ជាតិ
យុទ្ធនាការជិះកង់ ជាង៤០០គីឡូម៉ែត្រ ដើម្បីលើកកម្ពស់ការអប់រំ នៅខេត្តគោលដៅចំនួន៤
× ភ្នំពេញ៖ អង្គការ អេដ អេ អាកស្យុង,Foyer Lataste និងដៃគូនៅក្នុងសម្ព័ន្ធកុមារក្រៅសាលា បានធ្វើយុទ្ធនាការជិះកង់ដើម្បីលើកកម្ពស់ការអប់រំ និងការចុះឈ្មោះចូលរៀន ក្នុងរយៈចម្ងាយ ៤២៥គីឡូម៉ែត្រ។ កម្មវិធីនេះ ចាប់ផ្តើមពីថ្ងៃទី១៣ ដល់ថ្ងៃទី២០ វិច្ឆិកា ដោយធ្វើដំណើរទៅខេត្តគោលដៅចំនួន៤ ដោយឆ្លងកាត់បឹងទន្លេសាប។ ចំពោះគោលដៅ គឺចាប់ផ្តើមពីរាជធានីភ្នំពេញ ឆ្ពោះទៅកាន់ ខេត្តកំពង់ឆ្នាំង កំពង់ធំ សៀមរាប និងខេត្តបន្ទាយមានជ័យ។
កម្មវិធីជិះកង់ គឺជាយុទ្ធនាការផ្សព្វផ្សាយជាសាធារណៈ ដើម្បីបង្កើនការយល់ដឹងអំពីការការពារកុមារ និងការអប់រំរបស់អង្គការដៃគូពាក់ព័ន្ធ ក្នុងគោលបំណងអំពាវនាវ ដល់សិស្សានុសិស្សនៅទូទាំងតំបន់គោលដៅ ត្រៀមខ្លួនសម្រាប់ឆ្នាំសិក្សាថ្មី នាខែធ្នូ។
ក្រុមការងាររបស់កម្មវិធីជិះកង់ បានចាប់ផ្តើមបេសកម្មរបស់ខ្លួន ដោយចាកចេញពីសាលាទន្សាយ ដែលមានទីតាំងនៅសាលាបឋមសិក្សាទួលគោក ទៅកាន់ចំណតទីមួយ ដែលស្ថិតនៅក្នុងឃុំតាជេស ស្រុកកំពង់ត្រឡាច ខេត្តកំពង់ឆ្នាំង។ បន្តដំណើរពីខេត្តកំពង់ឆ្នាំង ក្រុមជិះកង់ នឹងបន្តទៅកាន់ក្រុងស្ទឹងសែន នៃខេត្តកំពង់ធំ ឆ្ពោះទៅស្រុកស្ទោង និង ខេត្តសៀមរាប ដើម្បីផ្សព្វផ្សាយពីសារៈសំខាន់នៃវិស័យអប់រំ លើការអប់រំបរិយាបន្ន យុវជនស្ម័គ្រចិត្ត និងការចុះឈ្មោះចូលរៀន ក្នុងបវេសនកាលថ្មីឆ្នាំ២០២៣-២០២៤។
ដំណើរយុទ្ធនាការនេះ អង្គការ អេដ អេ អាកស្យុង នឹងបរិច្ចាគសៀវភៅជាង មួយពាន់ក្បាលដល់សាលាគោលដៅទាំងអស់ នៅខេត្តកំពង់ឆ្នាំង កំពង់ធំ សៀមរាប និងផ្ទះសំណាញ់មួយខ្នងដល់សាលាបឋមសិក្សាសំព័រ ដែលស្ថិតនៅស្រុកស្ទោង ខេត្តកំពង់ធំ។
គួរបញ្ជាក់ផងដែរថា អង្គការអេដ អេ អាកស្យុង កំពុងអនុវត្តសកម្មភាពរបស់គម្រោង “ដៃគូរួមគ្នាផ្តល់ឱកាសអប់ រំដល់កុមារបាត់បង់ឱកាសនៅកម្ពុជា - CCOSC” នៅក្នុងក្របខ័ណ្ឌទូទាំង២៥ ខេត្ត និងរាជធានី ក្រោមថវិការួមគ្នារបស់កម្មវិធីអប់រំកុមារ (EAC) នៃមូលនិធិអប់រំទាំងអស់គ្នា (Education Above All Foundation) ប្រទេសកាតា និងសហភាពអឺរ៉ុប (European Union) ៕
Tag:
ThmeyThmey
យុទ្ធនាការជិះកង់
អប់រំ
© រក្សាសិទ្ធិដោយ thmeythmey.com