចមានហានិភ័យ ដោយចៃដន្យ។ ដូច្នេះ យើង នឹងត្រូវរៀបចំឱ្យមានរបាអ្វីមួយ ដើម្បីបង្ហាញ ឬរម្លឹក ដល់ភ្ញៀវទេសចរ ឱ្យមានការប្រុងប្រយ័ត្ន។ យើង ត្រូវធ្វើយ៉ាងណា មិនឱ្យប៉ះពាល់សោភ័ណ្ឌភាព និងភ្នែក របស់ទេសចរ នោះទេ»។ លោក ឡុង កុសល ថ្លែងដូច្នេះនៅលើស្ពានហាលអង្គរ ក្នុងបទសម្ភាសជាមួយសារព័ត៌មានថ្មីៗ។ 

 

សូមរម្លឹកថា ស្ពានហាលអង្គរ ត្រូវបានផ្អាកដំណើរការឆ្នាំ២០១៦ ដើម្បីដំណើរការជួសជុល ដោយអាជ្ញាធរជាតិអប្សរាបានរៀបចំឱ្យមានស្ពានបណ្ដែតទឹកជំនួសវិញ៕