អស្ថិរភាពនៅមជ្ឈិមបូព៌ាអាចរុញច្រានធនាគារកណ្តាលនានា ត្រៀមយុទ្ធសាស្រ្តថ្មីដើម្បីប្រឆាំងនឹងកំណើនអតិផរណា។ វាហាក់ដូចជាកិច្ចខិតខំប្រឹងប្រែងរបស់ធនាគារកណ្តាលកន្លងមក ស្ទើរតែគ្មានប្រសិទ្ធភាព។
កាលពីថ្ងៃទី៧ ខែតុលា ក្រុមប្រដាប់អាវុធហាម៉ាសបានវាយប្រហារអ៊ីស្រាអែលដោយបើកយុទ្ធនាការយោធាទ្រង់ទ្រាយធំ។ អ៊ីស្រាអែលបានសងសឹកដោយការវាយប្រហារតាមផ្លូវអាកាសវិញជាបន្តបន្ទាប់លើតំបន់កាហ្សា។ ទន្ទឹមនឹងជម្លោះរុស្ស៊ី-អ៊ុយក្រែន កំពុងតែធ្វើឱ្យស្ថានភាពពិភពលោកកាន់តែមានមិនស្ថិតស្ថេររួចទៅហើយ។
ផលប៉ះពាល់ពីបញ្ហានេះអាចចំណាយពេលមួយរយៈដើម្បីមើលពីភាពច្បាស់លាស់ជាងនេះ។ វាក៏អាស្រ័យទៅលើរយៈពេលដែលជម្លោះនេះអូសបន្លាយធ្ងន់ធ្ងរប៉ុណ្ណា និងថាតើវារីករាលដាលដល់ផ្នែកផ្សេងទៀតនៃតំបន់ដែរឬទេ។
លោក Agustin Carstens ប្រធានធនាគារទូទាត់អន្តរជាតិ (BIS) បាននិយាយថា វាលឿនពេកក្នុងការនិយាយអំពីផលប៉ះពាល់ដែលអាចកើតមាន ទោះបីជាប្រេង និងទីផ្សារភាគហ៊ុនមានប្រតិកម្មភ្លាមៗក៏ដោយ។
តម្លៃប្រេង Brent និង WTI នៅព្រឹកនេះបានកើនឡើងរហូតដល់ទៅ ៥ភាគរយ។ ប្រាក់ដុល្លារ និងប្រាក់យ៉េនជប៉ុនក៏បានឡើងថ្លៃដែរ បើធៀបនឹងរូបិយប័ណ្ណផ្សេងទៀត។ ទីផ្សារភាគហ៊ុន និងមូលបត្របំណុលរបស់អ៊ីស្រាអែលបានធ្លាក់ចុះនៅថ្ងៃទី ៨ខែតុលា។ អាជីវកម្មជាបន្តបន្ទាប់នៅក្នុងប្រទេសនេះក៏ត្រូវបញ្ឈប់ប្រតិបត្តិការផងដែរ។
ជម្លោះនៅមជ្ឈិមបូព៌ាអាចបង្កើតបញ្ហាប្រឈមថ្មីសម្រាប់សេដ្ឋកិច្ចពិភពលោក។ កំណើនពិភពលោកកំពុងធ្លាក់ចុះរួចទៅហើយ។ ទីផ្សារអាម៉េរិកក៏កំពុងស្វែងរកមធ្យោបាយសម្របខ្លួនទៅនឹងលទ្ធភាពដែលធនាគារកណ្តាលរក្សាអត្រាការប្រាក់នៅកម្រិតខ្ពស់ក្នុងរយៈពេលយូរជាងការរំពឹងទុក។
លោក Carl Tannenbaum សេដ្ឋវិទូនៅក្រុមហ៊ុនប្រឹក្សាហិរញ្ញវត្ថុ Northern Trust បានលើកឡើងថា អស្ថិរភាពសេដ្ឋកិច្ចណាមួយអាចពន្យារពេលការសម្រេចចិត្តគោលនយោបាយរបស់ប្រទេសនោះតាមរយៈបង្កើនការចំណាយហានិភ័យ និងបង្កឱ្យមានភាពចលាចលនៅក្នុងទីផ្សារប្រេង។
នៅសប្តាហ៍នេះ មូលនិធិរូបិយវត្ថុអន្តរជាតិ (IMF) និងធនាគារពិភពលោក (WB) នឹងជួបប្រជុំគ្នាដើម្បីវាយតម្លៃសេដ្ឋកិច្ចពិភពលោក។ ស្ថានការណ៍នៅមជ្ឈិមបូព៌ា និងបញ្ហាពាក់ព័ន្ធទំនងជាការផ្តោតសំខាន់នៃការពិភាក្សាសម្រាប់មេដឹកនាំហិរញ្ញវត្ថុ។ សេដ្ឋកិច្ចពិភពលោកនៅតែមានការប្រែប្រួលដោយសារជំងឺកូវីដ-១៩ និងភាពតានតឹងពាណិជ្ជកម្មក្នុងរយៈពេលប៉ុន្មានឆ្នាំចុងក្រោយនេះ។
សម្រាប់ធនាគារកណ្តាល ស្ថានភាពបច្ចុប្បន្នកំពុងបន្តរុញច្រានឱ្យធ្លាក់ក្នុងវិបត្តិ។ ធនាគារកណ្តាលនឹងត្រូវពិចារណាថាតើជម្លោះនៅមជ្ឈិមបូព៌ានឹងធ្វើឱ្យអតិផរណាកើនឡើងម្តងទៀតឬអត់។ ដោយសារតែតំបន់នេះមិនត្រឹមតែមានប្រទេសផលិតប្រេងសំខាន់ៗដូចជាអ៊ីរ៉ង់ និងអារ៉ាប៊ីសាអូឌីតប៉ុណ្ណោះទេ ថែមទាំងមានផ្លូវដឹកជញ្ជូនសំខាន់ៗផងដែរ។
បើតាមមន្ត្រីធនាគារកណ្តាលអាម៉េរិក (Fed) ការកើនឡើងតម្លៃថាមពលគឺជាហានិភ័យមួយចំពោះទស្សនវិស័យអតិផរណា។ ទន្ទឹមនេះ សេដ្ឋកិច្ចអាម៉េរិកអាចជៀសផុតពីវិបត្តិសេដ្ឋកិច្ច ប្រសិនបើមិនមានការប៉ះទង្គិចគ្នាខ្លាំងក្លា ។
នៅពេលដែលជម្លោះផ្ទុះឡើងនៅក្នុងតំបន់ផលិតប្រេងដ៏សំខាន់របស់ពិភពលោក ប្រតិកម្មរបស់ពាណិជ្ជករ និងតាមបណ្តាប្រទេសដូចជាអ៊ីរ៉ង់ ឬអារ៉ាប៊ីសាអូឌីត នឹងត្រូវឃ្លាំមើលយ៉ាងដិតដល់ ដើម្បីមើលថាតើតម្លៃប្រេងឡើងថ្លៃឬយ៉ាងណា។ ប៉ុន្មានថ្ងៃបន្ទាប់នៃការជួញដូរភាគហ៊ុន និងសញ្ញាប័ណ្ណក៏នឹងបង្ហាញពីអ្វីដែលទីផ្សារកំពុងព្យាករពីលទ្ធផលផងដែរ។
លោក Karim Basta ប្រមុខសេដ្ឋវិទូនៅវិទ្យាស្ថានហិរញ្ញវត្ថុ III Capital Management បានមើលឃើញថា ជម្លោះនេះអាចបង្កើនតម្លៃប្រេង បង្កើនអតិផរណា និងគំរាមកំហែងដល់ការរំពឹងទុកនៃកំណើន។ ធនាគារកណ្តាលនឹងត្រូវថ្លឹងថ្លែងថាតើតម្លៃខ្ពស់ឬកំណើនយឺតគឺគួរឱ្យព្រួយបារម្ភជាង។
មន្ត្រី Fed បច្ចុប្បន្នកំពុងតាមដានការវិវឌ្ឍន៍នៅក្នុងទីផ្សារមូលបត្របំណុលរបស់រដ្ឋាភិបាល អាម៉េរិក។ ទិន្នផលសញ្ញាប័ណ្ណរដ្ឋាភិបាលអាម៉េរិកបានកើនឡើងនាពេលថ្មីៗនេះ ដែលមានន័យថាអ្នកវិនិយោគចូលចិត្តដាក់ប្រាក់ទៅក្នុងបណ្តាញផ្សេងទៀតដែលមានហានិភ័យខ្ពស់។
យ៉ាងណាមិញ ប្រសិនបើការវិវត្តនៅមជ្ឈិមបូព៌ាបង្កើនការព្រួយបារម្ភអំពីសេដ្ឋកិច្ចពិភពលោក មូលបត្របំណុលរបស់រដ្ឋាភិបាលអាម៉េរិកនឹងមានប្រជាប្រិយភាពម្តងទៀត នៅពេលដែលវិនិយោគិនស្វែងរកទីជំរក ដែលនាំឱ្យអត្រាការប្រាក់ធ្លាក់ចុះ។
ក្នុងករណីផ្សេងទៀត ការធ្លាក់ចុះអត្រាការប្រាក់ត្រូវបានចាត់ទុកថាជាសញ្ញាវិជ្ជមាន ដែលលើកទឹកចិត្តមនុស្ស និងអាជីវកម្មឱ្យមានការចំណាយ។ ប៉ុន្តែធ្វើដូចនេះ វាអាចបង្ហាញថាហានិភ័យថ្មីចំពោះសេដ្ឋកិច្ចពិភពលោកបានកើតឡើង៕