ក្រុមចំនួន ៥ មកពីចក្រភពអង់គ្លេស កំពុងទន្ទឹងរង់ចាំមើលដៃគូប្រកួតប្រជែង នៅក្នុងវគ្គចែកពូលនៃការប្រកួតពានរង្វាន់ក្លិបបាល់ទាត់កំពូលតំបន់អឺរ៉ុប UEFA Champions League រដូវកាល ២០២៣-២៤។ ការចាប់ឆ្នោតវគ្គចែកពូល UCL នឹងធ្វើឡើងនៅថ្ងៃទី៣១ ខែសីហា នាទីក្រុងម៉ូណាកូ វេលាម៉ោង ១១យប់ (ម៉ោងនៅកម្ពុជា)។
ម្ចាស់ការពារតំណែងជើងឯក Manchester City នឹងស្ថិតនៅក្នុងក្រឡក្រុមជើងជើងឯកមកពីលីគកំពូលនីមួយៗ ក្នុងតំបន់អឺរ៉ុប ខណៈ Manchester United, Arsenal និង Newcastle ជាក្រុមអង់គ្លេសមកពីក្របខណ្ឌ Premier League ដែលត្រូវបង្ហាញខ្លួនប្រកួតប្រជែង។
Newcastle បង្ហាញខ្លួនក្នុងក្របខណ្ឌ Champions League វគ្គចែកពូលចុងក្រោយបង្អស់នៅឆ្នាំ ២០០២-០៣ ខណៈដែលក្រុមកាំភ្លើងធំ Arsenal នឹងបង្ហាញខ្លួនវិញ ចាប់តាំងពីឆ្នាំ ២០១៦-១៧។
ក្រុមជើងឯកលីគកំពូលស្កុតឡែន Celtic ក៏ត្រូវស្ថិតក្នុងការចាប់ពូលប្រកួតប្រជែងពានរង្វាន់ Champions League ដោយក្រុមស្ថិតក្នុងចក្រភពអង់គ្លេសមួយនេះ អាចត្រូវជួបក្រុម Arsenal ឬក៏ក្រុមមួយមកពីទីក្រុង Manchester។
ក្រុមទាំង ៣២ នឹងត្រូវបែកចែកចេញពី ៨ពូល ដោយក្នុងមួយពូលមាន ៤ក្រុម ត្រូវប្រកួតប្រជែងតាមពូលនីមួយ ។ ក្រុមដែលមកពីប្រទេសដូចគ្នា នឹងមិនអាចស្ថិតក្នុងការប្រកួតប្រជែងពូលតែមួយបានឡើយ។ អេស្ប៉ាញមានក្រុមចំនួន ៥ នៅក្នុងការប្រកួតប្រជែង UCL ដោយក្រុម Sevilla បានក្លាយជាជើងឯក Europa League ហើយឈ្នះសំបុត្រការប្រកួត មិនមែនតាមរយៈឈ្នះសំបុត្រពីការប្រជែងលីគឡើយ។
សម្រាប់សមាភាពក្រុមមកពីអាល្លឺម៉ង់វិញ ក្រុម Union Berlin នឹងបង្ហាញខ្លួនលើកដំបូងបំផុតនៅក្នុងពានរង្វាន់ UCL ខណៈដែលក្រុមជើងលីគកំពូលអ៊ុយក្រែន Shakhtar Donetsk នឹងត្រូវបន្តការប្រកួតរបស់ខ្លួននៅក្នុងទីក្រុង Humburg ប្រទេសអាល្លឺម៉ង់ដដែល ព្រោះតែបញ្ហាសង្គ្រាមក្នុងប្រទេសអ៊ុយក្រែន មិនទាន់ថមថយ។
ទោះយ៉ាងណា ការប្រកួតដែលមានរចនាសម្ព័ន្ធទម្រង់ការប្រកួតវគ្គចែកពូលនេះ នឹងត្រូវបញ្ចប់ត្រឹមរដូវកាល ២០២៣-២៤ នេះ ដោយចាប់ពីរដូវកាល ២០២៤-២៥ ទៅ ការប្រកួត UEFA Champions League មានការកើតឡើងដល់ទៅ៣៦ក្រុម ហើយចាប់ឱ្យស្ថិតក្នុងលីគតែមួយរួមគ្នាតែម្តង សម្រាប់ប្រជែងដណ្តើមកៅអីវគ្គ១៦ក្រុម។
ពីឆ្នាំ ២០២៤ ក្រុមណាដែលបញ្ចប់ចំណាត់កំពូលពីលេខ១ដល់៨នឹងត្រូវឆ្លងទៅវគ្គជម្រុះ ១៦ក្រុម ដោយស្វ័យប្រវត្តិ ។ចំណែកក្រុមដែលមានចំណាត់ថ្នាក់ពីលេខ ៩ ដល់ ២៤ នឹងត្រូវប្រជែង Playoffs ដណ្តើមកៅអីវគ្គ ១៦ក្រុម ដោយការប្រកួតធ្វើឡើងចំនួន ២ជើងទៅវិញទៅមក។
ខាងក្រោមនេះជាក្រុមដែលបានបែងចែកទៅតាមក្រឡចំនួន ៤ ត្រៀមសម្រាប់ចាប់ឆ្នោតវគ្គចែកពូល ៖
ក្រឡទីមួយ ៖ Manchester City (ការពារតំណែងជើងឯក UCL), Sevilla (ម្ចាស់ពាន Europa League), Barcelona (ជើងឯក La Liga), Napoli (ជើងឯក Serie A), Bayern Munich (ជើងឯក Bundesliga), Paris Saint Germain (ជើងឯក Ligue 1) និង Feyenoord (ជើងឯក Edivision1)
ក្រឡទីពីរ ៖ Real Madrid, Manchester United, Inter Milan, Borussia Dortmund, Atletico Madrid, RB Leipzig, Porto និង Arsenal
ក្រឡទីបី ៖ Shakhtar Donetsk, Salzburg, Milan, Braga, PSV Eindhoven, Lazio, Red Star Belgrade, FC Copenhagen
ក្រឡទីបួន ៖ Young Boys, Real Sociedad, Galatasaray, Celtic, Newcastle United, Union Berlin, Royal Antwerp និង RC Lens៕