ក្នុងកម្មវិធីកិច្ចសន្ទនាអំពីលំនៅឋានក្នុងទីក្រុង ដែលរៀបចំឡើងនៅថ្ងៃទី១៧ វិច្ឆិកា លោកស្រី ប៊ើណាដេត បន្ថែមថា ប្រជាជនប្រមាណ១០០០លាននាក់នៅលើពិភពលោកនាពេលបច្ចុប្បន្នដែលកំពុងរស់នៅ ដែលមិនមានរបៀបរៀបរយ និងមិនទទួលបានការអភិវឌ្ឍស្មើគ្នា ក្នុងនោះផ្ទះសម្បែងពួកគេ​មិនមានសេវាសំខាន់ៗដូចជាទឹកស្អាត អគ្គិសនី មិនមានសិទ្ធិកាន់កាប់ដីធ្លី​និងមិនមានភាពធន់ទៅនឹងការប្រែប្រួលអាកាសធាតុ។ លោកស្រីបន្ថែមថា៖«​យើងអាចនិយាយជាក់ស្ដែងបានថា ផ្ទះខ្លះមិនមានទឹកស្អាតប្រើប្រាស់ និងប្រឈមងាយឆ្លងជំងឺ ខ្លះមិនមានសិទ្ធិកាន់កាប់ដីធ្លី និងប្រឈមនឹងការរឹបអូសនាពេលខាងមុខ។ ផ្ទះខ្លះមិនមានភាពរឹងមាំទេ និងប្រឈមនឹងគ្រោះធម្មជាតិផ្សេងៗ»។ លោកស្រីបន្ថែមថា ទាំងនេះជាអ្វីដែលរដ្ឋាភិបាល និងអ្នកពាក់ព័ន្ធគួរធ្វើការទាំងអស់គ្នា ដើម្បីជំរុញឱ្យមានការកែលម្អទិដ្ឋភាពទាំងនោះ និងធានាផ្តល់លំនៅឋានស្មើគ្នារវាងអ្នកមាន និងអ្នកក្រ។