យន្តហោះកងទ័ពអាកាសចិនរួមទាំងយន្តហោះចម្បាំង J-10 បានហោះចូលទៅក្នុងជ្រុងភាគនិរតីនៃតំបន់កំណត់អត្តសញ្ញាណការពារដែនអាកាសរបស់កោះតៃវ៉ាន់។ យន្តហោះចិនមួយចំនួនបានឆ្លងកាត់ច្រក Bashi ដើម្បីធ្វើសមយុទ្ធជាមួយនាវាផ្ទុកយន្តហោះចិន Shandong នៅមហាសមុទ្រប៉ាស៊ីហ្វិក។ នេះបើតាមក្រសួងការពារជាតិតៃវ៉ាន់។

 

«កងកម្លាំងតៃវ៉ាន់បានតាមដានស្ថានការណ៍ រួមទាំងការបញ្ជូនយន្តហោះទ័ពអាកាសផ្ទាល់ខ្លួន និងប្រព័ន្ធការពារដែនអាកាសដើម្បីឆ្លើយតបទៅកាន់ការលុកលុយរបស់ចិន» ។ ក្រសួងការពារជាតិតៃវ៉ាន់ប្រកាសបែបនេះនៅថ្ងៃទី១៣ ខែកញ្ញា។ 

 

បន្ថែមពីលើនេះ មន្ត្រីជាន់ខ្ពស់លើផែនការសន្តិសុខរបស់តៃវ៉ាន់ និយាយថា នាវាចម្បាំងចិនជាង២០គ្រឿង រួមទាំងនាវាពិឃាត Type ០៥៥ បានបើកកាត់តាមច្រក Bashi និងច្រកសមុទ្រ Miyako ចូលទៅក្នុងមហាសមុទ្រប៉ាស៊ីហ្វិកនៅថ្ងៃទី១៣ ខែកញ្ញា។ 

 

សកម្មភាពយោធាដែលកើតឡើងថ្មីៗនេះ ទំនងជាការឆ្លើយតបរបស់ចិនចំពោះសកម្មភាពយោធានារយៈពេលចុងក្រោយនេះរបស់អាម៉េរិក និងសម្ព័ន្ធមិត្តនៅក្នុងតំបន់៕