អភិបាលរងរាជធានីភ្នំពេញ ស្នងការរងរាជធានីភ្នំពេញ និងមន្ត្រីក្រសួងសេដ្ឋកិច្ច បានចុះប្រគល់ម៉ូតូ២៦២គ្រឿង ដល់ម្ចាស់ដើមដែលមានឯកសារ​គ្រប់គ្រាន់វិញ កាលព្រឹកថ្ងៃទី៧កញ្ញា។ ម៉ូតូទាំងនេះ គឺ លោក ឃ្លាំង ហួត បានរឹបអូស ពីឃ្លាំងបញ្ចាំនាពេលកន្លងមក។  

 

ហេតុនេះ លោក ឃ្លាំង ហួត អំពាវនាវ ឱ្យពលរដ្ឋដែលបាត់ ដាក់ពាក្យបណ្ដឹង ដើម្បីសមត្ថកិច្ចជួយស្វែងរក។ លោកសរសេរលើហ្វេសប៊ុកបែបនេះ៖ «ខ្ញុំសូមអំពាវនាវដល់បងប្អូនប្រជាពលរដ្ឋ​ ដែលជាអ្នកបានដាក់បញ្ចាំស្របច្បាប់ក្ដី​ ឬជនរងគ្រោះដែលបាត់ម៉ូតូក្ដី​ មេត្តារូសរាន់មកដាក់ពាក្យបណ្ដឹង​ស្នើសុំម៉ូតូបន្ថែម តាមរយៈការិយាល័យព្រហ្មទណ្ឌកម្រិតស្រាល នៃស្នងការដ្ឋានរាជធានីភ្នំពេញ​ ដើម្បីឆាប់បានក្រុមការងារបន្តនីតិវិធីលើម៉ូតូដែលសេសសល់ផ្សេងទៀត»។ 
 

ក្នុងប្រតិបត្តិការ ចុះរឹបអូសម៉ូតូកន្លងមក លោក ឃ្លាំង ហួត បានដកហូតម៉ូតូជាង១,០០០គ្រឿង ពីឃ្លាំងបញ្ចាំក្នុងរាជធានីភ្នំពេញ។ ហើយលោកក៏បានប្រគល់ ទៅពលរដ្ឋវិញ ជាហូរហែដែរ។ ចំនួនម៉ូតូនៅសល់ពីការរឹបអូស មានប្រមាណ៩០០គ្រឿងទៀត ដែលទុកនៅឃ្លាំង OCIC រង់ចាំពលរដ្ឋទៅពិនិត្យនិងស្នើសុំយកទៅវិញ។ 

 

កន្លងមក លោក ឃ្លាំង ហួត អះអាងថា ប្រតិបត្តិការចុះត្រួតពិនិត្យមើលទីតាំងឃ្លាំងបញ្ចាំ គឺធ្វើជាប់ជាប្រចាំដូចភ្លៀងរលឹម៕