បើតាមសេចក្តីប្រកាសព័ត៌មានរបស់CDC ជំនួយ៦៦លានដុល្លារដែលអាល្លឺម៉ង់សន្យាឱ្យកម្ពុជានេះ គឺរាប់បញ្ចូលទាំងកិច្ចសហប្រតិបត្តិការលើផ្នែកហិរញ្ញវត្ថុ និងកិច្ចសហប្រតិបត្តិការផ្នែកបច្ចេកទេស សម្រាប់ឆ្នាំ២០២៣-២០២៤។ ក្រៅពីជំនួយនេះ រដ្ឋាភិបាលប្រទេសអាល្លឺម៉ង់ ក៏បានបន្តនូវកិច្ចសហប្រតិបត្តិជាមួយកម្ពុជា ក្នុងការអភិវឌ្ឍលើវិស័យសំខាន់ៗមួយចំនួនទៀត ផងដែរ។ 

 

CDCបានបញ្ជាក់ថា ក្នុងនោះ ភាគីប្រទេសទាំងពីរបន្តអភិវឌ្ឍលើវិស័យសេដ្ឋកិច្ចប្រកបដោយចីរភាព, វិស័យសុខាភិបាល និងគាំពារសង្គម រួមទាំងវិស័យថាមពល-អាកាសធាតុ និងវិស័យផ្សេងៗទៀត ដែលមានសង្គតិភាពជាមួយនឹងអាទិភាពនៃការអភិវឌ្ឍសង្គមជាតិ ដូចមានចែងក្នុងយុទ្ធសាស្ត្របញ្ចកោណ-ដំណាក់កាលទី១ និងរបៀបវារៈឆ្នាំ២០៣០ របស់ប្រទេសអាល្លឺម៉ង់។ 

លោក ឈៀង យ៉ាណារ៉ា សាទរចំពោះការគាំទ្ររបស់រដ្ឋាភិបាល និងពលរដ្ឋអាល្លឺម៉ង់ ដែលបន្តរួមចំណែកក្នុងកិច្ចការអភិវឌ្ឍកម្ពុជា។ 

 

យោងស្ថិតិពាណិជ្ជកម្មរបស់អគ្គនាយកដ្ឋានគយ និងរដ្ឋាករ បានបង្ហាញថា ពីខែមករា ដល់​ ខែកញ្ញា ឆ្នាំ២០២៣ ទំហំពាណិជ្ជកម្មរវាងកម្ពុជា​ និងអាល្លឺម៉ង់ សម្រេចក្នុងតម្លៃ៧៧៨លានដុល្លារ។ ក្នុងនោះ ការនាំចេញរបស់កម្ពុជាទៅកាន់ប្រទេសក្នុងតំបន់អឺរ៉ុបនេះ មានប្រមាណ៦២០លានដុល្លារ ហើយនាំចូលវិញមាន១៥៩លានដុល្លារ។ ​

 

សម្រាប់ទំនិញ​ដែល​កម្ពុជា​ នាំ​ចេញ​ទៅ​កាន់​ទីផ្សារ​អាល្លឺម៉ង់​ មានភាគ​ច្រើន ​​សម្លៀកបំពាក់ ​ស្បែក​ជើង ​ទំនិញ​សម្រាប់​ធ្វើ​ដំណើរ ​ផលិតផល​កសិកម្ម គ្រឿង​បន្លាស់​អគ្គិសនី ​និង​កង់ ខណៈការ​នាំ​ចូល​សំខាន់​មាន​ដូច​ជា​យាន​យន្ត ​សម្ភារៈ​សំណង់ ​និង​គ្រឿង​សង្ហា​រឹម​ជាដើម។  ប្រភពដដែលបានបញ្ជាក់ថា អាល្លឺម៉ង់ ជាដៃពាណិជ្ជកម្មធំលំដាប់ទី៧របស់កម្ពុជា៕