ដោយ៖ សែម ប្រាក់ដាវ
ភ្នំពេញ៖នាអំឡុងឈប់សម្រាកបុណ្យអុំទូកខាងមុខនេះ ខេត្តកំពត និងព្រះសីហនុ រំពឹងថាទទួលបានលំហូរទេសចរច្រើនជាងឆ្នាំមុនៗ។ខេត្តទាំង២នេះ បានត្រៀមខ្លួនរួចរាល់ ស្វាគមន៍ទេសចរទៅកម្សាន្ត។
អាជ្ញាធរខេត្តកំពត កំពុងរៀបចំហេដ្ឋារចនាសម្ព័ន្ធនិងរមណីយដ្ឋានទេសចរណ៍ ដើម្បីត្រៀមទទួលភ្ញៀវក្នុងពិធីបុណ្យអុំទូក។ មន្ទីរទេសចរណ៍និងអាជ្ញាធរមូលដ្ឋាន នឹងរៀបចំលម្អភ្លើងពណ៌នៅតាមផ្លូវ ហើយតំបន់នីមួយៗនឹងមានកម្មវិធីតូចៗរូមមាន ពិព័រណ៍ ផលិតផល ភូមិមួយផលិតផលមួយ និងការប្រគំតន្ត្រីផងដែរ។
ជាមួយគ្នានេះ អាជ្ញាធរខេត្ត នឹងរៀបចំបុណ្យអុំទូក ថ្នាក់ខេត្តនៅដងព្រែកកំពង់បាយ អមជាមួយនឹងការតាំងពិព័រណ៍បង្ហាញពីផលិតក្នុងតំបន់នៅថ្ងៃទី១០ ដល់១១ វិច្ឆិកា។
លោក សយ ស៊ីណុលប្រធានមន្ទីរទេសចរណ៍ខេត្តកំពតរូបនេះ បានបញ្ជាក់ថា៖ «ភ្ញៀវនឹងមកលេងច្រើនដដែលពីព្រោះខេត្តយើងសម្បូរ តំបន់គោលដៅទេសចរណ៍ជាច្រើន។ ក្នុងពិធីបុណ្យអុំទូក ខ្ញុំជឿថាទេសចរជាច្រើន នឹងនៅតែទៅកម្សាន្តនៅខេត្តកំពត»។
លោក សយ ស៊ីណុល ប្រធានមន្ទីរទេសចរណ៍ខេត្តកំពត
ទេសចរណ៍សំខាន់ៗ មានរមណីយដ្ឋានភ្នំបូកគោ ទឹកឈូ កំពង់ត្រាច ភ្នំឈ្ងោក ដូងទេរ ព្រែកត្នោត ព្រែកកំពត ឧទ្យានដងព្រែក ទឹកធ្លាក់តាដា ទំនប់ម្លិច សហគមន៍ត្រពាំងសង្កែ កសិ-ទេសចរណ៍ចម្ការម្រេច និងកន្លែងជាច្រើនទៀត សុទ្ធសឹងជាតំបន់ទេសចរណ៍ដែលស្ថិតនៅខេត្តកំពត។ ភ្នំបូកគោ និងទឹកឈូ ជាគោលដៅទាក់ទាញបានភ្ញៀវទេសចរជាតិ និងអន្តរជាតិច្រើនជាងគេ។ នេះបើតាម លោក សយ ស៊ីណុល ប្រធានមន្ទីរទេសចរណ៍ខេត្តកំពត។
លោក សយ ស៊ីណុលមិនទាន់ប្រាប់បាននៅឡើយមានទេសចរកក់កន្លែងស្នាក់នៅប៉ុន្មានភាគរយនៅខេត្តកំពត។
តែយ៉ាងក៏ដោយ ប្រធានមន្ទីរទេសចរណ៍ខេត្តកំពត ក៏សង្ឃឹមថាមានទេសចរច្រើននិងកន្លែងស្នាក់នៅមិនសល់នោះទេ។
ដោយឡែក ខេត្តព្រះសីហនុជាខេត្តមួយដែលទាក់ទាញទេសចរខ្លាំងពីមួយឆ្នាំទៅមួយឆ្នាំ។ បុណ្យអុំទូកខាងមុខនេះប្រធានមន្ទីរទេសចរណ៍ខេត្តព្រះសីហនុ រំពឹងថាទេសចរនឹងទៅកម្សាន្តនៅខេត្តព្រះសីហនុច្រើនជាងឆ្នាំមុនព្រោះខេត្តបានរៀបចំរួចរាល់ ដើម្បីទាក់ទាញអារម្មណ៍ទេសចរមកកម្សាន្ត។
ទេសចរកម្សាន្តនៅដូងទេរ។ រូបភាពពី៖ មន្ទីរទេសចរណ៍ខេត្តកំពត
សម្រាប់ភ្ញៀវទេសចរទៅកម្សាន្តនៅតាមតំបន់ឆ្នេរនិងកោះ អាចស្នាក់នៅដោយការបោះតង់ អមដោយការការពារសន្តិសុខ និងសុវត្ថិភាពទៀតផង។ លោកតាំង សុចិត្តគ្រឹស្នា ប្រធានមន្ទីរទេសចរណ៍ខេត្តព្រះសីហនុ បានលើកឡើងថា ៖ « រាល់ពិធីបុណ្យទាននានា កន្លែងស្នាក់នៅក្នុងខេត្តនេះមិនដែលសល់ឡើយដូច្នេះទេសចរត្រូវកក់កន្លែងស្នាក់នៅយ៉ាងហោចណាស់មួយសប្តាហ៍»។
ខេត្តព្រះសីហនុកន្លែងដែលទេសចរនិយមទៅកម្សាន្ត រួមមាន កោះសង្សារ កោះរ៉ុង ឆ្នេរអូរត្រែស អូរឈើទាលនិងកោះពស់ជាដើម។ ក្រៅពីតំបន់ទាំងនោះ ខេត្តនេះ ក៏មានកោះតូច-ធំ ដែលពោរពេញដោយសក្តានុពលទេសចរណ៍ចំនួន៣២ផងដែរ។ ទេសភាពព្រៃឈើ និងធម្មជាតិបានទាក់ទាញភ្ញៀវទេសចរគ្រប់កន្លែងមកកម្សាន្តស្ទូចត្រី និងមុជទឹកក្រោមបាតសមុទ្រជាដើម។
គួរបញ្ជាក់ដែរថាប្រធានមន្ទីរទេសចរណ៍ខេត្តទាំងពីរ ក៏បានអំពាវនាវ ឱ្យពលរដ្ឋចូលរួមឱ្យបានច្រើនកុះករ។
តែយ៉ាងណា លោកស្នើឱ្យអ្នកចូលរួម រួមគ្នាថែរក្សាអនាម័យ បរិស្ថានស្អាតដើម្បីសោភ័ណភាពខេត្តទាំងអស់គ្នា៕