តាមការជូនដំណឹងទៅកាន់សភានៅថ្ងៃទី៨ ខែធ្នូ ក្រសួងការបរទេសអាម៉េរិក បានសម្រេចលក់គ្រាប់រថក្រោះចំនួន ១៤០០០គ្រាប់ ដែលមានតម្លៃច្រើនជាង ១០៦លានដុល្លារទៅអុីស្រាអែល ដោយមិនឆ្លងកាត់សភា ស្របពេលប្រតិបត្តិការយោធាបានបើកនៅទូទាំងតំបន់កាហ្សា។ ការអនុម័តដោយកម្រនេះ ធ្វើឡើងស្របពេលសភាមានការខ្វែងគំនិតគ្នា ជុំវិញជំនួយទៅអុីស្រាអែល និងអ៊ុយក្រែន និងដោយផ្អែកលើការការពារសន្តិសុខជាតិ។

 

ការអនុម័តលក់គ្រាប់រថក្រោះជាបន្ទាន់នេះ ធ្វើឡើងដោយស្របតាមច្បាប់គ្រប់គ្រងការនាំចេញអាវុធ។ ជាការពិត វាមិនមែនជាលើកទីមួយឡើយ ដែលរដ្ឋាភិបាលអាម៉េរិកសម្រេចលក់អាវុធដោយមិនឆ្លងកាត់សភា ប៉ុន្តែការធ្វើបែបនេះ ជារឿងកម្រកើតមាន។ 

 

«រដ្ឋាភិបាលអាម៉េរិក ប្តេជ្ញាចំពោះសន្តិសុខអុីស្រាអែល ហើយវាពិតជាសំខាន់សម្រាប់ផលប្រយោជន៍សន្តិសុខជាតិ ក្នុងការជួយអុីស្រាអែល អភិវឌ្ឍ និងការពារកម្លាំងការពារខ្លួន»។ ក្រសួងការបរទេសអាម៉េរិក បានបញ្ជាក់បែបនេះ នៅក្នុងសេចក្តីថ្លែងការណ៍មួយចេញនៅថ្ងៃទី៩ ខែធ្នូ ដោយបន្តថា អុីស្រាអែល នឹងប្រើប្រាស់អាវុធទាំងនោះ ដើម្បីប្រឆាំងការគំរាមកំហែងពាក់ព័ន្ធនឹងសន្តិសុខក្នុងតំបន់ និងពង្រឹងសមត្ថភាពការពារមាតុភូមិ។ 

 

កន្លងមក នៅក្នុងឆ្នាំ២០១៩ លោក Mike Pompeo រដ្ឋមន្រ្តីការបរទេសអាម៉េរិកកាលជំនាន់នោះ បានអនុម័តការលក់អាវុធក្នុងតម្លៃប្រមាណ ៨,១ពាន់លានដុល្លារ ទៅអារ៉ាប៊ីសាអូឌីត, អេមីរ៉ាតអារ៉ាប់រួម និងហ្ស៊កដានីផងដែរ។ 

 

ការប្រកាសរបស់ក្រសួងការបរទេស ធ្វើឡើងក្រោយពេលអាម៉េរិក បានប្រើសិទ្ធិវេតូលើសេចក្តីព្រាងសេចក្តីសម្រេចក្រុមប្រឹក្សាសន្តិសុខ ដែលទាមទារឱ្យមានបទឈប់បាញ់ភ្លាមៗនៅក្នុងជម្លោះរវាងអុីស្រាអែល និងប៉ាឡេស្ទីន៕