ប្រធានក្រុម គួច សុកុម្ភៈ ជាកីឡាករបាល់ទាត់មួយរូប ដែលទទួលបានការគោរព ពីអ្នកប្រកបអាជីពដូចគ្នា ព្រោះទម្រង់លេងបានល្អ ទាំងការពារ បម្រើ និងប្រយុទ្ធ សម្រាប់ក្រុមជម្រើសជាតិកម្ពុជា។ ជាប់ជម្រើសជាតិដំបូងឆ្នាំ ២០០៥ ខ្សែបម្រើណាហ្គាវើលដ៍រូបនេះ ដើរតួសំខាន់ និងលេងបានគ្រប់ទម្រង់។ ការលេងបែបនេះ គឺកម្រមានកីឡាករ អាចលេងបានល្អ ហើយ គួច សុកុម្ភៈ តែងជាប់ជម្រើសជាតិស្ទើតែគ្រប់ការប្រកួត បើទោះជាមានការផ្លាស់ប្ដូរគ្រូបង្វឹកជម្រើសជាតិជាច្រើនរូប ក៏ដោយ។
 

គួរឲ្យកត់សម្គាល់នោះ ក្នុងការប្រកួត រវាងកម្ពុជា និង ហុងកុង នាថ្ងៃទី៧ ខែកញ្ញា សុកុម្ភៈ ដែលសព្វថ្ងៃមានវ័យ៣៦ឆ្នាំ ត្រូវបានផ្លាស់ប្ដូរចេញ ហើយជំនួសវិញ ដោយ គង់ លីហួរ មកពីក្លិបព្រៃវែង នៅនាទី៦៣។ ការបំពេញតួនាទីជំនួសរៀមច្បង លីហួរ វ័យ ២០ ឆ្នាំ ក៏បង្ហាញភាពប៉ិនប្រសប់ផងដែរ។
 

ចំពោះការបង្ហាញខ្លួនរបស់ លី ហួរ និងការជំនួស កីឡាករ គួច សុកុម្ភៈ គ្រូបង្វឹកកម្ពុជា បានបញ្ជាក់ថា នេះ មិនមែនជាការធ្វើតេស្ដសមត្ថភាព កីឡាករវ័យក្មេងរូបនេះទេ ប៉ុន្ដែគឺជាការជឿជាក់លើសមត្ថភាពរបស់គេ។ 
 

«ខ្ញុំ ពិតជាជឿជាក់លើ លីហួរ។ គាត់ ជាកីឡាករល្អសម្រាប់យើង។ ខ្ញុំ គិតថាប្រសិនជា គាត់នៅបន្ដការពង្រឹង គាត់នឹងជួយបានច្រើនសម្រាប់ក្រុមជម្រើសជាតិកម្ពុជា ប៉ុន្ដែម្ដងបន្ដិចៗ។»។ លោក Felix G. Dalmas បាននិយាយប្រាប់ដូច្នេះ។
 

គួរបញ្ជាក់ផងដែរថា គង់ លីហ៊ួរ បច្ចុប្បន្ន គឺជាកីឡាករខ្សែបម្រើកណ្ដាល របស់ក្លិបបាល់ទាត់ ខេត្តព្រៃវែង ចំណែក កីឡាករ គួច សុកុម្ភៈ កំពុងប្រកបអាជីពជាខ្សែបម្រើឲ្យក្លិបណាហ្គាវើលដ៍៕