«គ្រួសារសុខសាន្ត» រដូវកាលទី២ រឿងទូរទស្សន៍ដែលបង្ហាញពីវិធីសាស្ត្រ ដោះស្រាយបញ្ហាយុវជន

ជាតិ

«គ្រួសារសុខសាន្ត» រដូវកាលទី២ រឿងទូរទស្សន៍ដែលបង្ហាញពីវិធីសាស្ត្រ ដោះស្រាយបញ្ហាយុវជន

28, Aug 2023 , 2:09 pm

រូបភាព

ដោយ: ប៉ូ សាគុន

“គ្រួសារសុខសាន្ត” ជារឿងតាមទូរទស្សន៍ ដែលផ្ដល់នូវព័ត៌មាន និងបំផុសឱ្យមានការពិភាក្សា ពីមធ្យោបាយ ដែលយុវជនអាចធ្វើសកម្មភាព ដើម្បីរួមចំណែកជាវិជ្ជមាន ដល់ការអភិវឌ្ឍន៍សហគមន៍។ រឿងនេះ ក៏បានបង្ហាញពីគំរូភាព ចរិតលក្ខណៈទាំងវិជ្ជមាន និងអវិជ្ជមាន ដែលអាចជួយកសាងទំនុកចិត្ត លើកទឹកចិត្ត និងជំរុញឱ្យមានការផ្លាស់ប្ដូរ អាកប្បកិរិយា របស់ទស្សនិកជន ផងដែរ។

រឿង “គ្រួសារសុខសាន្តរដូវកាលទី២” (Soksan Family 2) បានចាប់ផ្ដើមចាក់បញ្ចាំងជាផ្លូវការ លើកដំបូងលើទូរទស្សន៍ CBS ចាប់ផ្ដើមពីយប់ថ្ងៃសុក្រ ទី២៥ ខែសីហា។ ផ្អែកលើការសិក្សាស្រាវជ្រាវស៊ីជម្រៅ និងការធ្វើតេស្ដបឋមជាមួយក្រុមគោលដៅ “រឿងគ្រួសារសុខសាន្ត” ត្រូវបានផលិតចេញ ជាសាច់រឿងភាគ ដែលបង្ហាញពីវិធីសាស្ត្រក្នុងការដោះស្រាយបញ្ហាតាមបែប កម្សាន្ត កំប្លែង និងមានភាពទាក់ទាញ។

វិធីសាស្ត្រ និងទម្រង់នៃការផលិត ចរិតលក្ខណៈរបស់តួអង្គ និងសាច់រឿង ត្រូវបានរៀបចំឡើង ដើម្បីឆ្លើយតបទៅនឹងស្ថានភាពជាក់ស្ដែង របស់ក្រុមគោលដៅ និងជំរុញឱ្យមានការផ្លាស់ប្ដូរ រួមទាំងបង្កើនការចូលរួមរបស់យុវជន ដូចដែលបានរកឃើញ ពីការសិក្សាស្រាវជ្រាវស៊ីជម្រៅ និងគោលបំណងនៃគម្រោងនេះ។ កម្មវិធីទូរទស្សន៍ “គ្រួសារសុខសាន្ត វគ្គ១” ដែលបានចាក់ផ្សាយក្នុងឆ្នាំ២០២២ ឆ្លុះបញ្ចាំងពីជីវិតរស់នៅក្នុងសង្គម របស់គ្រួសារមួយ តាមរយៈតួអង្គសម្ដែង ពូសុខ មីងសាន្ត និងកូនៗរបស់ពួកគាត់ បានរំលេចពីភាពចម្រូងចម្រាសភាពតានតឹងក្នុងគ្រួសារ សម្ពាធសង្គម និងបញ្ហាប្រឈមនានា ក្នុងជីវិតបែបសម័យទំនើប។

ទោះបីឪពុករបស់តួអង្គក្ដឹបអំពិល មិនបានមើលឃើញពីមហិច្ឆតារបស់នាង ក្នុងការចូលរួមការងារអភិវឌ្ឍសហគមន៍ក៏ដោយ ក្ដឹបអំពិលបានយកឈ្នះផ្នត់គំនិតរបស់ឪពុកនាង ប្រកបដោយភាពប៉ិនប្រសប់ ការតស៊ូ និងការខិតខំប្រឹងប្រែង។ សន្តិភាពនៅក្នុងគ្រួសារមួយនេះ មិនបានយូរប៉ុន្មានផង ក្ដឹបអំពិលក៏ឈានចូលដល់វ័យ១៨ឆ្នាំ ស្របពេលជាមួយគ្នានោះ ស្រាប់តែមានតួអង្គថ្មីម្នាក់ទៀត ដែលជាភ្ញៀវមិនបានអញ្ជើញ ក៏បានចូលមករស់នៅ ក្នុងផ្ទះរបស់គ្រួសារសុខសាន្តនេះ នោះគឺតួអង្គលោកយាយ។

វត្តមានរបស់តួអង្គនេះ នឹងបង្កឱ្យមានភាពចម្រូងចម្រាស និងភាពតានតឹងនៅក្នុងគ្រួសារនេះជាថ្មី ដោយបង្ហាញពីភាពខុសជំនាន់គ្នា ហើយគ្រប់យ៉ាងត្រូវតែតម្រូវចិត្តតួអង្គនេះ ដែលប្រៀបដូចជាកូនក្មេង ដែលកំពុងស្វែងរកពិភពរបស់ពួកគេ។

កម្មវិធីទូរទស្សន៍ “គ្រួសារសុខសាន្ត” គឺជាផ្នែកមួយនៃគម្រោង”ក្លាហាន៩ ស្ប៉េស” (Klahan 9 SPACE) ដែលមានគោលបំណង គាំទ្រយុវជនកម្ពុជា ក្នុងការចូលរួម ក្នុងសកម្មភាពសាធារណៈ និងការសម្រេចចិត្តតាមរយៈ ការអភិវឌ្ឍន៍ជំនាញ ចំណេះដឹង ទំនុកចិត្ត ការជំរុញទឹកចិត្ត និងការចងបណ្ដាញ ដែលមានសារៈសំខាន់ ក្នុងការចូលរួមចំណែកអភិវឌ្ឍសហគមន៍របស់ពួកគេ ព្រមទាំងផ្លាស់ប្ដូរនូវអាកប្បកិរិយាជាអវិជ្ជមាន លើសមត្ថភាពយុវជន។ រឿង “គ្រួសារសុខសាន្ត” ត្រូវបានផលិតឡើង ដោយផ្ដោតលើក្រុមគោលដៅ ដែលជាយុវជន និងឪពុកម្ដាយ។

គម្រោងនេះ ទទួលបានការគាំទ្រផ្នែកហិរញ្ញវត្ថុ ពីស្ថានទូតស៊ុយអែតប្រចាំប្រទេសកម្ពុជា (Sida) និងភ្នាក់ងារស្វីស សម្រាប់ការអភិវឌ្ឍ និងកិច្ចសហប្រតិបត្តិការ (SDC)៕