នៅថ្ងៃទី៧ ខែកញ្ញា ម៉ោង ៧ យប់ កម្ពុជា ត្រូវស្វាគមន៍ ហុងកុង នៅពហុកីឡដ្ឋានជាតិអូឡាំពិក ក្នុងជំនួបមិត្តភាពអន្ដរជាតិ។ ៤ថ្ងៃបន្ទាប់ ពោលនៅថ្ងៃទី១១ ខែកញ្ញា វេលាម៉ោង ដដែរ គោព្រៃកម្ពុជា ត្រូវជួបជាមួយ ម៉ាកាវ។ ទាំងពីរប្រកួតនេះ ដើម្បីកម្ពុជា ហុងកុង និងម៉ាកាវ កម្តៅសាច់ដុំ ត្រៀមប្រកួតជម្រុះ FIFA World Cup ឆ្នាំ២០២៦ ក្នុងតំបន់អាស៊ី។ 
 

ការជាប់ជាក្រុមជម្រើសជាតិកម្ពុជា គឺជាក្ដីសុបិនរបស់កីឡាករបាល់ទាត់គ្រប់រូប ប៉ុន្ដែ​ កីឡាករ ដែលជាប់ក្រុមជម្រើសជាតិ មិនបានឱកាសនោះ ដោយសំណាង ឬចៃដន្យទេ គឺបានមកដោយការប្រឹងប្រែង និងសមត្ថភាព។ ចំណែក ចន្ទាកា អតីតកីឡាករ Futsal ក៏មានក្ដីសុបិនដូចជាកីឡាករផ្សេងទៀតដែរ គឺចង់ជាប់ជាមួយក្រុមជម្រើសជាតិ ប្រកួតក្នុងព្រឹត្តិការណ៍អន្ដរជាតិ។
 

កីឡាករវ័យ ២៣ឆ្នាំរូបនេះ បានប្រាប់សារព័ត៌មានថ្មីៗតាមហ្វេសប៊ុកថា រូបគេ ពិតជាសប្បាយចិត្ត ដោយក្ដីស្រម៉ៃចង់ជាប់ជាមួយក្រុមជម្រើសជាតិកម្ពុជា បានសម្រេច។ ជាមួយនិងការសម្រេចក្ដីសុបិន ខ្សែប្រយុទ្ធរូបនេះ​ ប្ដេជ្ញាថា នឹងប្រឹងប្រែងអស់ពីសមត្ថភាព មិនឲ្យគ្រូបង្វឹក និងអ្នកគាំទ្រទាំងអស់ ខកចិត្តចំពោះការលេងនៅលើទីលានរបស់ខ្លួន និងមិត្តរួមក្រុមផ្សេងទៀត។
 

«ខ្ញុំ មិននឹកស្មានថា បានជាប់ជាមួយក្រុមជម្រើសជាតិ ខ្ញុំ ពិតជារំភើបខ្លាំងណាស់ ព្រោះពីមុនមកខ្ញុំ មិនដែលមានឱកាសបែបនេះទេ។ នេះ គឺជាលើកដំបូងរបស់ខ្ញុំ ដែលលេងតំណាងឲ្យប្រទេសជាតិ។ ខ្ញុំ នឹងប្រឹងប្រែងលេងឲ្យបានល្អ ដើម្បីឲ្យគ្រូ​បង្វឹក មិត្តរួមក្រុម និងអ្នកគាំទ្រទាំងអស់ពេញចិត្ត ការលេងរបស់ខ្ញុំ។»។ ខ្សែប្រយុទ្ធដែលកំពុងលេចធ្លោក ក្រោយរកបាន២គ្រាប់ ជួយបឹងកេត ឈ្នះវិសាខា បាននិយាយដូច្នេះ។

 

គួរបញ្ជាក់ផងដែរថា កីឡាករ ចន្ថា ចន្ទាកា បានប្រឡូកក្នុងវិស័យបាល់ទាត់ ចាប់ពីឆ្នា២០០៦ ប៉ុន្ដែជាកីឡាករ លេងបាល់ Futsal។ នៅអំឡុងឆ្នាំ២០១៨ កីឡាកររូបនេះ ​បានជាប់ជម្រើសជាតិ Futsal។ លុះចូលដល់ឆ្នាំ ២០១៩ ចន្ទាកា បានចូលរួមជាមួយ ក្រុមអគ្គិសនីកម្ពុជា ហើយបានជួយឲ្យក្រុមនេះ ក្លាយជាម្ចាស់ជើងឯកលីគ២ កម្ពុជា នៅរដូវកាល២០២២។ បច្ចុប្បន្ន ឆ្នាំ២០២៣ ខ្សែប្រយុទ្ធវ័យ ២៣ ឆ្នាំរូបនេះ បានចូលរួមជាមួយក្លិបបឹងកេត ហើយក៏ដើរតួសំខាន់ នៅតំបន់ប្រយុទ្ធ ផងដែរ៕