អន្តរជាតិ
អាម៉េរិក ចង់ភ្ជាប់ខ្សែទូរស័ព្ទបន្ទាន់សម្រាប់កម្លាំងទ័ពអវកាសជាមួយចិន ឧត្តមសេនីយ៍ Chance Saltzman មេបញ្ជាការកម្លាំងប្រតិបត្តិការអវកាស។ រូបថត AFP
× កងកម្លាំងអវកាសអាម៉េរិក បានបើកកិច្ចពិភាក្សាផ្ទៃក្នុងមួយអំពីការបង្កើតខ្សែទូរស័ព្ទទាន់ហេតុការណ៍ ជាមួយចិនដើម្បីបញ្ចៀសវិបត្តិនៅទីលំហ។ ប្រមុខកម្លាំងអវកាសអាម៉េរិក ឧត្តមសេនីយ៍ Chance Saltzman បានប្រាប់ទីភ្នាក់ងារព័ត៌មាន Reuters នាថ្ងៃទី២៥ ខែកញ្ញា។
បើតាមឧត្តមសេនីយ៍ Chance Saltzman បានលើកឡើងថា ទំនាក់ទំនងផ្ទាល់រវាងកងកម្លាំងអវកាសអាម៉េរិក និងសមភាគីចិន នឹងមានតម្លៃក្នុងការកាត់បន្ថយភាពតានតឹង។ ប៉ុន្តែមកទល់ពេលនេះ អាម៉េរិកមិនទាន់បានទាក់ទងជាមួយចិនដើម្បីបង្កើតបណ្ដាញផ្ទាល់មួយនៅឡើយ។
«អ្វីដែលយើងបាននិយាយសម្រាប់ភាគីអាម៉េរិក យ៉ាងហោចណាស់គឺការបើកបណ្តាញទំនាក់ទំនង ដើម្បីប្រាកដថាប្រសិនបើមានវិបត្តិ យើងដឹងថាអ្នកណាដែលយើងអាចទាក់ទងបាន»។ លោក Saltzman បាននិយាយបែបនេះ ដោយបន្ថែមថា វានឹងអាស្រ័យលើប្រធានាធិបតី ចូ បៃឌិន និងក្រសួងការបរទេសដើម្បីដឹកនាំការពិភាក្សាលើរឿងនេះ។
ការបង្ហាញបំណងនេះកើតឡើងខណៈដែលកងកម្លាំងអវកាសអាម៉េរិកសម្លឹងបង្កើតទីស្នាក់ការរបស់ខ្លួននៅជប៉ុននៅចំពេលដែលមហិច្ឆតាយោធារបស់ចិននៅតំបន់ឥណ្ឌូប៉ាស៊ីហ្វិកកើនឡើង ហើយសង្រ្គាមនៅអ៊ុយក្រែនក៏បង្ហាញពីសារសំខាន់នៃសមត្ថភាពអវកាសក្នុងសង្គ្រាមផងដែរ។
លោក Saltzman ដែលបានជួបជជែកជាមួយមន្ត្រីការពារជាតិជប៉ុននៅក្រុងតូក្យូនៅថ្ងៃដដែល មិនបានបញ្ជាក់លម្អិតអំពីទីតាំង ឬគោលបំណងឱ្យជាក់លាក់ឡើយ។ ប៉ុន្តែលោកលើកឡើងថា វាអាចស្រដៀងទីស្នាក់ការដែលបានបង្កើតឡើងនៅកូរ៉េខាងត្បូងកាលពីខែវិច្ឆិកាឆ្នាំមុន។
បើតាមមេបញ្ជាការរូបនេះ កិច្ចសហប្រតិបត្តិការកាន់តែស៊ីជម្រៅជាមួយបណ្តាប្រទេសដែលមានគំនិតដូចគ្នារួមទាំងជប៉ុន នឹងមានសារសំខាន់ក្នុងការតាមដាន និងស្វែងយល់ពីសកម្មភាពនៅក្នុងដែនអាកាសដើម្បីរារាំងចិន។
សូមបញ្ជាក់ថា កងកម្លាំងអវកាសអាម៉េរិកដែលត្រូវបានបង្កើតឡើងក្នុងឆ្នាំ២០១៩ ក៏មិនមានទំនាក់ ទំនងផ្ទាល់ជាមួយរុស្ស៊ីដែរ បើទោះជាមហាអំណាចទាំង២ មានផ្កាយរណបជាច្រើនដែលធ្វើប្រតិបត្តិការពេញទីលំហក្ដី៕
© រក្សាសិទ្ធិដោយ thmeythmey.com