ក្រោយចាកចេញពីក្រុងតូក្យូ ប្រមុខការទូតអាម៉េរិក លោក អាន់តូនី ប្លីងខិន បានបន្តទស្សនកិច្ចនៅកូរ៉េខាងត្បូង។ ក្រោយជំនួបសមភាគីកូរ៉េខាងត្បូង លោកផាក ជីន ហើយនោះ លោកប្លីងខិន បានចោទរុស្ស៊ីថា កំពុងផ្តល់បច្ចេកវិទ្យាចំពោះយោធាកូរ៉េខាងជើង។ 

 

«យើងកំពុងឃើញកូរ៉េខាងជើងផ្តល់គ្រឿងបរិក្ខារយោធាទៅរុស្ស៊ី ដើម្បីបន្តការឈ្លានពាននៅអ៊ុយក្រែន។ ប៉ុន្តែយើងក៏កំពុងឃើញរុស្ស៊ីផ្តល់ការគាំទ្រ និងបច្ចេកវិទ្យាទៅកូរ៉េខាងជើងសម្រាប់កម្មវិធីយោធាផងដែរ»។ លោកប្លីងខិន បានសង្កត់ធ្ងន់បែបនេះ នៅក្នុងសន្និសីទសារព័ត៌មានរួមគ្នាជាមួយលោក ផាក ក្នុងថ្ងៃទី៩ ខែវិច្ឆិកា។ 

 

ទន្ទឹមនេះ ប្រមុខការទូតអាម៉េរិក បានបន្តថា លោក និងលោកផាក បានពិភាក្សាពីចំណាត់ការបន្ថែមរវាងប្រទេសទាំងពីរ ដើម្បីដាក់សម្ពាធកាន់តែខ្លាំងឡើង លើក្រុងមូស្គូកុំឱ្យផ្ទេរបច្ចេកវិទ្យាយោធា ទៅក្រុងព្យុងយ៉ាង ដែលជាការបំពានសេចក្តីសម្រេចរបស់ក្រុមប្រឹក្សាសន្តិសុខអង្គការសហប្រជាជាតិ (UNSC)។ នេះបើតាមការចុះផ្សាយរបស់ទីភ្នាក់ងារព័ត៌មាន Yonhap។ 

 

នេះមិនមែនជាលើកទីមួយឡើយ ដែលអាម៉េរិកចោទកូរ៉េខាងជើងបញ្ជូនអាវុធឱ្យរុស្ស៊ី សម្រាប់ធ្វើសង្រ្គាមនៅអ៊ុយក្រែន។ 

 

កន្លងមក ប្រធានាធិបតីរុស្ស៊ី លោក វ្ល៉ាឌីមៀ ពូទីន ក៏បានសន្យាជួយកូរ៉េខាងជើង​ ក្នុងការកសាងផ្កាយរណបផងដែរ​ ក្នុងពេលទស្សនកិច្ចរបស់លោកគីម នៅរុស្ស៊ី។ ក្រុងព្យុងយ៉ាង បានបាញ់ផ្កាយរណបចារកិច្ចចំនួន ២លើកហើយ ប៉ុន្តែត្រូវទទួលបរាជ័យ។

 

ក្នុងដំណើរទស្សនកិច្ចនៅកូរ៉េខាងត្បូង លោកប្លីងខិន បានជួបជាមួយទីប្រឹក្សាសន្តិសុខជាតិកូរ៉េខាងត្បូង លោក Cho Tae-yong និងថ្កោលទោសកូរ៉េខាងជើងពីការផ្តល់អាវុធទៅរុស្ស៊ី សម្រាប់ធ្វើសង្រ្គាម។ 

 

បន្ទាប់ពីបញ្ចប់ទស្សនកិច្ចនៅកូរ៉េខាងត្បូង លោកប្លីងខិន នឹងបន្តទស្សនកិច្ចនៅក្រុងញូវដែលី ឥណ្ឌា បន្តទៀត ដើម្បីជជែកពីកិច្ចសហប្រតិបត្តិការផ្សេងៗ៕