លោក ផាម មិញឈិញ នាយករដ្ឋមន្រ្តីវៀតណាម នៅថ្ងៃទី៩ ខែកញ្ញា បានជួបជាមួយលោក John Kerry ប្រេសិតពិសេសរបស់ប្រធានាធិបតីអាម៉េរិកទទួលបន្ទុកលើកិច្ចការបម្រែបម្រួលអាកាសធាតុ នៅក្រុងហាណូយ ពោលគឺមួយថ្ងៃមុនដំណើរទស្សនកិច្ចផ្លូវការរបស់លោកចូ បៃឌិន ប្រធានាធិបតីអាម៉េរិក នៅប្រទេសអាស៊ីអាគ្នេយ៍មួយនេះ។ 

 

ក្នុងកិច្ចសន្ទនានោះ ប្រមុខរដ្ឋាភិបាលវៀតណាមបានលើកឡើងថា វៀតណាម ជាប្រទេសមួយមានសក្តានុពលក្នុងការអភិវឌ្ឍថាមពលកកើតឡើងវិញ ហើយលោកក៏បានសុំជំនួយអាម៉េរិក ពាក់ព័ន្ធនឹងវិស័យនេះដែរ។ បើតាមលោក ផាម បម្រែបម្រួលអាកាសធាតុ ជាបញ្ហាសកល ដោយតម្រូវឱ្យមានការចូលរួមពីប្រជាជន និងសកលលោកទាំងមូល។ នេះបើតាមការចុះផ្សាយរបស់សារព័ត៌មាន Vietnam News។ 

 

ជាការឆ្លើយតប លោក John Kerry បានអះអាងថា អាម៉េរិក នឹងបន្តកិច្ចសហប្រតិបត្តិការជាមួយប្រទេសកំពុងអភិវឌ្ឍដូចជាវៀតណាម ដើម្បីដោះស្រាយបញ្ហាបម្រែបម្រួលអាកាសធាតុ ក៏ដូចជាអភិវឌ្ឍថាមពលស្អាត។ មិនតែប៉ុណ្ណោះ លោក Kerry ក៏បានចាត់ទុកវៀតណាម មានទំនាក់ទំនងល្អជាមួយអាម៉េរិកផងដែរ។ 

 

សូមបញ្ជាក់ថា ដំណើរទស្សនកិច្ចរបស់លោកបៃឌិននៅវៀតណាម ត្រូវបានរំពឹងថា នឹងមានការពង្រីកកិច្ចសហប្រតិបត្តិការបន្ថែម ស្របពេលចិន កំពុងពង្រីកឥទ្ធិពលរបស់ខ្លួននៅក្នុងតំបន់៕