អន្តរជាតិ
នយោបាយអន្តរជាតិ
រដ្ឋមន្ត្រីកសិកម្មឥណ្ឌូណេស៊ីលាលែងតំណែង ស្របពេលមានការចោទប្រកាន់ពីអំពើពុករលួយ លោក Syahrul Yasin Limpo រដ្ឋមន្ត្រីកសិកម្មឥណ្ឌូណេស៊ី ។ រូបភាព ៖ the jakarta post ។
× រដ្ឋមន្ត្រីកសិកម្មឥណ្ឌូណេស៊ី លោក Syahrul Yasin Limpo បានដាក់លិខិតលាលែងពីតំណែងទៅកាន់ប្រធានាធិបតី ចូកូ វីដូដូ ខណៈដែលគណៈកម្មការលុបបំបាត់អំពើពុករលួយឥណ្ឌូណេស៊ី (KPK) បង្កើនការស៊ើបអង្កេតនៅក្នុងក្រសួងមួយនេះ។
យោងតាម KPK គណៈកម្មាធិការរកឃើញពីការទទួលសំណូកសម្រាប់ការផ្សព្វផ្សាយនៅក្រសួងកសិកម្ម ក៏ដូចជាគម្រោងក្លែងបន្លំពាក់ព័ន្ធនឹងអ្នកផ្គត់ផ្គង់ឯកជន។
នៅថ្ងៃទី៥ ខែតុលា លោក Syahrul Yasin Limpo ដែលជារដ្ឋមន្ត្រីកសិកម្មឥណ្ឌូណេស៊ី ទោះបីជាមិនមានឈ្មោះជាផ្លូវការជាជនសង្ស័យក៏ដោយបានលាលែងពីតំណែង ដើម្បីឲ្យភ្នាក់ងារពាក់ព័ន្ធងាយស្រួលដោះស្រាយសំណុំរឿងប្រឆាំងនឹងរូបលោក។
ថ្លែងក្នុងសន្និសីទសារព័ត៌មាននៅទីក្រុងហ្សាការតាលោក Syahrul Yasin Limpo បានសង្កត់ធ្ងន់ថា ៖ « សូមឱ្យដំណើរការផ្លូវច្បាប់ចាប់ផ្តើម ហើយខ្ញុំត្រៀមខ្លួនរួចជាស្រេចដើម្បីប្រឈមមុខនឹងវា»។
កាលពីសប្តាហ៍មុន KPK បានត្រួតពិនិត្យលំនៅដ្ឋានផ្លូវការរបស់លោក Syahrul Yasin Limpo នៅទីក្រុងហ្សាការតា ខណៈពេលលោកកំពុងបំពេញទស្សនកិច្ចការងារនៅអ៊ីតាលី និងអេស្ប៉ាញ។
អ្នកនាំពាក្យរបស់ KPK លោក Ali Fikri បាននិយាយថា អ្នកត្រួតពិនិត្យបានរកឃើញកាំភ្លើង ១០ដើម និងក្រដាសប្រាក់ជាច្រើនមានតម្លៃប្រហែល ៣០ពាន់លានរូពី (១,៩លានដុល្លារ) ព្រមទាំងដកហូតបានឯកសារមួយចំនួននៅផ្ទះរបស់ Syahrul Yasin Limpo ។ KPK មិនអាចបង្ហាញឈ្មោះជនសង្ស័យបានទេ ដោយសារសំណុំរឿងកំពុងបន្ត។
លោក Syahrul Yasin Limpo គឺជាអ្នកនយោបាយទី២របស់គណបក្ស Nasdem ដែលអាចត្រូវប្រឈមមុខនឹងការកាត់ទោសនាពេលថ្មីៗនេះ។ បច្ចុប្បន្ន តុលាការកំពុងកាត់ទោសលោក Johnny G. Plate អតីតរដ្ឋមន្ត្រីក្រសួងបច្ចេកវិទ្យាគមនាគមន៍ និងព័ត៌មានក្រោមបទចោទទទួលសំណូកក្នុងអំឡុងពេលទិញឧបករណ៍សម្រាប់គម្រោងទំនាក់ទំនង 4G ៕
Tag:
ឥណ្ឌូណេស៊ី
លាលែងដំណែង
© រក្សាសិទ្ធិដោយ thmeythmey.com