អន្តរជាតិ
នយោបាយអន្តរជាតិ
អធិការបតីអាល្លឺម៉ង់ជូនពរសម្តេច ហ៊ុន ម៉ាណែត ឱ្យទទួលជោគជ័យលើតួនាទីនាយករដ្ឋមន្រ្តី លោក អធិការបតីអាល្លឺម៉ង់ លោក អូឡាហ្វ ស្ហូល (ឆ្វេង) និងសម្តេច ហ៊ុន ម៉ាណែត នាយករដ្ឋមន្រ្តីកម្ពុជា។ រូបភាប AFP និង Facebook_Samdech Thipadei Hun Manet.jpg
× អធិការបតីអាល្លឺម៉ង់ លោក អូឡាហ្វ ស្ហូល បានផ្ញើលិខិតអបអរសម្តេចហ៊ុន ម៉ាណែត ក្រោយកាន់តំណែងជាប្រមុខរដ្ឋាភិបាលកម្ពុជា។ នេះបើតាមសេចក្តីប្រកាសព័ត៌មានរបស់រដ្ឋាភិបាលអាល្លឺម៉ង់ នៅថ្ងៃទី១១ ខែកញ្ញា។ ទន្ទឹមនេះ អធិការបតីអាល្លឺម៉ង់ ក៏បានជូនពរឱ្យសម្តេច ទទួលបានជោគជ័យ ក្នុងការកាន់តំណែងដ៏សំខាន់នេះផង។
តាមសេចក្តីប្រកាសព័ត៌មាន ចេញដោយការិយាល័យព័ត៌មានរបស់រដ្ឋាភិបាលសហព័ន្ធអាល្លឺម៉ង់ នៅថ្ងៃទី១១ ខែកញ្ញា អធិការបតីអាល្លឺម៉ង់ លោក អូឡាហ្វ ស្ហូល បានជូនពរឱ្យសម្តេចហ៊ុន ម៉ាណែត ទទួលជោគជ័យ ក្នុងការកាន់តំណែងជាប្រមុខរដ្ឋាភិបាលកម្ពុជា។
«អ្នកអាចបន្តពឹងផ្អែកលើអាល្លឺម៉ង់ ដើម្បីសម្រេចគោលដៅ និងពង្រឹងការអភិវឌ្ឍសេដ្ឋកិច្ច និងសង្គមកម្ពុជា រួមទាំងប្រជាធិបតេយ្យ និងនីតិរដ្ឋ»។ អធិការបតីអាល្លឺម៉ង់ បានសង្កត់ធ្ងន់បែបនេះ។
មិនតែប៉ុណ្ណោះ មេដឹកនាំរដ្ឋាភិបាលរូបនេះ ក៏បានរំឮកឡើងវិញផងដែរពីទំនាក់ទំនងដ៏ល្អរវាងភាគីទាំងពីរ រួមទាំងការគាំទ្រលើច្បាប់អន្តរជាតិ និងធម្មនុញ្ញអង្គការសហប្រជាជាតិ។
កម្ពុជា និងសាធារណរដ្ឋសហព័ន្ធអាល្លឺម៉ង់ បានចាប់ផ្តើមទំនាក់ទំនងការទូត នៅក្នុងឆ្នាំ១៩៦៧ និងបានព្យួរទំនាក់ទំនងការទូតនេះ នៅចន្លោះឆ្នាំ ១៩៦០ និង១៩៩៣។
តាមការបញ្ជាក់របស់ក្រសួងពាណិជ្ជកម្មកម្ពុជានៅពេលកន្លងមក កម្ពុជាបាននាំចេញទំនិញទៅអាល្លឺម៉ង់ប្រមាណ ១ពាន់លានដុល្លារ នៅក្នុងឆ្នាំ២០២២ ដោយកើនឡើងប្រមាណ២៣ភាគរយ បើធៀបនឹងឆ្នាំ២០២១។ ទំនិញដែលកម្ពុជានាំទៅអាល្លឺម៉ង់ មានដូចជាស្បែកជើង សំលៀកបំពាក់ សម្ភារសម្រាប់ធ្វើដំណើរ ផលិតផលកសិកម្ម កង់ និងឧបករណ៍អេឡិចត្រូនិចជាដើម៕
© រក្សាសិទ្ធិដោយ thmeythmey.com