ជាតិ
ក្លិបអ្នកកាសែតកម្ពុជា-ថៃ ទៅទស្សនកិច្ចក្នុងតំបន់សក្តានុពលចំនួន៣កន្លែង នៅកែប
× ភ្នំពេញ៖ ក្នុងដំណើរទស្សនកិច្ចរបស់ក្លិបអ្នកកាសែតកម្ពុជា និងសមាគមអ្នកសារព័ត៌មានថៃ មកកាន់ខេត្តកែប រយៈពេល២ថ្ងៃ ចាប់ពីថ្ងៃទី២០-២១ តុលា បានទទួលការស្វាគម៍ពីសំណាក់អភិបាលខេត្តកែប។ ក្នុងដំណើរទស្សនកិច្ចនេះ ក្លិបអ្នកកាសែតកម្ពុជា-ថៃ បានធ្វើដំណើរទៅតំបន់ឧទ្យានជាតិកែប, តំបន់ភ្នំវល្លិ និងតំបន់ឆ្នេរអង្កោល។
ដំណើរទស្សនកិច្ចមកកាន់ខេត្តកែប ដឹកនាំដោយលោក ពុយ គា ប្រធានក្លិបអ្នកាសែតកម្ពុជា និងលោក Mongkol Bangprapa ប្រធានសមាគមសារព័ត៌មានថៃ ដោយទទួលការស្វាគមន៍ពីលោក សោម ពិសិដ្ឋ អភិបាលខេត្តកែប និងមន្ទីរពាក់ព័ន្ធមួយចំនួន។ ថ្លែងនាឱកាសនោះ លោក សោម ពិសិដ្ឋ បានលើកឡើងថា ខេត្តកែបមានចក្ខុវិស័យច្បាស់លាស់ក្នុងការអភិវឌ្ឍន៍វិស័យទេសចរណ៍ ដើម្បីប្រែក្លាយជាគោលដៅទេសចរណ៍សម្រាកកម្សាន្ដប្រណិតកម្រិតខ្ពស់ ប្រកបដោយគុណភាព និងភាពទាក់ទាញ។
ក្រោយបញ្ចប់ទស្សនកិច្ចនេះ លោកអភិបាលខេត្ត បានសំណូមពរដល់អ្នកសារព័ត៌មានទាំងអស់ ចូលរួមផ្សព្វផ្សាយទីតាំងសក្តានុពលទាំងនេះ ទៅកាន់មហាជនឱ្យបានកាន់តែទូលំទូលាយថែមទៀត។ ជាមួយគ្នានេះ លោក ពុយ គា ប្រធានក្លិបអ្នកកាសែតកម្ពុជា បានអរគុណ និងសាទរចំពោះសមិទ្ធផលដែលខេត្តសម្រេចបាននាពេលកន្លងមក។ ប្រធានក្លិបអ្នកកាសែតកម្ពុជារូបនេះ ក៏បានស្នើអ្នកសារព័ត៌មានទាំងអស់ ចូលរួមរំលេចបន្ថែមនូវចំណុចពិសេសៗដែលខេត្តកែបមាន ដូចជាខ្យល់បរិសុទ្ធអាចព្យាបាលជំងឺផ្លូវដង្ហើម និងស្រ្តេស និងចំណុចវិជ្ជមានជាច្រើនទៀត ឆ្លងកាត់ដំណើរទស្សនកិច្ចលើកនេះ។
គួរបញ្ជាក់ថា ក្រោយបញ្ចប់អាហារសាមគ្គីនៅឆ្នេរអង្កោល នៃស្រុកដំណាក់ចង្អើរ អភិបាលខេត្តកែប និងគណៈប្រតិភូ បានចូលរួមលែងក្តាមមេពូជចូលទៅក្នុងសមុទ្រវិញជានិមិត្តរូបផងដែរ៕
© រក្សាសិទ្ធិដោយ thmeythmey.com