អន្តរជាតិ
យូនីសេហ្វ៖ គ្រោះមហន្តរាយទាក់ទងអាកាសធាតុ បានធ្វើឱ្យកុមាររាប់លាននាក់ផ្លាស់ទីលំនៅ រូបភាព AFP
× អង្គការយូនីសេហ្វ (UNICEF) នៅថ្ងៃទី៦ ខែតុលា បានប្រកាសថា ទឹកជំនន់ ព្យុះ និងគ្រោះមហន្តរាយ ដែលទាក់ទងនឹងអាកាសធាតុ បានជំរុញកុមាររាប់លាននាក់ ចាកចេញពីផ្ទះរបស់ពួកគេ។ ស្ថានភាពបែបនេះ កាន់តែយ៉ាប់យ៉ឺន ប្រសិនបើគ្មានវិធានការ។
យោងតាមរបាយការណ៍អង្គការយូនីសេហ្វ ការផ្លាស់ទីលំនៅក្នុងប្រទេសរបស់កុមារមានចំនួន ៤៣,១ លាននាក់ នៅ ៤៤ ប្រទេស ចាប់ពីចន្លោះឆ្នាំ ២០១៦ និង២០២១ ដោយសារតែគ្រោះធម្មជាតិ ដូចជាគ្រោះរាំងស្ងួត និងភ្លើងឆេះព្រៃ។ អង្គការយូនីសេហ្វបានកត់ត្រាការផ្លាស់ទី លំនៅរបស់កុមារភាគច្រើនទាក់ទងនឹងអាកាសធាតុច្រើនបំផុតនៅក្នុងតំបន់អាស៊ីបូព៌ា និងប៉ាស៊ីហ្វិក ដោយសារតែបំពុលខ្យល់។
ក្នុងចំណោមប្រទេសដែលមានចំនួនកុមារផ្លាស់ទីសរុបខ្ពស់បំផុតគឺចិន និងហ្វីលីពីន ដោយសារការប៉ះពាល់នឹងការប្រែប្រួលអាកាសធាតុ ចំនួនកុមារដ៏ច្រើន និងសមត្ថភាពក្នុងការបំលាស់ទី។
«នៅពេលដែលផលប៉ះពាល់នៃការប្រែប្រួលអាកាសធាតុកើនឡើង ការប្តូរកន្លែងរកនៅជំរុញដោយអាកាសធាតុ ក៏នឹងកើតឡើងដែរ»។ នាយកប្រតិបត្តិអង្គការយូនីសេហ្វ លោកស្រី Catherine Russell លើកឡើងបែបនេះ នៅក្នុងសេចក្តីថ្លែងការណ៍មួយចេញនៅថ្ងៃទី៦ ខែតុលា ដោយបន្តថា ប្រទេសនានាមានទាំងឧបករណ៍ និងចំណេះដឹង ដើម្បីឆ្លើយតបទៅនឹងបញ្ហាប្រឈមដែលកំពុងកើនឡើងនេះសម្រាប់កុមារ ប៉ុន្តែធ្វើសកម្មភាពយឺតពេក ដើម្បីឆ្លើយតប។
តាមរបាយការណ៍ខាងលើដដែលក្នុងអំឡុងពេលប្រាំមួយឆ្នាំនេះ ទឹកជំនន់ និងខ្យល់ព្យុះមានចំនួន ៩៥ ភាគរយនៃការផ្លាស់ទីលំនៅរបស់កុមារ។ អ្នកដឹកនាំសកលស្តីពីការធ្វើចំណាកស្រុក និងការផ្លាស់ទីលំនៅរបស់អង្គការយូនីសេហ្វ លោកស្រី Verena Knaus បានសម្គាល់ថា ការផ្លាស់ទីលំនៅរបស់កុមារ គឺសឹងតែមិនមែនជាការងារសំខាន់របស់មេដឹកនាំឡើយ។
យូនីសេហ្វបានព្យាករណ៍ផងដែរអំពីកុមារជិត ៩៦ លាននាក់ នឹងត្រូវផ្លាស់ទីលំនៅដោយសារទឹកជំនន់ពីទន្លេ ក្នុងរយៈពេល ៣ទសវត្សរ៍ខាងមុខ ដែលជាមធ្យមមាន កុមារជិត ៣,២លាននាក់នឹងត្រូវផ្លាស់ទីជារៀងរាល់ឆ្នាំ៕
© រក្សាសិទ្ធិដោយ thmeythmey.com