នៅក្នុងចំណោមមនុស្សដែលប៉ូលិសហ្វីលីពីនបានឃាត់ខ្លួនលកាលពីយប់ថ្ងៃទី២៧ ខែតុលានោះ វាមានជនជាតិចិន កូរ៉េ វៀតណាម រួមទាំងហ្វីលីពីនផងដែរ។ នេះបើតាមការបញ្ជាក់ពីសេចក្ដីថ្លែងការណ៍របស់គណៈកម្មាធិការប្រឆាំងឧក្រិដ្ឋកម្មដែលរៀបចំដោយប្រធានាធិបតី (PAOCC) ។ 

 

ជាមួយគ្នានេះ PAOCC បានបន្ថែមថា ក្នុងអំឡុងពេលចុះត្រួតពិនិត្យនោះ ជនជាតិចិនពីរនាក់បាននិយាយថា ពួកគេ ត្រូវបានឃុំខ្លួនដោយបង្ខិតបង្ខំ ហើយក៏បានបង្ហាញពីស្លាកស្នាមដែលបន្សល់ការធ្វើទារុណកម្មលើដងខ្លួនពួកគេ។ 

 

លោក Crispin Remulla រដ្ឋមន្រ្តីយុត្តិធម៌ហ្វីលីពីនបានបញ្ជាក់ថា អាជ្ញាធរបានចាប់ផ្ដើមសម្ភាសជនដែលឃាត់ខ្លួនចំនួន ៥៩៨ នាក់ ដើម្បីអាចកំណត់ថាអ្នកណាជាជនរងគ្រោះ ឬជនសង្ស័យ។ ជាមួយគ្នានេះ ស្ថានទូតចិនក៏ត្រូវបានស្នើសុំឱ្យជួយកំណត់អត្តសញ្ញាណមនុស្សចំនួន ៩ នាក់ដែលសង្ស័យថាបានបង្កើតអាជីវកម្ម ដែលត្រូវបានផ្តល់អាជ្ញាប័ណ្ណថាជាក្រុមហ៊ុនហ្គេមអ៊ីនធឺណិតនេះ។ 

 

«វាគឺជាអាជីវកម្មដ៏ធំមួយដែលមានដើមទុនច្រើន ហើយរកប្រាក់ចេញពីការជួញដូរមនុស្ស»។ លោក Remulla បាននិយាយបែបនេះ។ 

 

ខណៈពេលដែលការព្រួយបារម្ភពីបញ្ហាបោកប្រាស់តាមអ៊ីនធឺណិត នៅក្នុងតំបន់អាស៊ីប៉ាស៊ីហ្វិកកាន់តែកើនឡើង លោក Remulla បានបន្ថែមថា អាជ្ញាធរកំពុងដាក់ពាក្យសុំដីកា ដើម្បីចូលពិនិត្យកុំព្យូទ័រដែលបានរកឃើញនៅខាងក្នុងបរិវេណនៃអាជីវកម្មនេះ ដែលត្រូវបានគេសង្ស័យថា មានការលួចបន្លំរូបិយប័ណ្ណ Crypto និងការល្បួងស្នេហាតាមអ៊ីនធឺណិត។

 

ស្រដៀងគ្នានេះ កាលពីខែ មិថុនាកន្លងទៅ មានមនុស្សជាង ២,៧០០ នាក់ត្រូវបានឃាត់ខ្លួន ដោយប៉ូលិសហ្វីលីពីន ក្នុងកំឡុងពេលចុះត្រួតពិនិត្យឆ្មក់នៅអគារជាច្រើនកន្លែង ក្នុងទីក្រុងម៉ានីល ដែលជនរងគ្រោះនៃការជួញដូរទាំងនេះ ត្រូវបានបង់ប្រាក់ដើម្បីជ្រើសរើសអ្នកលេងសម្រាប់ហ្គេមអនឡាញ៕