ជាតិ
កម្ពុជា នឹងមានភ្លៀងធ្លាក់លាយឡំផ្គររន្ទះ និងខ្យល់កន្ត្រាក់ រូបភាពពី៖ ក្រសួងធនធានទឹក និងឧតុនិយម
×
ដោយ៖ សែម ប្រាក់ដាវ
ភ្នំពេញ៖ កម្ពុជាទទួលឥទ្ធិពលពីសម្ពាធទាប នៅសមុទ្រចិនខាងត្បូង និងប្រព័ន្ធសម្ពាធខ្ពស់ដែលគ្របដណ្ដប់ប្រទេសថៃ និងសមុទ្រចិនខាងត្បូងថមថយចុះឥទ្ធិពល។ ស្ថានភាពបែបនេះ នឹងធ្វើឱ្យអាចធ្វើឱ្យតំបន់មួយចំនួនមានភ្លៀងធ្លាក់ពីតិចទៅបង្គួរលាយឡំដោយផ្គរ រន្ទះ និងខ្យល់កន្ត្រាក់ ចាប់ពីថ្ងៃទី២៨ ខែតុលា ដល់ទី១ ខែវិច្ឆិកា។
បើតាមក្រសួងធនធានទឹក ចាប់ពីថ្ងៃទី៣០ ខែតុលា ដល់ថ្ងៃទី០១ ខែវិច្ឆិកា នឹងមានប្រព័ន្ធសម្ពាធខ្ពស់ពីប្រទេសចិនគ្របដណ្ដប់ផ្នែកខាងជើងប្រទេសថៃ លាតសន្ធឹងទៅដល់សមុទ្រចិនខាងត្បូង និងមានលំហូរខ្យល់បក់មកពីទិសខាងជើងនិងទិសឦសាន និងពីទិសអាគេ្នយ៍ ផ្ទុកនូវសំណើមនៃសមុទ្រចិនខាងត្បូង អាចបង្កើតបានជាពពកភ្លៀងមកលើកម្ពុជា។
ស្ថានភាពបែបនេះនឹងធ្វើឱ្យតំបន់មាត់សមុទ្រ និងបណ្តាខេត្តមួយចំនួនក្នុងតំបន់ទំនាបកណ្តាល រួមទាំងរាជធានីភ្នំពេញ នឹងមានភ្លៀងធ្លាក់ពីមធ្យមទៅបង្គួរ លាយឡំជាមួយផ្គររន្ទះ និងខ្យល់កន្រ្តាក់ ចាបពីថ្ងៃទី២៨ ដល់២៩ ខែតុលានេះ។ ដោយឡែក បណ្ដាខេត្តមួយចំនួនក្នុងតំបន់ខ្ពង់រាប នឹងមានភ្លៀងធ្លាក់ពីតិចទៅមធ្យម។
ជាមួយគ្នានេះ ចាប់ពីថ្ងៃទី៣០ ខែតុលា ដល់ថ្ងៃទី០១ ខែវិច្ឆិកា នឹងមានភ្លៀងធ្លាក់ក្នុងកម្រិតពីតិចទៅបង្គួរ លើតំបន់មាត់សមុទ្រ និងតំបន់ខ្ពង់រាប។ ទន្ទឹមនឹងនោះ តំបន់ទំនាបកណ្ដាលនឹងមានភ្លៀងធ្លាក់បង្គួរ លាយឡំផ្គររន្ទះ និងខ្យល់កន្ត្រាក់ផងដែរ ចាប់ពីថ្ងៃទី៣០ ខែតុលា ដល់ថ្ងៃទី០១ ខែវិច្ឆិកា ៕
© រក្សាសិទ្ធិដោយ thmeythmey.com