អន្តរជាតិ
ក្រសួងការបរទេសថៃជម្រុញឱ្យពលករថៃទាំងអស់នៅអ៊ីស្រាអែលត្រឡប់មកផ្ទះវិញ រូបភាព AFP
× ក្រសួងការបរទេសថៃ នៅថ្ងៃទី២៨ ខែតុលា បានប្រកាសដល់ពលករថៃទាំងអស់ដែលរស់នៅអ៊ីស្រាអែល ឱ្យត្រឡប់មកថៃវិញឱ្យបានលឿនតាមដែលអាចធ្វើទៅបាន ខណៈពេលដែលអ៊ីស្រាអែលកំពុងបង្កើនការវាយប្រហារប្រឆាំងនឹងក្រុមហាម៉ាសបន្ថែមទៀត ។
បន្ទាប់ពីទទួលបានដំណឹងតាមរយៈការប្រកាសរបស់កងកម្លាំងការពារអ៊ីស្រាអែល (IDF) ថា ខ្លួននឹងពង្រីកប្រតិបត្តិការជើងគោក និងផ្លូវអាកាស ជាមួយនឹងការទម្លាក់គ្រាប់បែកធ្ងន់ៗពេញមួយយប់ នៅថ្ងៃទី២៨ ខែតុលា លើតំបន់កាហ្សាភាគខាងជើង ក្រសួងការបរទេសថៃបានបង្ហោះសារនៅលើទំព័រ Facebook របស់ខ្លួន ដោយព្រមានពលករថៃទាំងអស់នៅក្នុងអ៊ីស្រាអែលឱ្យត្រឡប់មកថៃវិញ ដោយសារតែបារម្ភពីសុវត្ថិភាពរបស់ពួកគេ។
ចំពោះជនជាតិថៃដែលចង់ឡប់ទៅប្រទសវិញអាចទាក់ទងទៅកាន់សណ្ឋាគារ David Intercontinental ឬមជ្ឈមណ្ឌលជម្រក។
ជាមួយគ្នានេះ នាយករដ្ឋមន្ត្រីថៃលោក Srettha Thavisin ក៏បានបង្ហោះសារពីការព្រួយបារម្ភរបស់រដ្ឋាភិបាលលើសុវត្ថិភាពរបស់ពលករថៃដែលកំពុងស្ថិតនៅក្នុងអ៊ីស្រាអែល ហើយបានជំរុញឱ្យក្រុមគ្រួសារជួយបញ្ចុះបញ្ចូលសាច់ញាតិរបស់ខ្លួនដែលនៅទីនោះឱ្យត្រឡប់មកថៃវិញ។
គួរបញ្ជាក់ថា កាលពីថ្ងៃទី២៨ ខែតុលា ជើងហោះហើរជម្លៀសមកកាន់អាកាសយានដ្ឋានអន្តរជាតិដនមឿងបានបញ្ជូនជនជាតិថៃចំនួន ១៣៤ នាក់តាមរយៈជើងហោះហើរ Lion Air SL៧០០៥ នៅម៉ោង ២ និង៥០នាទី ព្រឹក, ជនជាតិថៃចំនួន ១៧៩ នាក់តាមរយៈជើងហោះហើរ Air Asia FD៨៧៥៤ នៅម៉ោង ៤ និង៥០នាទី ព្រឹក និងជនជាតិថៃចំនួន ១៨០ នាក់ទៀតតាមរយៈជើងហោះហើរ Nok Air DD៩០៨៩ នៅពាក់កណ្តាលអធ្រាត្រ៕
© រក្សាសិទ្ធិដោយ thmeythmey.com