សេដ្ឋកិច្ចអន្តរជាតិ
អន្តរជាតិ
ប្រជាជនចិនបង្កើនការទិញឆ្នោត ស្របពេលសេដ្ឋកិច្ចមិនសូវល្អ រូបភាព Reuters ។
× ប្រាក់ចំណូលពីការលក់ឆ្នោតនៅខែសីហាឆ្នាំនេះ កើនឡើង៥០ភាគរយខ្ពស់ជាងគ្រាដូចគ្នាកាលពីឆ្នាំមុន ស្របពេលដែលសេដ្ឋកិច្ចប្រទេសនេះមានភាពអាប់អួរអស់រយៈពេលជាយូរ។
បើតាមទិន្នន័យពីក្រសួងហិរញ្ញវត្ថុចិន ប្រាក់ចំណូលពីការលក់ឆ្នោតបានកើនឡើងដល់ជិត ៥៣ពាន់លានយ័នស្មើនឹង ៧,២៥ពាន់លានដុល្លារនៅខែសីហា។ នេះជាអត្រាខ្ពស់បំផុតចាប់តាំងពីដើមឆ្នាំនេះដែលមានរហូតដល់ ៥៣,៦ភាគរយខ្ពស់ជាងខែសីហាឆ្នាំ២០២២។ ៨ខែឆ្នាំនេះ ប្រាក់ចំណូលពីឆ្នោតចិនបានកើនដល់ជាង ៣៧៥ពាន់លានយ័ន កើនជាង ៥១ភាគរយធៀបនឹងគ្រាដូចគ្នាឆ្នាំមុន។
កំណើននៃការលក់ឆ្នោតខ្ពស់បែបនេះ ស្របពេលសេដ្ឋកិច្ចចិនមានសញ្ញាណអវិជ្ជមានជាច្រើន ជាពិសេសអត្រាគ្មានការងារធ្វើ។ ទិន្នន័យពីអាជ្ញាធរចិនបង្ហាញថា ក្នុងខែមិថុនាអត្រាគ្មានការងារធ្វើក្នុងចំណោមយុវជនចិនបានឡើងដល់កម្រិតខ្ពស់បំផុតគឺ ២១,៣ភាគរយ។ នេះបើតាមសារព័ត៌មាន Reuters ។
ជុំវិញរឿងនេះ មានការជជែកគ្នាច្រើននៅលើបណ្តាញសង្គមនៅចិនថា ចំនួនដែលកើនឡើងច្រើននៃប្រាក់ចំណូលឆ្នោតប៉ុន្មានខែថ្មីៗនេះ គឺទាក់ទងទៅនឹងការព្រួយបារម្ភផ្នែកសេដ្ឋកិច្ចរបស់ក្រុមយុវជន។ មនុស្សម្នាក់បានសរសេរនៅលើបណ្តាញសង្គម Weibo ថា៖ « មនុស្សវ័យក្មេងដែលអាចឈ្នះឆ្នោត ៥លានយ័ន ប្រសើរជាងពួកគេដែលខំរកប្រាក់ពីកន្លែងធ្វើការ »។
កាលពីចុងខែសីហា នាយកដ្ឋានស្ថិតិរបស់ចិនបានបញ្ឈប់ការបោះពុម្ពផ្សាយអត្រាគ្មានការងារធ្វើរបស់យុវជនដោយពន្យល់ថា នាយកដ្ឋានកំពុងស្វែងរកការបង្កើនប្រសិទ្ធភាពវិធីសាស្ត្រប្រមូលទិន្នន័យ ដែលនេះក៏បង្កជាប្រតិកម្មលើបណ្ដាញសង្គមចិនផងដែរ៕
© រក្សាសិទ្ធិដោយ thmeythmey.com