ប្រតិបត្តិករនៃរោងចក្រថាមពលនុយក្លេអ៊ែរ Fukushima Daiichi បាននិយាយថា រោងចក្របានបញ្ចេញទឹកសំណល់វិទ្យុសកម្មដែលធ្វើប្រព្រឹត្តកម្មជាលើកទីពីរជាមួយបរិមាណទឹក៧៨០០តោន នៅថ្ងៃទី៥ ខែតុលានេះ ។
ររោងចក្រ Fukushima Daiichi នឹងបញ្ចេញទឹកដែលធ្វើប្រព្រឹត្តកម្មប្រមាណ៧៨០០តោនចូលសមុទ្រក្នុងរយៈពេល ១៧ថ្ងៃ។ ក្រុមហ៊ុនបានវាយតម្លៃគ្រឿងបរិក្ខារ និងលទ្ធផលនៃការត្រួតពិនិត្យបន្ទាប់ពីការបង្ហូរដោយជោគជ័យនៅជុំទីមួយ ដោយមិនបានរកឃើញបញ្ហា ឬហេតុផលក្នុងការផ្លាស់ប្តូរផែនការនោះទេ។
កាលពីខែមីនា ឆ្នាំ២០១១ ជប៉ុនបានទទួលរងនូវគ្រោះមហន្តរាយពីរដងនៃការរញ្ជួយដី និងរលកយក្សស៊ូណាមិ ដែលប៉ះពាល់ដល់រោងចក្រថាមពលនុយក្លេអ៊ែរ Fukushima ។ ក្រុមហ៊ុន TEPCO ត្រូវបូមទឹកសមុទ្រប្រហែល ១,៣៤លានតោន ដើម្បីធ្វើឲ្យត្រជាក់ស្នូលរ៉េអាក់ទ័រ បន្ទាប់មកផ្ទុកវានៅក្នុងធុងដែកចំនួន ១០០០ធុងដែលសាងសង់ក្នុងបរិវេណរោងចក្រ។
នៅឆ្នាំ ២០២១ ជប៉ុនបានចាប់ផ្តើមរៀបចំផែនការបញ្ចេញទឹកសំណល់ដែលបានកែច្នៃចូលទៅក្នុងសមុទ្រជាបណ្តើរៗ ព្រោះអស់កន្លែងសម្រាប់ផ្ទុកទឹកបន្ថែមទៀត។ ទីក្រុងតូក្យូបាននិយាយថា ទឹកសំណល់វិទ្យុសកម្មនឹងឆ្លងកាត់ប្រព័ន្ធចម្រោះដើម្បីយកអ៊ីសូតូមវិទ្យុសកម្មចេញដោយបន្សល់ទុកតែទ្រីទីយ៉ូមដែលអ្នកជំនាញអះអាងថាមានផលប៉ះពាល់តិចតួចចំពោះសុខភាព។
ក្រុមហ៊ុន TEPCO បានបញ្ចេញទឹកសំណល់វិទ្យុសកម្មចាប់ពីថ្ងៃទី ២៤ ខែសីហា ដល់ថ្ងៃទី ១១ ខែកញ្ញា ដោយបានបូមទឹកសំណល់វិទ្យុសកម្មចំនួន ៧៧៨៨តោនពីធុងចំនួន ១០ ចូលទៅក្នុងសមុទ្រ។ ក្រុមហ៊ុនបានយកគម្រូទឹកសមុទ្រទាំង ១០ទីតាំងក្នុងរង្វង់៣គីឡូម៉ែត្រនៃរោងចក្រធ្វើតេស្តជាប្រចាំថ្ងៃ។
លទ្ធផលបានបង្ហាញថាកំហាប់ទ្រីទីយ៉ូមខ្ពស់បំផុតគឺ ១០becquerel ក្នុង១លីត្រទឹកគឺទាបជាងកម្រិត៧០០becquerel ក្នុង១លីត្រទឹក (Becquerel គឺជាឯកតានៃវិទ្យុសកម្មនៅក្នុងប្រព័ន្ធអន្តរជាតិ) ដែលក្រុមហ៊ុនកំណត់ដើម្បីបញ្ឈប់ការបញ្ចេញ។
យ៉ាងណាមិញ ជប៉ុននៅតែប្រឈមមុខនិងការប្រឆាំងពីប្រទេសជិតខាងជាពិសេសចិន។ ចិនបានរិះគន់ជប៉ុនចំៗ និងដាក់បម្រាមនាំចូលគ្រឿងសមុទ្រទាំងអស់ពីប្រទេសនេះ។ រុស្ស៊ីក៏កំពុងពិចារណាលើវិធានការស្រដៀងគ្នានេះដែរ។
ទន្ទឹមនេះ ទីក្រុងតូក្យូបាននិយាយថា ខ្លួនកំពុងពិចារណាលើលទ្ធភាពនៃការដាក់ពាក្យបណ្តឹងប្រឆាំងនឹងទីក្រុងប៉េកាំងទៅកាន់អង្គការពាណិជ្ជកម្មពិភពលោក (WTO) ជុំវិញការហាមប្រាមអាហារសមុទ្ររបស់ខ្លួន៕