នាថ្ងៃទី៥ ខែធ្នូ ឆ្នាំ២០២៣ សហព័ន្ធកីឡាជឺជីតស៊ូកម្ពុជា បានបិទវគ្គបណ្ដុះបណ្ដាលអាជ្ញាកណ្ដាល និងចៅក្រុម កម្រិតមូលដ្ឋាន នៅទីស្នាក់ការគណៈកម្មាធិការជាតិអូឡាំពិក។ វគ្គបណ្ដុះបណ្ដាលនេះ ធ្វើឡើងចាប់ពីថ្ងៃទី៣-៥ ខែធ្នូ ដោយមានសិក្ខាកាម ៤២នាក់។
 

ក្នុងវគ្គបណ្ដុះបណ្ដាលនេះ លោក សេង ប៊ុនសុង បានប្រាប់ថា ដើម្បីអភិវឌ្ឍខ្លួនជោគជ័យ និងទទួលបានការគោរពពីជំនាន់ក្រោយ អ្នកជំនាន់មុន ត្រូវតែមានវិន័យ និងសកម្មភាពល្អ ដើម្បីជាគម្រូ។ ប្រធានរូបនេះ បន្ថែមទៀតថា ប្រសិនជាគ្មានវិន័យ និងសកម្មភាពល្អទេ ពួកគេ នឹងត្រូវបានអ្នកជំនាន់ក្រោយ វាយតម្លៃមិនល្អ។
 

«យុវជន-យុវនារី គឺជាវិរៈបុរស ជំនាន់ក្រោយ ប៉ុន្ដែដាច់ខាតកុំបំភ្លេចបុព្វបុរស។ ទី១ គឺវិន័យ ប្រសិនជាយើងខ្វះវិន័យខ្លួនឯង ហើយទៅប្រាប់គេឲ្យធ្វើ គឺមិនអាចទៅរួចទេ។ ទី២ គឺសកម្មភាព ជាទង្វើមួយ ដែលឆ្លុះបញ្ចាំងពីយើង បើទង្វើយើងមិនល្អ សិស្សានុសិស្ស អ្នកជំនាន់ក្រោយយើង និងវាយតម្លៃ។»។ លោក សេង ប៊ុនសុង បាននិយាយដូច្នេះ។
 

ក្នុងពិធីដដែរនេះ លោក សេង ប៊ុនសុង ទូន្មានឲ្យអាជ្ញាកណ្ដាល និងចៅក្រមទាំងនោះ ឲ្យកាត់សេចក្ដីប្រកបដោយភាពយុត្តិធម៌ ដោយជៀសឲ្យផុតពីការកាត់សេចក្ដីលម្អៀង ៤យ៉ាង។​ ការកាត់សេចក្ដីលម្អៀង ៤យ៉ាងនោះ គឺ កាត់សេចក្ដីលម្អៀង ព្រោះស្អប់, ស្រឡាញ់, ខ្លាច និងលម្អៀង ព្រោះមិនចេះ៕