ទីភ្នាក់ងារដឹកជញ្ជូនផ្លូវអាកាសសហព័ន្ធរុស្ស៊ីបានប្រកាសបិទអាកាសយានដ្ឋាន Makhachkala ជាបណ្តោះអាសន្នរហូតដល់ថ្ងៃទី៦ ខែវិច្ឆិកា។ ការសម្រេចចិត្តនេះធ្វើឡើងបន្ទាប់ពីក្រុមបាតុកររាប់រយនាក់ បានលុកលុយតំបន់ផ្លូវចំណតយន្តហោះ ដើម្បីប្រឆាំងនឹងការពង្រីកប្រតិបត្តិការយោធារបស់អ៊ីស្រាអែល នៅតំបន់កាហ្សា។

 

យោងតាមក្រុមហ៊ុន Pobeda Airlines ជើងហោះហើរ DP-199 ពីទីក្រុងមូស្គូទៅ Makhachkala ត្រូវបានប្តូរទិសទៅ Vladikavkaz ។ ទន្ទឹមនេះ ក្រុមហ៊ុនអាកាសចរណ៍ Red Wings ក៏បានប្តូរទិសដៅជើងហោះហើររបស់ខ្លួនពី Nizhnevartovsk ទៅ Mineralnye Vody ខណៈជើងហោះហើរពី Makhachkala ទៅ Moscow និង Surgut ក៏ត្រូវបានពន្យារពេលផងដែរ។

 

នៅថ្ងៃទី២៩ ខែតុលា មនុស្សរាប់រយនាក់ បានប្រមូលផ្តុំគ្នា នៅអាកាសយានដ្ឋាន Makhachkala ដើម្បីតវ៉ាប្រឆាំងនឹងជម្លោះរបស់ក្រុមហាម៉ាស-អ៊ីស្រាអែល។ ក្រុមបាតុករទាំងនោះ បានសម្រុកចូលខាងក្នុងព្រលាន និងតំបន់ផ្លូវរត់របស់យន្តហោះ បន្ទាប់ពីជើងហោះហើរ ដែលបានគ្រោងទុកពីទីក្រុង Tel Aviv របស់អ៊ីស្រាអែល បានចុះចត។

 

ក្រោយ​ពេល​កើតហេតុ កម្លាំង​សមត្ថកិច្ច​បាន​ចល័ត​ទៅ​កន្លែង​កើតហេតុ ដើម្បី​បំបែក​ហ្វូង​មនុស្ស ។ អាជ្ញាធរតំបន់ Dagesta កំពុងគ្រប់គ្រងស្ថានភាពគ្មានសណ្តាប់ធ្នាប់នៅអាកាសយានដ្ឋាន Makhachkala ។

 

យោងតាមមន្ត្រីសុខាភិបាលក្នុងតំបន់ មនុស្សជាង២០នាក់ រួមទាំងប៉ូលិស និងជនស៊ីវិលបានរងរបួសក្នុងហេតុការណ៍ខាងលើ។ មនុស្ស១០ នាក់​ក្នុង​ចំណោម​ក្រុមបាតុករ​ ត្រូវ​បាន​គេ​បញ្ជូន​ទៅ​មន្ទីរពេទ្យ ដោយក្នុង​នោះ ២ នាក់​ ស្ថិត​ក្នុង​ស្ថានភាព​ធ្ងន់ធ្ងរ។

 

ស្នងការសិទ្ធិមនុស្សរុស្ស៊ីលោកស្រី Tatyana Moskalkova បាននិយាយថា ឧបទ្ទវហេតុនៅអាកាសយានដ្ឋាន Makhachkala មានគោលបំណងញុះញង់ឱ្យមានការស្អប់ខ្ពើមជនជាតិភាគតិច ហើយបានអំពាវនាវឱ្យប្រជាជនគោរពតាមច្បាប់ ក្នុងតំបន់យ៉ាងតឹងរ៉ឹង។

 

ទន្ទឹមនឹងនេះ ការិយាល័យនាយករដ្ឋមន្ត្រីអ៊ីស្រាអែលលោក ប៊ែនចាមីន ណេតានយ៉ាហ៊ូ បានចេញសេចក្តីថ្លែងការណ៍ភ្លាមៗដោយបញ្ជាក់ថា ទីក្រុង Tel Aviv សង្ឃឹមថា ទីភ្នាក់ងារអនុវត្តច្បាប់របស់រុស្ស៊ី នឹងការពារសុវត្ថិភាពរបស់ពលរដ្ឋអ៊ីស្រាអែលទាំងអស់ នៅគ្រប់ទីកន្លែង ក៏ដូចជាទប់ស្កាត់រាល់អំពើហិង្សាលើជនជាតិអ៊ីស្រាអែល៕