បុរសម្នាក់ដើរប្រមូលព្រះពុទ្ធបដិមាបែកបាក់តាមវត្ត មកជួសជុលឡើងវិញ ដើម្បីសន្សំកុសល

ជាតិ

វីដេអូ

បុរសម្នាក់ដើរប្រមូលព្រះពុទ្ធបដិមាបែកបាក់តាមវត្ត មកជួសជុលឡើងវិញ ដើម្បីសន្សំកុសល

03, Dec 2023 , 8:59 pm

រូបភាព

រូបពីហ្វេសប៊ុក ផ្ទះអ្នកព្រៃផ្គុំនាងពូនវេទជួយមនុស្សមានទុក្ខ.

ដោយ: ប៉ូ សាគុន

ភ្នំពេញ៖ ជាង១ឆ្នាំហើយ ដែលលោក សុខ ដើរប្រមូលព្រះពុទ្ធបដិមាបែកបាក់តាមវត្ត មកជួសជុលឡើងវិញ ដើម្បីសន្សំកុសល។ លោក សុខ គឺជាឈ្មោះតំណាងឱ្យបុរសម្នាក់ ដែលដើរប្រមូលព្រះពុទ្ធបដិមាបែកបាក់តាមវត្ត។

«ព្រះពុទ្ធរូបពេលដែលគេហែថ្មីៗ គេថ្វាយបង្គំ គេសំពះ គេទូលលើក្បាល ប៉ុន្តែនៅពេលដែលបាក់បែក ពុកផុយ គេបែរជាយកលោកទៅដាក់ក្រោមដើមឈើ ដាក់ជិតចេតិយ ដាក់ជិតទីប៉ាឆា សត្វឆ្មាឆ្កែបន្ទោបង់ដាក់ក៏មាន។ តើសមឬអត់? តើខំកសាងវត្តធំៗធ្វើអី? រូបព្រះពុទ្ធបដិមា គឺតំណាងឱ្យសាសនាព្រះពុទ្ធហ្នឹងហើយ»។ នេះជាការយល់ឃើញរបស់បុរសម្នាក់ ដែលបានដើរប្រមូលរូបព្រះពុទ្ធបដិមាបាក់បែក មកជួសជុលឱ្យល្អឡើងវិញ និងយកទៅអភិសេក សម្រាប់គោរពបូជាជាថ្មី។

បុរសដែលបានដើរប្រមូលព្រះពុទ្ធរូបបាក់បែកតាមវត្តអារាម សុំមិនបញ្ចេញឈ្មោះខ្លួនឡើយ ដូច្នេះសារព័ត៌មានថ្មីៗ សូមហៅឈ្មោះគាត់ថា លោក សុខ។ លោក សុខ បានដើរប្រមូលព្រះពុទ្ធបដិមាបាក់បែក នៅតាមវត្តនានា អស់រយៈពេលជាង១ឆ្នាំមកហើយ។ ក្នុងរយៈពេលជាងមួយឆ្នាំនេះ លោកបានជួសជុល រូបព្រះពុទ្ធបដិមា បានចំនួន១០១០អង្គ គិតត្រឹមថ្ងៃទី២៩ខែវិច្ឆិកា ឆ្នាំ២០២៣។ ក្រៅពីនោះ ក៏នៅមានពុទ្ធបដិមាមួយចំនួនទៀត ដែលលោកមិនទាន់បានជួសជុលរួចដែរ។

រូបពីហ្វេសប៊ុក ផ្ទះអ្នកព្រៃផ្គុំនាងពូនវេទជួយមនុស្សមានទុក្ខ

លោក សុខ ពន្យល់បន្ថែម៖«អ្នកខ្លះគេប្រកាន់ថា ព្រះបាក់បែក គេមិនហ៊ានតទេ គេថារាសីធ្លាក់។ មុននឹងតព្រះ គេសុទ្ធតែទៅរកគ្រូមើល។ ខ្ញុំធ្វើនេះមិនចង់បានអីទេ ខ្ញុំចង់តែបានបុណ្យទេ។ មិនត្រឹមតែខ្ញុំជួយសង្គ្រោះព្រះពុទ្ធរូបបាក់បែកទេ ខ្ញុំថែមទាំងជួយសង្គ្រោះដើមពោធិ៍ បានជិត២ពាន់ដើមឯណោះ។ ដើមពោធិ៍ដែលដុះនៅតាមវត្ត គេបម្រុងនឹងកាប់ឬដកចោល ខ្ញុំឱ្យកូនចៅខ្ញុំទៅដកទាំងអស់ ដើម្បីយកមកផ្សាំនិងបណ្ដុះ។ ពេលខ្ញុំហែព្រះពុទ្ធរូបទៅវត្តណា ខ្ញុំយកដើមពោធិ៍ទៅវត្តនោះ មានដើមពោធិ៍និងដើមរាំងភ្នំ»។

ក្រោយជួសជុល ព្រះពុទ្ធបដិមាដែលប្រមូលទុករួចរាល់ហើយ លោក សុខ នឹងចាប់ផ្ដើមជួសជុល រូបព្រះសិអារ្យមេត្រីម្ដង។ ទោះជាយ៉ាងណា ខណៈពេលនេះលោក សុខ អះអាងថាខ្លួនមិនទាន់ចេះធ្វើរូបព្រះសិអារ្យមេត្រីឡើយ ប៉ុន្តែលោកនឹងព្យាយាមរៀន ដើម្បីអាចជួសជុលបាន។ លោកសុខ ថាលោកជួសជុលតែព្រះតូចៗ ចាប់ពី៥គីឡូក្រាមចុះប៉ុណ្ណោះ។

«តាមគម្រោងខ្ញុំជួសជុល១ពាន់អង្គ ប៉ុន្តែពេលនេះបាន១០១០អង្គហើយ និងនៅសល់ព្រះមិនទាន់ជួសជុលផ្សេងទៀត។ ក្រោយជួលជុលព្រះដែលបានប្រមូលទុករួចរាល់ ខ្ញុំជួសជុលរូបព្រះសិអារ្យមេត្រី បន្ថែមទៀត។ ពេលនេះរូបព្រះសិអារ្យមេត្រី ខ្ញុំប្រមូលបានជិត១០០អង្គដែរ។ ព្រះដែលឆេះក៏ខ្ញុំយកដែរ»។ នេះជាការបន្ថែមរបស់លោក សុខ។

រូបពីហ្វេសប៊ុក ផ្ទះអ្នកព្រៃផ្គុំនាងពូនវេទជួយមនុស្សមានទុក្ខ

ព្រះពុទ្ធរូបដែលលោក សុខ ជួសជុលរួច បានដង្ហែចូលវត្ត នៅទូទាំង២៤រាជធានីខេត្ត ដោយលើកលែងតែខេត្តបាត់ដំបងមួយប៉ុណ្ណោះ ដែលមិនទាន់មានការហែចូល។ លោក សុខ ថាខ្លួនជួសជុលរូបព្រះពុទ្ធបដិមាបាក់បែក ដើម្បីសន្សំបុណ្យ។ លោកបានដឹកនាំមនុស្សមួយក្រុម ឱ្យធ្វើការងារនេះដែរ។ ជាមួយគ្នានេះ លោកបានអះអាងថា លោកមិនជួយជុលវត្ថុបុរាណឡើយ ដោយលោកជួយជុលតែពុទ្ធបដិមា ដែលធ្វើពីស៊ីម៉ង់ ឬម្នាងសិលាប៉ុណ្ណោះ។

រូបដែលលោកជួសជុលនោះ បើមានតែព្រះកាយ និងធ្វើព្រះសីសៈថ្មីភ្ជាប់។ បើមានតែព្រះសីសៈ នឹងធ្វើព្រះកាយថ្មីភ្ជាប់។ ប្រសិនមានតែព្រះហត្ថ នោះនឹងកសាងរូបថ្មី ហើយដាក់ព្រះហត្ថនោះ ចូលទៅក្នុងព្រះកាយថ្មី។ បើមានតែបល្ល័ង្កជាប់ព្រះភ្នែន ក៏កសាងរូបថ្មី ភ្ជាប់ជាមួយភ្នែនចាស់ដែរ។

ដំណើរការនៃការប្រមូល រូបព្រះពុទ្ធបដិមាបាក់បែក គឺលោក សុខ ទៅសុំព្រះសង្ឃនៅតាមបណ្ដាវត្តនានា ដែលរូបទាំងនោះ ដាក់ចោលតាមរបងវត្ត តាមទីប៉ាឆា តាមគុម្ពឈើ ឬនៅជិតចេតិយជាដើម។ ខ្លះទៀតក៏មានគេហៅឱ្យលោកទៅយកដែរ។ ទោះជាយ៉ាងណា វត្តខ្លះក៏ព្រះសង្ឃមិនអនុញ្ញាតឱ្យលោកយក បដិមាបែកបាក់នោះចេញដែរ ព្រោះព្រះសង្ឃខ្លាចលោកយកទៅលក់។

រូបពីហ្វេសប៊ុក ផ្ទះអ្នកព្រៃផ្គុំនាងពូនវេទជួយមនុស្សមានទុក្ខ

សម្រាប់ព្រះពុទ្ធបដិមា ដែលបានជួសជុលរួចរាល់ លោក សុខ បានដង្ហែទៅវត្តណាដែលចង់បានរូបព្រះទាំងនោះ។ កន្លងទៅលោកបាន ដង្ហែទៅវត្តនាគវ័ន្តបាន៩៩អង្គ។ ដង្ហែទៅវត្តស្វាយជ្រុំនៅស្វាយរៀង ២៤អង្គ វត្តក្រឡែកែង១០៤អង្គ ភ្នំត្បែង១៤០អង្គ។ វត្តចន្ទប្បជោត្តនារាម ហៅវត្តតាសុត ១៩អង្គ ហែទៅស្រុកព្រះស្ដេច ក្នុងឃុំកំពង់សឹង៩វត្ត ចំនួន៤២អង្គ។ និងទៅវត្តវិហារសួគ៌ប្រមាណ២០អង្គ។

លោក សុខ ស្នើទៅព្រះសង្ឃ និងអាចារ្យវត្ត សូមថែរក្សាព្រះពុទ្ធរូបដែលបាក់ចែក កុំយកទៅបោះចោល ឬទុកចោលដោយមិនមានការគោរព ដោយសូមឱ្យជួយជុលសម្រាប់គោរពបូជាបន្ត។ បន្ថែមពីនោះ លោក សុខ ក៏បានសំណូមដល់ពរពុទ្ធបរិស័ទដែរ លោកថាប្រសិនជឿលើសាសនាព្រះពុទ្ធ គោរពព្រះពុទ្ធ សូមកុំបោះបង់ចោលរូបព្រះពុទ្ធបដិមាដែលបាក់បែក ដោយគួរតែជួសជុលឡើងវិញ។ លោកថា ខ្លឹមនៃវត្តគឺព្រះពុទ្ធរូប ដែលតំណាងឱ្យព្រះដ៏មានព្រះភាគ៕