ចំពោះអវត្តមាននេះ អគ្គលេខាធិការរូបនេះ បានបញ្ជាក់ថា មុនព្រឹត្តិការណ៍ស៊ីហ្គេមកីឡាការិនីបាល់ទាត់កម្ពុជា បានទៅបោះជំរំហ្វឹកហាត់នៅប្រទេសចិន ដោយគម្រោងផែនការហ្វឹកហាត់នេះ NOCC ភ្ជាប់ជាមួយគម្រោងហ្វឹកហាត់ត្រៀមប្រកួត Asian Games 2022 ផងដែរ។ 
 

មន្ដ្រីជាន់ខ្ពស់សហព័ន្ធបាល់ទាត់កម្ពុជារូបនេះ បញ្ជាក់ទៀតថា គម្រោងហ្វឹកហាត់នៅចិន សម្រាប់ Asian Games គឺសហព័ន្ធ មិនបានដឹងនោះទេ។ ដូច្នេះ ហើយក្រោយពេលចប់ព្រឹត្តិការណ៍ស៊ីហ្គេម លើកទី៣២ ក្រុមកីឡាការិនីទាំងនោះ ក៏បានបំបែកគ្នា ទៅតាមក្លិប និងកន្លែងរៀងៗខ្លួន។
 

លោក កែវ សារ៉េត បន្តថា មានបញ្ហា ៣យ៉ាង ដែលមិនអាចប្រមូលផ្ដុំកីឡាការិនីហ្វឹកហាត់បាន គឺបញ្ហារបួស, បញ្ហាប្រឡង និងបញ្ហាគ្រួសារ។ អគ្គលេខាធិការរូបនេះ ពន្យល់ថា បញ្ហារបួស គឺអំឡុងពេលប្រកួតស៊ីហ្គេម មានកីឡាការិនីខ្លះរបួសខ្លាំង ដូច្នេះ ត្រូវការព្យាបាល ហើយសហព័ន្ធ ក៏ចុះសួរសុខទុក្ខផងដែរ។ ចំណែកបញ្ហាទី២ កីឡាការិនីខ្លះ ត្រូវត្រៀមប្រឡងបាក់ឌុប ប្រឡងគ្រូ និងត្រូវការសិក្សាបន្ថែម។ រីឯបញ្ហាទី៣ គឺអាណាព្យាបាល មិនអនុញ្ញាតឲ្យមកហ្វឹកហាត់នៅក្រៅ ព្រោះឆ្ងាយពីផ្ទះ ម្យ៉ាងមុនព្រឹត្តិការណ៍ស៊ីហ្គេម អ្នកទាំងនោះ បានមកហ្វឹកហាត់រយៈពេលជាង ៦ខែនៅចិន ដែលជាហេតុធ្វើឲ្យអាណាព្យាបាល បារម្ភ។

អគ្គលេខាធិការសហព័ន្ធកីឡាបាល់ទាត់កម្ពុជា ក៏បានសុំ NOCC ចំពោះការប្រមូលផ្ដុំហ្វឹកហាត់នៅក្នុងប្រទេសដែរ ប៉ុន្ដែ ជម្រើសនេះ ត្រូវបាន NOCC តបវិញថា ភាគីចិន មិនយល់ព្រមនោះទេ។ លោក កែវ សារ៉េត បញ្ជាក់ថា បានជួបអគ្គលេខាធិការគណៈកម្មាធិការជាតិអូឡាំពិកកម្ពុជា លោក វ៉ាត់ ចំរើន ហើយ អគ្គលេខាធិការ  NOCC រូបនេះ ថាគម្រោងហ្វឹកហាត់អត្ដពលិក ក្នុងស៊ីហ្គេមនេះ គឺភ្ជាប់ជាមួយអាស៊ីហ្គេម ហើយម្យ៉ាងទៀត ចិនជាម្ចាស់ផ្ទះ។ ដូច្នេះ ប្រភេទកីឡា ដែលហាត់សម្រាប់ស៊ីហ្គេម ត្រូវហាត់បន្ដសម្រាប់អាស៊ីហ្គេម។
 

«យើង បានលើកជម្រើសនេះ ទៅ NOCC ថាប្រសិនជាបោះជុំរុំហ្វឹកហាត់នៅក្នុងស្រុក ប្រហែលយើងអាចធ្វើបាន ហើយប្រហែលអាណាព្យាបាល អាចឲ្យមកបាន ព្រោះយើង មានសាលាបាល់ទាត់ជាតិបាទី មានការគ្រប់គ្រងត្រឹមត្រូវនៅហ្នឹង។ ហើយប្រសិនជាគ្រូចិន ចង់គ្រប់គ្រង អញ្ជើញតែគ្រូមួយមក ហើយយើង ឲ្យជំនួយការខ្មែរយើង មកជួយទៅ បែបនេះ គឺបាន។ ពេលយើង លើកសំណើរនេះ NOCC ប្រាប់ថា ភាគីចិនគេ មិនព្រម។ អ៊ីចឹងហើយ យើង មិនអាចអនុវត្តបាន។ បើថាប្រមូលផ្ដុំត្រឹមរយៈពេលខ្លី ដើម្បីទៅប្រកួត យើងអាចត្រៀមបាន ព្រោះប្រមូលផ្ដុំខ្លី យូបំផុត ត្រឹមកន្លះខែ ទៅ២០ថ្ងៃ យើងប្រមូលផ្ដុំបានព្រោះ មិនឆ្ងាយពីផ្ទះគេពេក។»។ លោក កែវ សារ៉េត បាននិយាយដូច្នេះ។