«ខ្ញុំអស់លទ្ធភាពហើយ[បង់រំលស់] ខ្ញុំខ្ចីលុយគេ និងលក់ឡានអស់មួយ ដើម្បីបង់ថ្លៃផ្ទះ និងចំណាយប្រចាំថ្ងៃសព្វគ្រប់នានា»។ អ្នកស្រី ស្រ៊ុង ណៃហួយ បានថ្លែងបែបនេះប្រាប់សារព័ត៌មានថ្មីៗ(ThmeyThmey) នាអំឡុងពេលមកតវ៉ាទាមទារឱ្យក្រុមហ៊ុនគោរពគោលការណ៍ ​និង ដោះស្រាយចំពោះ​ផ្ទះដែលត្រូវបានរឹបអូសពីអតិថិជន នៅមុខការិយាល័យបុរីពិភពថ្មី នាព្រឹកថ្ងៃទី២៧តុលានេះ។  បើតាមអ្នកស្រី បានបញ្ជាក់ក្រុមហ៊ុនបុរីពិភពថ្មីបានរឹបអូសយកផ្ទះទៅវិញ កាលពីខែមេសា ឆ្នាំ២០២៣។ 

 

អ្វីដែល អ្នកស្រី ណៃហួយ ក៏ដូចអតិថិជនមួយចំនួនទៀត តវ៉ាទាមទារពីក្រុមហ៊ុនបុរីពិភពថ្មី គឺការទូទាត់ប្រាក់៥០ភាគរយឱ្យម្ចាស់ផ្ទះដែលត្រូវរឹបអូស និងត្រូវចេញលិខិតធានាក្នុងទិញផ្ទះចូលវិញក្នុងតម្លៃ៥០ភាគរយចំពោះអតិថិជនដែលអស់លទ្ធភាពបន្តបង់ថ្លៃផ្ទះ​ រួមទាំងក្រុមហ៊ុន​ត្រូវគោរពតាមកិច្ចសន្យានានា។ យ៉ាងណាក៏ដោយ តំណាងក្រុមហ៊ុនបុរីពិភពថ្មី ពុំទាន់មានការឆ្លើយតបនៅឡើយ ជុំវិញទាមទាររបស់ពលរដ្ឋនេះ៕

​