លោក ហេង រតនា បានបញ្ជាក់ទៀតថារយៈពេល៩ខែមកនេះ មន្រ្តីជំនាញ រំដោះមីនបាន​៦៨ ៣៥០គ្រាប់ ស្មើ២២៣ ៨៦០ ៥០៧ ម៉ែត្រក្រឡា ក្នុងនោះ ផ្ទៃដីចម្ការមីន​ចំនួន១៨១​៤០១​៦៥ ៨ ម៉ែត្រក្រឡា និងផ្ទៃដីចម្ការគ្រាប់ មានទំហំ៤២ ៤៥៨. ៨៤៩ ម៉ែត្រក្រឡា។ លទ្ធផលនេះ សម្រេចបាន៨៣ភាគរយ នៃផែនការឆ្នាំ២០២៣ ដែលដាក់ចេញ ២៦៨ ០៥០ ០៩៩គីឡូម៉ែត្រក្រឡា។

 

ក្រៅពីនេះ ស៊ីម៉ាក់ ក៏បានចុះពិនិត្យទីតាំងគ្រាប់មីន និងយុទ្ធភណ្ឌមិនទាន់ផ្ទុះ​ដល់​ទីតាំង​ពលរដ្ឋរាយការណ៍ និងបានកម្ទេចចោល​គ្រាប់មីន AP ចំនួន១ ៤៣៩គ្រាប់  មីនATចំនួន ២៥គ្រាប់ គ្រាប់មិនទាន់ផ្ទុះគ្រប់ប្រភេទ ១២​ ៤៧៦គ្រាប់ និងអាវុធធុនស្រាល ៧៤០​គីឡូ​ក្រាម។ ​កិច្ចប្រតិបត្តិការនេះ បានផ្ដល់ប្រយោជន៍​ដល់ពលរដ្ឋប្រមាណ ៤០​ម៉ឺន​គ្រួសារ​។ 

 

គិតមកទល់ពេលនេះ មាន១៣ខេត្តហើយ ដែលត្រូវបានប្រកាសថាអស់មីនទាំងស្រុង ដែល​រួមមាន ស្ទឹងត្រែង កែប ព្រៃវែង ភ្នំពេញ ព្រះសីហនុ ត្បូងឃ្មុំ កំពង់ចាម ស្វាយរៀង កំពង់ឆ្នាំង កណ្តាល តាកែវ កំពត និងចុងក្រោយខេត្តកំពង់ស្ពឺ៕