មហោស្រពចាប៉ីដងវែងឆ្នាំ២០២៣ រកឃើញបេក្ខជនជយលាភីទាំង៣រូបហើយ

ជាតិ

មហោស្រពចាប៉ីដងវែងឆ្នាំ២០២៣ រកឃើញបេក្ខជនជយលាភីទាំង៣រូបហើយ

05, Oct 2023 , 9:59 am

រូបភាព

(រាប់ពីឆ្វេង លោក ណូន សុខ, លោក សាន វណ្ណា, លោក សូរ សារ៉ន)

ដោយ: ប៉ូ សាគុន

ភ្នំពេញ៖ មហោស្រពចាប៉ីដងវែង ឆ្នាំ២០២៣ ក្រោមប្រធានបទ “វប្បធម៌សន្តិភាព” បានរកឃើញជយលាភីទាំង៣រូបហើយ ដោយលេខ១ បានទៅលើសិល្បករ ណូន សុខ លេខ២បានទៅលើសិល្បករ សាត វណ្ណា និងលេខ៣ បានទៅលើសិល្បករ សូរ សារ៉ន។

សិល្បករ ណូន សុខ គឺជាបេក្ខជនមកពីខេត្តសៀមរាប ដោយបកស្រាយលើប្រធានបទ “គាំទ្រយុវជនថែរក្សាវប្បធម៌”។ ម្ចាស់ជយលាភីលេខ២ គឺសិល្បករ សាត វណ្ណា មកពីភ្នំពេញ បកស្រាយប្រធានបទ “មានសន្ដិភាព វប្បធម៌ស្ថិតស្ថេរ និងរុងរឿង”។ ចំណែកបេក្ខជនជយលាភីលេខ៣ សិល្បករ សូរ សារ៉ន មកពីខេត្តស្វាយរៀន បកស្រាយប្រធានបទ “ផឹកទឹកនឹកដល់ប្រភព ជ្រកម្លប់នឹកដល់អ្នកដាំ”។

បេក្ខជនជយលាភីទាំងរូប ដែលជាប់ក្នុងគ្គពាក់កណ្ដាលផ្ដាច់ព្រ័ត្រ (រូបពីក្រសួងវប្បធម៌ និងវិចិត្រសិល្បៈ)

មហោស្រពចាប៉ីដងវែងទូទាំងប្រទេស ប្រព្រឹត្តទៅរយៈពេល៣ថ្ងៃ ចាប់ពីថ្ងៃទី០២ ដល់ថ្ងៃទី០៤ ខែតុលា ឆ្នាំ២០២៣ នៅរោងមហោស្រពនាយកដ្ឋានសិល្បៈទស្សនីយភាព។

សូមបញ្ជាក់ថា គោលបំណងនៃការរៀបចំមហោស្រពចាប៉ីដងវែង ឆ្នាំ២០២៣ ក្រោមប្រធានបទ “វប្បធម៌សន្តិភាព” គឺដើម្បីថែរក្សា ការពារ លើកស្ទួយ និងលើកទឹកចិត្តសិល្បករចាប៉ីដងវែង តាមរយៈការផ្សព្វផ្សាយដល់មហាជន ជាពិសេសយុវជន យុវនារី ដែលជាទំពាំងស្នងឫស្សី នៃប្រទេសជាតិ ឱ្យបានស្គាល់ពីទម្រង់ចាប៉ីដងវែង ព្រមទាំងរួមគ្នាគាំទ្រមរតកវប្បធម៌ជាតិ។

មហោស្រពនេះរៀបចំឡើងមាន៤វគ្គ។ វគ្គទី១ បេក្ខជនដែលចូលរួមប្រកួត ត្រូវថតវីដេអូ នៃការច្រៀងចម្រៀងចាប៉ីដងវែង ដែលបង្កប់ខ្លឹមសារអប់រំ រយៈពេល១៥នាទី ផ្ញើទៅគណៈកម្មការរៀបចំមហោស្រព តាមរយៈអនឡាញ។ ក្នុងនោះមហោស្រព ទទួលបានបេក្ខជន ចូលរួមប្រកួតចំនួន១៧រូប ដែលមកពីរាជធានីភ្នំពេញ១រូប ខេត្តស្វាយរៀង២រូប ខេត្តតាកែវ១រូប កណ្ដាល២រូប ព្រៃវែង៤រូប សៀមរាប៣រូប ពោធិសាត់១រូប កំពង់ឆ្នាំង១រូប កំពង់ស្ពឺ១រូប និងមកពីខេត្តកែប១រូប។

( គណៈមេប្រយោគទាំង៥រូប)

បេក្ខជនដែលជាប់នៅវគ្គទី១ និងឆ្លងចូលទៅវគ្គទី២ ដោយត្រូវថតវីដេអូចម្រៀងចាប៉ី លើប្រធានបទ “វប្បធម៌សន្តិភាព” រយៈពេល១៥នាទី ដើម្បីផ្ញើទៅគណៈកម្មការមហោស្រព ដើម្បីពិនិត្យនិងជម្រុះ យកបេក្ខជនឆ្នើមចំនួន៥រូប ដើម្បីឈានចូលទៅវគ្គទី៣។ ក្នុងវគ្គទី២ គណៈកម្មការមេប្រយោគបានជម្រុះយកបេក្ខជនចំនួន១២រូប ដែលមកពីរាជធានីភ្នំពេញ១រូប ស្វាយរៀង២រូប តាកែវ១រូប កណ្ដាល២រូប ព្រៃវែង១រូប ខេត្តសៀមរាប៣រូប ពោធិសាត់១រូប និងខេត្តកំពង់ឆ្នាំង១រូប។

វគ្គទី៣គឺជាវគ្គពាក់កណ្ដាលផ្ដាច់ព្រ័ត្រ បេក្ខជនឆ្នើមចំនួន៥រូប តម្រូវឱ្យឡើងមកប្រឡងច្រៀងចម្រៀងចាប៉ីដងវែង លើប្រធានបទ “វប្បធម៌សន្តិភាព” នៅនាយកដ្ឋានសិល្បៈទស្សនីយភាព ដើម្បីជម្រុះរកបេក្ខជនឆ្នើមចំនួន៣រូប។ វគ្គទី៤គឺជាវគ្គផ្ដាច់ព្រ័ត្រ ដែលយកបេក្ខជន មានសមត្ថភាពខ្ពស់តែ៣រូបប៉ុណ្ណោះ។

(អ្នកទស្សនានាំកូនៗមកមើលការសម្ដែងសិល្បៈចាប៉ី

សូមរំលឹកថា ចាប៉ីដងវែងរបស់កម្ពុជា ត្រូវបានចុះឈ្មោះក្នុងបញ្ជីបេតិកភណ្ឌវប្បធម៌អរូបីរបស់អង្គការយូណេស្កូ នាអំឡុងកិច្ចប្រជុំនៅទីក្រុង Addis Ababa ប្រទេសអេត្យូពី នាថ្ងៃទី៣០ ខែវិច្ឆិកា ឆ្នាំ២០១៦។ ឧបករណ៍ភ្លេងបុរាណខ្មែរមួយនេះ ស្ថិតក្នុងបញ្ជីបេតិកភណ្ឌអរូបីដែលត្រូវការសង្គ្រោះបន្ទាន់។

ជាមួយគ្នានោះ គណៈកម្មាធិការអភិរក្សបេតិកភណ្ឌវប្បធម៌អរូបីរបស់អង្គការយូណេស្កូ បានអនុម័តលើការស្នើសុំជំនួយហិរញ្ញវត្ថុ ២៣ម៉ឺនដុល្លារអាមេរិក របស់កម្ពុជា សម្រាប់ការអភិរក្សចាប៉ីដងវែង៕