ពីក្រៅកិច្ចប្រជុំក្រុមប្រទេសមានសេដ្ឋកិច្ចរីកចម្រើនទាំង២០ នៅក្រុងញូវដែលី ឥណ្ឌា លោក ផាក ជីន រដ្ឋមន្រ្តីការបរទេសកូរ៉េខាងត្បូង បានជួបជាមួយសមភាគីរុស្ស៊ី លោក ស៊ែហ្គេយ៍ ឡាវរ៉ូវ នៅក្នុងថ្ងៃទី១០ ខែកញ្ញា។ កូរ៉េខាងជើង ដែលបន្តពង្រឹងសមត្ថភាពនុយក្លេអ៊ែរ និងមីស៊ីល ជាប្រធានបទដ៏សំខាន់នៅក្នុងជំនួបទ្វេភាគីនេះ។ 

 

តាមការបញ្ជាក់របស់ប្រមុខការទូតកូរ៉េខាងត្បូង ទំនាក់ទំនងក្រុងមូស្គូ និងក្រុងព្យុងយ៉ាង គួរតែជាការចូលរួមចំពោះសន្តិភាព និងស្ថិរភាពនៅក្នុងតំបន់ទ្វីបកូរ៉េ ក៏ដូចជាតំបន់អាស៊ីបូព៌ា។ បន្ថែមពីនេះ លោកផាក បានទទូចឱ្យទំនាក់ទំនងប្រទេសទាំងពីរ គួរតែគោរពតាមសេចក្តីសម្រេចរបស់ក្រុមប្រឹក្សាសន្តិសុខអង្គការសហប្រជាជាតិផង។ 

 

លើសពីនេះ ប្រមុខការទូតកូរ៉េខាងត្បូង បានជំរុញឱ្យរុស្ស៊ីមានកិច្ចសហប្រតិបត្តិការប្រកបដោយការស្ថាបនា នៅក្នុងក្រុមប្រឹក្សាសន្តិសុខអង្គការសហប្រជាជាតិដើម្បីដោះស្រាយបញ្ហាកូរ៉េខាងជើង ខណៈកូរ៉េខាងត្បូង ត្រៀម នឹងចូលអង្គុយនៅកៅអីសមាជិកមិនមែនអចិន្រ្តៃយ៍នៃក្រុមប្រឹក្សាសន្តិសុខអង្គការសហប្រជាជាតិ។ នេះបើតាមការចុះផ្សាយរបស់ទីភ្នាក់ងារព័ត៌មាន Yonhap។ 

 

តាមការកំណត់ កូរ៉េខាងត្បូង នឹងធ្វើជាសមាជិកមិនមែនអចិន្រ្តៃយ៍នៃក្រុមប្រឹក្សាសន្តិសុខចាប់ពីឆ្នាំ២០២៤ ដល់២០២៥។ 

 

កន្លងមក រុស្ស៊ី និងចិន បានប្រើសិទ្ធិវេតូជាច្រើនលើកនៅក្នុងកិច្ចប្រជុំក្រុមប្រឹក្សាសន្តិសុខ ដែលចង់ដាក់ទណ្ឌកម្មបន្ថែមលើកូរ៉េខាងជើង។ 

 

ការទទូចរបស់ប្រមុខការទូតកូរ៉េខាងត្បូងបែបនេះ ធ្វើឡើងមុនពេលលោក គីម ជុងអ៊ុន មេដឹកនាំកូរ៉េខាងជើង គ្រោងបំពេញទស្សនកិច្ចនៅរុស្ស៊ី ដើម្បីជួបជាមួយលោក វ្ល៉ាឌីមៀ ពូទីន ប្រធានាធិបតីរុស្ស៊ី។ ភាគីទាំងពីរ ត្រូវបានរំពឹងថា អាចនឹងមានកិច្ចព្រមព្រៀងអាវុធផង។ បញ្ហានេះ ត្រូវបានក្រុងវ៉ាស៊ីនតោន ព្រមានចាត់វិធាន ប្រសិនបើក្រុងព្យុងយ៉ាង មានកិច្ចព្រមព្រៀងអាវុធជាមួយក្រុងមូស្គូ។