Haaland បានជួយ Man City ដែលមានលោក Pep Guardiola ជាអ្នកចាត់ការ ឈ្នះជើងឯក UEFA Champions League ព្រមទាំង Premier League និង FA Cup ក្នុងរដូវកាលជាមួយគ្នា។ ខ្សែប្រយុទ្ធអន្តរជាតិន័រវែស វ័យ២៣ឆ្នាំ អាចរកបានគ្រាប់បាល់ស៊ុតបញ្ចូលទីដល់ទៅ៥២គ្រាប់ ក្នុងការបង្ហាញខ្លួនសរុបទាំង៥៣ប្រកួតរដូវកាលមុន។
 

Haaland ជាកីឡាកររកបានគ្រាប់បាល់ច្រើនជាងគេទាំងនៅ ក្របខណ្ឌអឺរ៉ុប​ចំនួន១២គ្រាប់ និងក្នុងលីគកំពូលអង់គ្លេសចំនួន៣៦គ្រាប់ ដែលជាកំណត់ត្រាច្រើនជាគេបំផុត។
  

តាមរយៈសមិទ្ធផលនេះ UEFA បានសម្រេចផ្តល់ពានកីឡាករឆ្នើមប្រចាំទ្វីបអឺរ៉ុបទៅឱ្យ Haaland ដោយប្រជែងឈ្នះ De Bruyne និង Messi នាកម្មវិធីចាប់ឆ្នោតរើសពូល Champions League នៅប្រទេសមូណាកូ នារាត្រីថ្ងៃទី៣១ ខែសីហា។ 
 

សម្រាប់ពានគ្រូវបង្វឹកឆ្នើមបានទៅលោក Guardiola។ អ្នកចាត់ការសញ្ជាតិអេស្ប៉ាញរូបនេះ ជួយមេឃខៀវឈ្នះជើងឯកអឺរ៉ុបលើកដំបូង ក្រោយខកចិត្តនៅប៉ុន្មានរដូវកាលចុងក្រោយ។
  

កីឡាការិនីឆ្នើមប្រចាំឆ្នាំ (Women's Player of the Year) បានទៅ Aitana Bonmati ខ្សែបម្រើ Barcelona ដែលជួយក្រុមនារីអេស្ប៉ាញឈ្នះជើងឯក FIFA World Cup ឆ្នាំ២០២៣ នៅអូស្ត្រាលី និងនូវែលសេឡង់។
 

សម្រាប់គ្រូបង្វឹកស្ត្រី (Women's Coach of the Year award) បានទៅអ្នកស្រី Sarina Wiegman គ្រូបង្វឹកក្រុមជម្រើសជាតិនារីអង់គ្លេស បើទោះក្រុមរហស្សនាមតោកំណាច បានត្រឹមរងជើងឯក World Cup ក្រោយចាញ់អេស្ប៉ាញវគ្គផ្តាច់ព្រ័ត្រ ១-០៕