តម្លៃប្រេងពិភពលោកបានធ្លាក់ចុះជាង២ភាគរយនៅថ្ងៃទី២៣ ខែតុលា ដោយសារកិច្ចខិតខំប្រឹងប្រែងការទូតនៅមជ្ឈិមបូព៌ាដើម្បីគ្រប់គ្រងជម្លោះរវាងអ៊ីស្រាអែល និងក្រុមហាម៉ាសបានបន្ធូរបន្ថយការព្រួយបារម្ភរបស់វិនិយោគិនអំពីហានិភ័យនៃការរំខានការផ្គត់ផ្គង់។

 

តម្លៃប្រេង Brent បានបិទសន្ទស្សន៍ជួញដូរធ្លាក់ចុះ ២,៣៣ដុល្លារ ឬ ២,៥ភាគរយមកនៅត្រឹម ៨៩,៨៣ដុល្លារក្នុងមួយបារ៉ែល ខណៈប្រេង WTI អាម៉េរិកធ្លាក់ចុះ ២,៥៩ដុល្លារ ឬ ២,៩ភាគរយមកត្រឹម ៨៥,៤៩ដុល្លារក្នងមួយបារ៉ែល។ ប្រេងទាំងពីរប្រភេទនេះ បានធ្លាក់ចុះតម្លៃប្រចាំថ្ងៃដ៏ច្រើនបំផុតចាប់តាំងពីដើមខែតុលា ។

 

មេដឹកនាំអឺរ៉ុបដែលធ្វើទស្សនកិច្ចនៅអ៊ីស្រាអែលក្នុងសប្តាហ៍នេះ បានអំពាវនាវឱ្យបញ្ឈប់ជម្លោះ ដើម្បីប្រជាជនប៉ាឡេស្ទីននៅតំបន់កាហ្សាអាចទទួលបានជំនួយ ហើយអង្គការ​សប្បុរសធម៌​បាន​ចាប់​ផ្តើម​ធ្វើ​ដំណើរ​ពី​​អេហ្ស៊ីប​ទៅ​កាន់​តំបន់កាហ្សាកាល​ពី​ចុង​សប្តាហ៍។

 

យោងតាមអ្នកវិភាគ Phil Flynn នៃក្រុមហ៊ុនសេវាហិរញ្ញវត្ថុ Price Futures Group ហានិភ័យចំពោះការផ្គត់ផ្គង់ប្រេងបានថយចុះ។

 

ប្រភេទប្រេងទាំងពីរបានកើនឡើងក្នុងរយៈពេល ២សប្តាហ៍ចុងក្រោយនេះ ដែលប្រឈមនឹងលទ្ធភាពនៃការរំខានការផ្គត់ផ្គង់នៅមជ្ឈឹមបូព៌ា ដែលជាតំបន់ផ្គត់ផ្គង់ប្រេងដ៏ធំបំផុតរបស់ពិភពលោកប្រសិនបើជម្លោះរីករាលដាល៕