ការផ្គត់ផ្គង់តាមរយៈប្រទេសទីបីបានលាក់បាំងធាតុពិតរបស់សហភាពអឺរ៉ុប (EU) ជុំវិញការពឹងផ្អែកវត្ថុធាតុដើមពីរុស្ស៊ី។ តួយ៉ាងក្រុមហ៊ុនស្វីស Glencore បានផ្គត់ផ្គង់ទង់ដែងរុស្ស៊ីរាប់ពាន់តោនទៅកាន់អ៊ីតាលី តាមរយៈតួកគីនៅខែកក្កដាឆ្នាំ ២០២៣។

 

យោងតាមឯកសារគយ និងរូបថតដែលទទួលបានដោយកាសែត Financial Times ពាណិជ្ជករលក់លោហៈ និងប្រេងដែលបានចុះបញ្ជីនៅទីក្រុងឡុងដ៍បានទិញសន្លឹកទង់ដែងយ៉ាងហោចណាស់ ៥០០០តោនដែលផលិតដោយក្រុមហ៊ុន Ural Mining and Metallurgy Company (UMMC) របស់រុស្ស៊ី។ ផលិតផលទាំងនេះត្រូវបាននាំចេញពីតួកគីទៅកាន់កំពង់ផែ Livorno របស់អ៊ីតាលីនៅខែកក្កដា។

 

បើតាម Financial Times​ កិច្ចព្រមព្រៀងបែបនេះបង្ហាញពីការពឹងផ្អែករបស់អឺរ៉ុបលើទំនិញសំខាន់ៗរបស់រុស្ស៊ី ក៏ដូចជាតួនាទីយ៉ាងសំខាន់របស់តួកគីដែលជាមជ្ឈមណ្ឌលដឹកជញ្ជូន។

 

មន្ត្រី​អឺរ៉ុប​មួយចំនួន​ជឿថា ពាណិជ្ជកម្ម​ជាមួយ​រុស្ស៊ី​តាមរយៈ​ប្រទេស​ទី​បី​ដូចជា​ចិន អេមីរ៉ាត់អារ៉ាប់រួម និង​តួកគី​កាត់បន្ថយ​ប្រសិទ្ធភាព​នៃការទណ្ឌកម្ម​របស់លោកខាងលិច ។ 

 

គួរបញ្ជាក់ថា Glencore គឺជាក្រុមហ៊ុនពាណិជ្ជកម្មលោហៈ រ៉ែ ថាមពល និងផលិតផលកសិកម្មដ៏ធំបំផុតមួយរបស់ពិភពលោកដែលមានទីស្នាក់ការកណ្តាលនៅទីក្រុង Baar ប្រទេសស្វីស។ 

 

ចំណែក UMMC គឺជាក្រុមហ៊ុនលោហធាតុលេខមួយរបស់រុស្ស៊ី និងជាអ្នកផលិតទង់ដែង ធំជាងគេទីប្រាំបួននៅលើពិភពលោកដែលមានទីស្នាក់ការកណ្តាលនៅទីក្រុង Verkhnyaya Pyshma របស់រុស្ស៊ី ៕