សមយុទ្ធយោធាប្រចាំឆ្នាំរួមគ្នារបស់ជប៉ុននេះបានចាប់ផ្ដើមឡើងកាលពីថ្ងៃទី១០ ខែវិច្ឆិកាកន្លងទៅ។ សមយុទ្ធយោធានេះ មានការចូលរួមពីកងកម្លាំងជើងទឹកអាម៉េរិក អូស្ត្រាលី និងកាណាដា ហើយហ្វីលីពីនបានចូលរួមធ្វើជាអ្នកសង្កេតការណ៍។ នេះបើតាមការបញ្ជាក់ពីឧត្តមនាវីឯក Akira Saito។ 

 

«ហ្វីលីពីន ជាប្រទេសដ៏សំខាន់មួយសម្រាប់ពួកយើង ហើយយើងកំពុងតែរកវិធីសម្របសម្រួលជាមួយកងទ័ពជើងទឹករបស់ពួកគេនៅគ្រប់ឱកាសដែលអាចធ្វើទៅបាន»។ លោក Saito បានសង្កត់ធ្ងន់បែបនេះ។ 

 

សមយុទ្ធនេះធ្វើឡើងស្របពេលជប៉ុន អាម៉េរិក រួមទាំងហ្វីលីពីនកំពុងស្វះស្វែងរកទំនាក់ទំនងកាន់តែជិតស្និទ្ធ និងកិច្ចសហប្រតិបត្តិការសន្តិសុខឱ្យកាន់តែស៊ីជម្រៅ ដើម្បីទប់ទល់នឹងភាគីចិន។ យ៉ាងណាក្ដី លោកក៏បានបញ្ជាក់ថា សមយុទ្ធនេះមិនបានកំណត់គោលដៅលើប្រទេសណាមួយជាក់លាក់ឡើយ។ 

 

លើសពីនេះ ឧត្តមនាវីឯកអាម៉េរិក លោក Karl Thomas បានលើកឡើងថា នៅពេលដែលកងទ័ពជើងទឹកធ្វើការជាមួយគ្នាកាន់តែច្រើន ប្រតិបត្តិការពហុភាគី និងសមយុទ្ធនេះនឹងបង្កើននូវសន្តិសុខជូនតំបន់។ លោក Thomas ក៏បានបង្ហាញពីអារម្មណ៍រំភើបដែលជប៉ុន បានអញ្ជើញហ្វីលីពីនឱ្យមកធ្វើអ្នកសង្កេតការណ៍នៅឆ្នាំនេះផងដែរ។  

 

គួរបញ្ជាក់ថា សមយុទ្ធយោធានេះនឹងប្រព្រឹត្តទៅក្នុងរយៈពេល ១០ថ្ងៃ ហើយនឹងមាននាវាចំនួន៣០ និងយន្តហោះចំនួន ៤០គ្រឿងចូលរួម៕