តម្លៃប្រេងឆៅអាម៉េរិក WTI បច្ចុប្បន្នមានតម្លៃ ៩០,៧ដុល្លារក្នុងមួយប៉ារ៉ែលដែលកើនលើសពីតម្លៃ ៩០ដុល្លារចាប់តាំងពីខែវិច្ឆិកាឆ្នាំមុន។ ប្រេង Brent ក៏បានកើនថ្លៃដល់ ៩៤ដុល្លារក្នុងមួយប៉ារែលដែលជាតម្លៃខ្ពស់បំផុតចាប់តាំងពីដើមឆ្នាំ។

 

តម្លៃ​ប្រេង​បាន​កើន​ឡើង​ជា​បន្តបន្ទាប់​នា​ពេល​ថ្មីៗ​នេះ​ដោយ​សារ​ក្តី​បារម្ភ​អំពី​ការ​ផ្គត់ផ្គង់​ដ៏​តឹងរ៉ឹង។ កាលពីថ្ងៃទី៥ ខែកញ្ញា រុស្ស៊ី និងអារ៉ាប៊ីសាអូឌីត ដែលជាប្រទេសនាំមុខគេទាំងពីរនៃអង្គការប្រទេសនាំចេញប្រេង និងសម្ព័ន្ធមិត្ត (OPEC+) បានប្រកាសបន្តវិធានការរឹតបន្តឹងការផ្គត់ផ្គង់ប្រេងរហូតដល់ដំណាច់ឆ្នាំនេះ។ ក្នុងនោះអារ៉ាប៊ីសាអូឌីតបន្តកាត់បន្ថយការផលិត១លានបារ៉ែលក្នុងមួយថ្ងៃ ខណៈរុស្ស៊ីបានកាត់បន្ថយការនាំចេញប្រេងរបស់ខ្លួនចំនួន៣០០ពាន់បារ៉ែលក្នុងមួយថ្ងៃ។

 

នៅសប្តាហ៍នេះ ទីភ្នាក់ងារថាមពលអន្តរជាតិ (IEA) បានព្រមានថា ការផ្លាស់ប្តូររបស់អារ៉ាប៊ីសាអូឌីត និងរុស្ស៊ីអាចបណ្តាលឱ្យកង្វះការផ្គត់ផ្គង់ដ៏សំខាន់ដែលបណ្តាលឱ្យមានការប្រែប្រួលតម្លៃយ៉ាងខ្លាំង។ របាយការណ៍ដែលចេញផ្សាយដោយ OPEC + បង្ហាញាថា ទីផ្សារនឹងខ្វះខាតប្រេងជាង ៣លានបារ៉ែលក្នុងមួយថ្ងៃក្នុងត្រីមាសទី៤ឆ្នាំនេះ។ 

 

ទន្ទឹមនឹងនេះ តម្រូវការប្រេងនៅអាម៉េរិក និងចិនដែលជាអ្នកប្រើប្រាស់ប្រេងឈានមុខគេពីររបស់ពិភពលោកនៅតែរឹងមាំ។ ការព្យាករបង្ហាញថា អាម៉េរិកអាចជៀសវាងវិបត្តិសេដ្ឋកិច្ចកំពុងកើនឡើង ខណៈការប្រើប្រាស់ប្រេងនៅចិនក៏មានស្ថិរភាពផងដែរ បើទោះបីជាសេដ្ឋកិច្ចធ្លាក់ចុះក៏ដោយ។

 

ចាប់តាំងពីចុងខែមិថុនាមក តម្លៃប្រេងឆៅពិភពលោកបានកើនឡើងជាង ៣០ភាគរយ។ អ្នក​វិភាគ​មួយ​ចំនួន​បាន​ចាប់​ផ្តើម​ព្យាករ​ថា​តម្លៃ WTI នឹង​ឡើង​ដល់ ១០០ ដុល្លារ​ក្នុង​មួយ​ប៉ារ៉ែល៕