ដោយ៖ ងួនសៅ ពុទ្ធិឫទ្ធិ 

 

 

នៅក្នុងដំណើរទស្សនកិច្ចលើកដំបូងរបស់មេដឹកនាំអូស្ត្រាលីទៅកាន់ហ្វីលីពីនក្នុងរយៈពេល២០ឆ្នាំនេះ នាយករដ្ឋមន្ត្រីអូស្ត្រាលី លោក អាន់ថូនី អាល់បានីស បានចុះហត្ថលេខាលើកិច្ចព្រមព្រៀងភាពជាដៃគូយុទ្ធសាស្ត្រជាមួយប្រធានាធិបតីហ្វីលីពីនលោក Ferdinand Marcos Jr.។ 

 

«អូស្ត្រាលីកំពុងធ្វើការជាមួយដៃគូរបស់យើង រាប់បញ្ចូលទាំងហ្វីលីពីនដើម្បីបង្កើតរក្សាអធិបតេយ្យភាពនៅក្នុងតំបន់មួយនេះ»។ លោក អាល់បានីស បានសង្កត់ធ្ងន់បែបនេះ នៅថ្ងៃទី៨ ខែសីហា។ 

 

ជាមួយគ្នានេះ មេដឹកនាំអូស្ដ្រាលីរូបនេះក៏បានពិភាក្សាអំពីការបន្តការល្បាតរួមរបស់កងទ័ពជើងទឹក ហើយក៏បានគាំទ្រលើសេចក្តីសម្រេចអាជ្ញាកណ្តាលឆ្នាំ២០១៦លើបញ្ហាសមុទ្រចិនខាងត្បូងដែលធ្វើឱ្យការទាមទាររបស់ចិនលើផ្លូវទឹកជាយុទ្ធសាស្ត្រដែលមានតម្លៃប្រហែល៣ពាន់ពាន់លានដុល្លារនៃពាណិជ្ជកម្មឆ្លងតាមកប៉ាល់ក្នុងមួយឆ្នាំៗទៅជាមោឃៈ។

 

ជាការឆ្លើយតប លោកMarcos Jr. បានបញ្ជាក់ពីទំនាក់ទំនងយ៉ាងជិតស្និទ្ធរវាងអូស្រ្តាលី និងហ្វីលីពីនថា វាពិតជាសំខាន់ណាស់ផងដែរ។ 

 

បន្ថែមពីលើនេះ លោក អាល់បានីស ក៏បានបញ្ជាក់កាលពីថ្ងៃទី៧ ខែកញ្ញាថា លោកនឹងធ្វើទស្សនកិច្ចទៅកាន់ចិននៅចុងឆ្នាំនេះ ហើយវាក៏ជាដំណើរទស្សនកិច្ចលើកដំបូងរបស់មេដឹកនាំអូស្ត្រាលីចាប់តាំងពីឆ្នាំ២០១៦មក។

 

គួរបញ្ជាក់ថា ពាណិជ្ជកម្មភាគច្រើនរបស់អូស្ត្រាលីគឺឆ្លងកាត់សមុទ្រចិនខាងត្បូង ដែលហ្វីលីពីន ម៉ាឡេស៊ី វៀតណាម ប្រ៊ុយណេ និងតៃវ៉ាន់ កំពុងតែទាមទារតំបន់មួយចំនួននៃសមុទ្រចិនខាងត្បូងនេះ៕