កីឡាអន្តរជាតិ
អន្តរជាតិ
មេសហព័ន្ធបាល់ទាត់អេស្ប៉ាញ លាលែងពីតំណែង ជុំវិញរឿងអាស្រូវ«ថើប»
× ប្រធានសហព័ន្ធបាល់ទាត់អេស្ប៉ាញ RFEF លោក Luis Rubiales បានលាលែងពីតំណែង នៅថ្ងៃទី១០ ខែកញ្ញា ពាក់ព័ន្ធរឿងរ៉ាវអាស្រូវនៃការថើបកីឡាការិនីក្រុមជម្រើសជាតិអេស្ប៉ាញ អំឡុងពេលកម្មវិធីអបអរជ័យជម្នះពានរង្វាន់ Women’s World Cup 2023 កាលពីខែមុន។
ក្នុងសំណេរក្នុងសេចក្តីប្រកាសលាលែង លោក Rubiales សរសេរថាតំណែងប្រធាន RFEF ដែលកំពុងកាន់កាប់ក្នុងដៃមិនអាចបន្តទៀតបានទេ។ មិនអាចបន្តដឹកនាំបាន ដ្បិតចាប់តាំងពីករណីថើបមាត់កីឡាការិនីអេស្ប៉ាញ បានរងការរិះគន់យ៉ាងខ្លាំង។
រឿងអាស្រូវនៃការថើបលើកីឡាការិនី Jenni Hermoso បន្ទាប់ពីជ័យជម្នះនៅព្រឹត្តិការណ៍ World Cup 2023 វគ្គផ្តាច់ព្រ័ត្រ ក្នុងទីក្រុងសីដ៍នីកាលពីថ្ងៃទី២០ ខែសីហា បានធ្វើឱ្យកីឡាការិនីជាច្រើនរិះគន់ ក៏ដូចជាអ្នកគាំទ្របាល់ទាត់ជុំវិញពិភពលោក។ មន្ត្រីជាន់ខ្ពស់នៃរដ្ឋាភិបាលអេស្ប៉ាញ និងមេសហព័ន្ធបាល់ទាត់ ព្រមទាំងប្រធានសមាគមនានា បានរិះគន់ខ្លាំងលើរឿងនេះ និងបានចោទប្រកាន់ថាបានរំលោភបំពានផ្លូវភេទក្នុងការប្រកួតកីឡា។
ការសម្រេចចិត្តក្នុងការលាលែងពីតំណែងរបស់លោកបានកើតឡើងបន្ទាប់ពីមានការវាយប្រហារបន្ថែមទៀតដល់តំណែងរបស់លោកទៅនឹងរឿងអាស្រូវការថើបក្នុងរយៈពេលប៉ុន្មានថ្ងៃចុងក្រោយនេះ។ រដ្ឋអាជ្ញាអេស្ប៉ាញបានដាក់ពាក្យបណ្តឹងទៅតុលាការកំពូលប្រឆាំងនឹងលោក Rubiales កាលពីថ្ងៃទី៨ ខែកញ្ញា ពីបទរំលោភផ្លូវភេទ និងការបង្ខិតបង្ខំ។
ពាក្យបណ្តឹងបានធ្វើឡើង តាមរយៈកីឡាការិនី Hermosoដើម្បីប្រឆាំងទៅនឹងការថើបពីសំណាក់លោក Rubiales លើបបូរមាត់របស់នាង ដោយគ្មានការយល់ព្រម។ មេបាល់ទាត់អេស្ប៉ាញ បានអះអាងថាការថើបគឺមានការព្រមព្រៀងគ្នាទៅវិញទៅមក ប៉ុន្តែទោះយ៉ាងណាកីឡាការិនីប្រកបអាជីពនៃប្រទេសអេស្ប៉ាញ មន្ត្រីរដ្ឋាភិបាល និងមជ្ឈដ្ឋានបាល់ទាត់អេស្ប៉ាញទាមទារឱ្យលោក Rubiales ចុះចេញពីតំណែង។
លើការថើបកីឡាការិនី Hermoso សហព័ន្ធបាល់ទាត់អន្តរជាតិ FIFA បានដាក់ទណ្ឌកម្មព្យួរការងារលោក Rubiales ពីសកម្មភាពបាល់ទាត់រយៈពេល ៣ខែ ហើយក៏បានបើកការស៊ើបអង្កេតចំពោះទង្វើររបស់អតីតមេបាល់ទាត់អេស្ប៉ាញ។ កាលពីសប្តាហ៍មុនប្រធានសហព័ន្ធបាល់ទាត់អឺរ៉ុប UEFA លោក Alexander Ceferin ក៏ចាត់ទុកទង្វើររបស់បុរសវ័យ ៤៦ឆ្នាំ ថាជារឿងមិនអាចទទួលយកបាន។
បើទោះជាចុះចេញពីតំណែងប្រធានសហព័ន្ធក៏ដោយក្តី លោក Rubiales អះអាងថានឹងនៅតែបន្តការពារខ្លួនលោកពីបញ្ហានៃរឿងអាស្រូវដដែល។
«ខ្ញុំនឹងនៅតែការពារកិត្តិយសរបស់ខ្ញុំ ខ្ញុំនឹងការពារភាពគ្មានកំហុសរបស់ខ្ញុំ ខ្ញុំមានជំនឿទៅថ្ងៃអនាគត ខ្ញុំមានជំនឿលើការពិត។»។ លោក Rubiales បាននិយាយនៅក្នុងកិច្ចសម្ភាសនៃកម្មវិធីជាមួយនឹងលោក Piers Morgan។ តាមរយៈការបញ្ជាក់ លោក Rubiales បានសម្រេចចុះចេញពីតំណែងក្រោយមានការជជែងជាមួយក្រុមគ្រួសារ ព្រមទាំងមិត្តភក្កិរួចរាល់៕
Tag:
Luis Rubiales
World Cup
© រក្សាសិទ្ធិដោយ thmeythmey.com