Evergrande Group ដែលជាក្រុមហ៊ុនអភិវឌ្ឍន៍អចលនទ្រព្យចិនជំពាក់បំណុលគេបំផុតនៅលើពិភពលោកបានប្រកាសថា ខ្លួនបានរងការខាតបង់ខ្លាំងនៅឆមាសទីមួយឆ្នាំនេះ។ 

 

ក្រុមហ៊ុន Evergrande បានរាយការណ៍ពីការខាតបង់សុទ្ធចំនួន ៣៣ពាន់លានយ័ន (៤,៥៣ពាន់លានដុល្លារ) ក្នុងអំឡុងខែមករាដល់ខែមិថុនា ដែលទាបជាងចំនួន ៦៦,៤ពាន់លានយ័ន(៩,១១ពាន់លានដុល្លារ) ក្នុងរយៈពេលដូចគ្នាកាលពីឆ្នាំមុន។

 

នៅក្នុងឯកសារដែលបានដាក់ជូននិយតករកាលពីថ្ងៃទី ២៧ ខែសីហា ក្រុមហ៊ុន Evergrande ប្រាក់ចំណូលរបស់ខ្លួននៅក្នុងឆមាសទីមួយឆ្នាំនេះ បានកើនឡើង ៤៤ភាគរយ បើធៀបគ្រាដូចគ្នាកាលពីឆ្នាំមុន ដែលកើនដល់ ១២៨,២ពាន់លានយ័ន(ជិត ១៨ពាន់លានដុល្លារ)​ ដោយសារតែក្រុមហ៊ុនរៀបចំគម្រោងបន្តការលក់ និង ចាប់យកឱកាសរីកចម្រើនក្នុងរយៈពេលខ្លីនៅទីផ្សារអចលនទ្រព្យដែលចាប់ផ្តើមកាលពីដើមឆ្នាំនេះ។

 

ប្រាក់ចំណេញដែលបានចេញផ្សាយកាលពីខែមុនបានបង្ហាញថាក្រុមហ៊ុន Evergrande បានកត់ត្រាការខាតបង់សរុបចំនួន ៨១ពាន់លានដុល្លារក្នុងឆ្នាំ ២០២១ និង២០២២ ខណៈដែលប្រាក់ចំណេញទទួលបានត្រឹមតែ ៨,១ពាន់លានយ័នក្នុងឆ្នាំ២០២០ ។

 

កាលពីថ្ងៃទី១៧ ខែសីហា ក្រុមហ៊ុន China Evergrande Group ដែលធ្លាប់ជាក្រុមហ៊ុនអចលនទ្រព្យធំទីពីររបស់ចិន​ បានដាក់ពាក្យសុំការការពារការក្ស័យធននៅអាម៉េរិក ខណៈដែលវិស័យអចលនទ្រព្យនៅចិនកំពុងជួបវិបត្តិធ្ងន់ធ្ងរ។

 

China Evergrande គឺជាការចាប់ផ្តើមនៃវិបត្តិនៃវិស័យអចលនទ្រព្យរបស់ចិន។ ចាប់តាំងពីចុងឆ្នាំ ២០២១មក ចិនបានមើលឃើញការបរាជ័យជាបន្តបន្ទាប់ចំពោះគម្រោងលំនៅឋានដែលមិនទាន់បញ្ចប់ជាច្រើន ខណៈអ្នកផ្គត់ផ្គង់មិនទាន់បានបង់ប្រាក់។

 

ក្នុងពេលជាមួយគ្នានេះ ក្រុមហ៊ុនអភិវឌ្ឍន៍អចលនទ្រព្យដ៏ធំបំផុតរបស់ចិន Country Garden ដែលខកខានមិនបានបង់ថ្លៃប័ណ្ណបំណុលជាប្រាក់ដុល្លារបានលើកឡើងពីការព្រួយបារម្ភអំពីការរីករាលដាលនៃវិបត្តិនៅក្នុងវិស័យអចលនទ្រព្យនៅបរទេស ធ្វើឱ្យសកម្មភាពផលិតកម្មចុះខ្សោយ និងការកើនឡើងភាពអត់ការងារធ្វើ៕