ក្នុងរបាយការណ៍របស់ខ្លួន មេដឹកនាំកូរ៉េខាងជើង លោក គីម ជុងអ៊ុន បានចាកចេញពីប្រទេស តាមរយៈរថភ្លើងដើម្បីធ្វើទស្សនកិច្ចនៅរុស្ស៊ី និងជួបជាមួយលោកប្រធានាធិបតី លោក វ្ល៉ាឌីមៀ ពូទីន តាំងពីថ្ងៃទី១០ ខែកញ្ញាមក។ ក្នុងដំណើរទស្សនកិច្ចដែលត្រូវបានអាម៉េរិករំពឹងថាពិភាក្សាពីកិច្ចព្រមព្រៀងអាវុធនេះ លោក គីម បាននាំមន្រ្តីជាន់ខ្ពស់របស់រដ្ឋាភិបាល និងមន្រ្តីយោធារបស់ខ្លួនទៅផង។ 

 

តំណាងយោធា ដែលអមដំណើរលោកគីម ទៅរុស្ស៊ី ក៏មានសមាជិកចេញពីបក្សពលករកូរ៉េផង ក្នុងនោះមានដូចជាលោក Jo Chun Ryong ប្រធាននាយកដ្ឋានឧស្សាហកម្មគ្រាប់រំសេវជាដើម។ រដ្ឋមន្រ្តីការបរទេសកូរ៉េខាងជើង លោកស្រី Choe Son-hui ក៏អមដំណើរលោកគីម ទៅរុស្ស៊ីដែរ។ 

 

តាមការបញ្ជាក់របស់មន្រ្តីនៅក្រសួងការពារជាតិកូរ៉េខាងត្បូង លោក គីម ជុងអ៊ុន បានទៅដល់រុស្ស៊ីហើយ នៅព្រឹកថ្ងៃទី១២ ខែកញ្ញា។ នេះបើតាមការចុះផ្សាយរបស់ទីភ្នាក់ងារព័ត៌មាន Yonhap។  អ្នកនាំពាក្យក្រសួងការពារជាតិកូរ៉េខាងត្បូង លោក Jeon Ha-kyou និយាយថា រដ្ឋាភិបាលក្រុងសេអ៊ូល កំពុងតាមដានយ៉ាងម៉ត់ចត់ លើកិច្ចចរចា ដែលអាចកើតមានឡើងរវាងលោកពូទីន និងលោកគីម ក្នុងនោះរួមទាំងកិច្ចព្រមព្រៀងអាវុធផង។ 

 

កន្លងមក រដ្ឋាភិបាលក្រុងវ៉ាស៊ីនតោន បានព្រមានថា ក្រុងព្យុងយ៉ាង នឹងរងផលវិបាក ប្រសិនបើមានកិច្ចព្រមព្រៀងអាវុធជាមួយក្រុងមូស្គូ។

 

នេះជាដំណើរទស្សនកិច្ចរបស់មេដឹកនាំកូរ៉េខាងជើង ទៅរុស្ស៊ីលើកដំបូង ក្នុងរយៈពេលជាង ៤ឆ្នាំកន្លងមកនេះ ពោលគឺចាប់តាំងពីផ្ទុះជំងឺកូវីដ-១៩ នៅចុងឆ្នាំ២០១៩ មក។ 

 

មួយរយៈចុងក្រោយនេះ កូរ៉េខាងជើង បានស្វះស្វែងរកកិច្ចសហប្រតិបត្តិការជាមួយរុស្ស៊ី ស្របពេលអាម៉េរិក កូរ៉េខាងត្បូង និងជប៉ុន បន្តពង្រឹងកិច្ចសហប្រតិបត្តិការត្រីភាគីនៅក្នុងតំបន់ ដើម្បីប្រឆាំងនឹងកម្មវិធីនុយក្លេអ៊ែរ និងមីស៊ីលរបស់ខ្លួន៕