លោក Oleg Starynskyi គ្រូបង្វឹកភ្នំពេញក្រោន នៅតែចង់បាន ៣ពិន្ទុពីក្រុម Dynamic Herb Cebu ក្នុងការប្រកួតនាយប់ថ្ងៃទី៣០ ខែវិច្ឆិកា ឆ្នាំ២០២៣។ ការប្រកួតជើងទី១ ភ្នំពេញក្រោន បានឈ្នះក្រុមនេះ ក្នុងលទ្ធផល ៣-០ ម្ដងរួចមកហើយ កាលពីថ្ងៃទី២១ ខែកញ្ញា ឆ្នាំ២០២៣ នៅកីឡដ្ឋាន Rizal Memorial។ 
 

គ្រូបង្វឹករូបនេះ ដូចជាមានទំនុកចិត្តជាខ្លាំងចំពោះការប្រកួតក្នុងទឹកដីរបស់ខ្លួន។ យោងទៅលើការផ្សាយរបស់ក្លិបភ្នំពេញក្រោន លោក Oleg Starynskyi បាននិយាយដូច្នេះថា៖«យើងតែងតែមានអារម្មណ៍ល្អក្នុងការលេងក្នុងដី ព្រោះពេលដែលយើងលេងក្រៅទឹកដីយើងមានពេលតិចតួចក្នុងការរៀបចំក្រុម និងរក្សាកាយសម្បទាររបស់យើង។ យើងនឹងព្យាយាមលេងដោយទំនុកចិត្ត និងលេងបាល់ទាត់ដែលល្អ។ យើងនឹងព្យាយាមដាក់សម្ពាធពួកគេ បង្កើតឱកាសឲ្យបានច្រើនក្នុងការលេង។»។
  

ដោយឡែក ក្រុម Macarthur FC ដែលឈរចំណាត់ថ្នាក់លេខ១ ក្នុងពូល F ក៏ត្រូវប្រកួតជាមួយ Shan United នៅកីឡដ្ឋាន Thuwunna វេលាម៉ោង ទន្ទឹមគ្នា។
 

បច្ចុប្បុន្ន ក្រុម Macarthur FC ឈរលេខ១ មាន ៩ពិន្ទុ ស្មើជាមួយភ្នំពេញក្រោន ឈរនៅចំណាត់ថ្នាក់លេខ២។ រីឯ Dynamic Herb Cebu នៅចំណាត់ថ្នាក់លេខ៣ មាន៤ពិន្ទុ និងចំណាត់ថ្នាក់លេខ ៤ Shan United មាន១ពិន្ទុ៕