ទុរេន​កំពុងក្លាយជាផលិតផលត្រូវប៉ាន់នៅចិន ដែលធ្វើឱ្យតម្រូវការទុរេនកើនឡើងលើទីផ្សារពិភពលោក។ នៅចិន ទុរេន  មិនមែនគ្រាន់តែជាផ្លែឈើសម្រាប់បរិភោគឡើយ ប៉ុន្តែបង្ហាញពីភាពមានបានរបស់អ្នកទិញដែរ ដោយទុរេនត្រូវបានប្រើប្រាស់យ៉ាងពេញនិយមជាកាដូសម្រាប់អាពាហ៍ពិពាហ៍ ពិធីភ្ជាប់ពាក្យ ឬអំណោយ។

 

តម្រូវការទុរេននៅចិនបានចាប់ផ្តើមកើនឡើងក្នុងឆ្នាំ២០២៧។ បើតាមសារព័ត៌មាន SCMP បាន​ដក​ស្រង់​ទិន្នន័យ​ពី​គយ​ចិន​ កាល​ពី​ឆ្នាំ​មុនប្រទេស​នេះ​បាន​នាំ​ចូល​ទុរេន​ច្រើន​ជាង​ឆ្នាំ២០១៧ ចំនួន៤ ដងដែល​មាន​តម្លៃ​សរុប៤ពាន់​លាន​ដុល្លារ។

 

រយៈពេល២ឆ្នាំចុងក្រោយនេះ ចិនបាននាំចូលទុរេនចំនួន ៦ពាន់លានដុល្លារ ដែលមានចំណែកដល់ទៅ៩១ភាគរយនៃចំនួនទុរេនសរុបនៅទូទាំងពិភពលោក។ នេះបើតាមលោក Aris Dacanay សេដ្ឋវិទូតំបន់អាស៊ីអាគ្នេយ៍ប្រចាំ HSBC ។ 

 

ទុរេន​នៅ​​ចិន​មាន​តម្លៃ​ជាង១០ដុល្លារ​ក្នុង​មួយ​គីឡូក្រាម។ តម្លៃ​ជា​មធ្យម​ក្នុង​បណ្តា​ប្រទេស​អាស៊ីអាគ្នេយ៍​មាន​ត្រឹមតែ​ប្រហែល ៦ ដុល្លារ​ក្នុង​មួយ​គីឡូក្រាម​ប៉ុណ្ណោះ។

 

ការផ្គត់ផ្គង់ទុរេនភាគច្រើនមកពីបណ្តាប្រទេសអាស៊ីអាគ្នេយ៍ ជាពិសេសថៃ។ តំបន់នេះរួមចំណែក ៩០ភាគរយនៃការនាំចេញទុរេនរបស់ពិភពលោកក្នុងឆ្នាំ២០២២ កើនឡើងពី ៦០ភាគរយ ធៀបរយៈពេល៧ឆ្នាំមុន។

 

ការកើនឡើងនៃតម្រូវការទុរេននាំមកនូវឱកាសដល់បណ្តាប្រទេសអាស៊ីអាគ្នេយ៍ មិនត្រឹមតែប្រទេសថៃប៉ុណ្ណោះទេ។ លោក Aris Dacanay វាយតម្លៃថា ទីផ្សារចិនធំពេកដូច្នេះហើយបណ្តាប្រទេសអាស៊ីអាគ្នេយ៍នៅតែមានកន្លែងច្រើនដើម្បីចូលរួមប្រជែងនៅទីផ្សារមួយនេះ ។

 

នៅក្នុងរបាយការណ៍ខាងលើ កិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយក្នុងតំបន់ (RCEP) ដែលរួមមានអាស៊ាន និងចិន ជប៉ុន កូរ៉េ អូស្ត្រាលី នូវែលសេឡង់ នឹងអនុញ្ញាតឱ្យប្រទេសនានានាំចូលទីផ្សារចិនដោយសេរី ។ លោក Aris Dacanay បានលើកឡើងថា ៖« ឱកាសកំពុងបើកហើយ ទីផ្សារទុរេននឹងរីកកាន់តែធំឡើង ខណៈដែលប្រទេសផ្សេងក្នុងអាស៊ានកំពុងប្រជែងដណ្តើមតំណែងលេចធ្លោពីប្រទេសថៃ»៕